الاثنين، 28 ديسمبر، 2009

الفأر جزائرى وأسألو روراره


محتوي الخبر الطريف يقول: القاهرة - هذا الفأر ليس مصرياً .. بهذه العبارة التي تحمل نفيا قاطعا، رفض اللواء عبدالفتاح بدران نائب رئيس شركة ميناء القاهرة الجوي، اتهامات شركة الخطوط الجوية السعودية بأن ميناء القاهرة الجوي هو الجهة المسؤولة عن الفأر الذي تم اكتشافه علي إحدي طائراتها الجامبو خلال رحلتها يوم الجمعة الماضي من القاهرة إلي جدة، والتي حملت رقم 302، موضحا أنه لا يمكن بأي حال من الأحوال أن يكون هذا الفأر مصرياً.




طبعا كل الناس سابت القصه دى وبدأوا يبحثوا الفار دة مصرى ولا سعودى؟
يعنى اللى هيتحمل تكاليف تاخر الرحله الشركة السعوديه ولا مطار القاهرة
والاخبار ملأت الجرايد والصحف والفضائيات

فى جريدة النبأ
ظبط فأره مصريه مع فأر اعمال سعودى فى طائرة سعوديه فى وضع مخل بالاداب العامه – وتورط مسؤل كبير فى الفضيحه

فى حديث المدينه وباقى الصحف الصفرأء والحمراء
-جلسه سريه فى فندق كبير فى القاهرة******** تكشف حقيقه فأر مطار القاهرة


اخبار الرياضة


- اضافه حادث الفأر الى ملف أم درمان يعزز الموقف المصرى
-الفأر جزائرى وأسألو روراره


- حضر لمشاهده ماتش مصر والجزائر – وبعدها كره المصريين والجزائريين فقرر العوده الى مسقط رأسه



أخبار السياسه


- وسطاء قطريين وأمراتيين لحل الازمه المصريه السعوديه


- فأر يحمل جواز سفر اسرائيلى يفجر ازمه مصريه سعوديه


- عاهل الحرمين فى اتصال هاتفى بمسؤل مصرى كبيييير يوكد انه على استعداد تام لعمل لجوء سياسى لكل الفأران المصريه


ولكن تحت مظله الهجرة الشرعيه


- طرح الموضوع فى مجلس الشعب بعد الانتخابات العام المقبل


- اعلن وزير الصحة ان خطته فشلت فى تفجير ازمه فى وسائل المواصلات بين مصر والسعوديه – كان من المفترض ظهور الفأر قبل موسم الحج


- بعد تهريب كل الاثار المصريه الى الخارج – الدور الان على الفئران

-

المجلات العلميه
- تحليل ال DNA سينهى الازمه


- نشر بحث فى احدى الجامعات السعوديه عن علاقه ظاهرة هروب الفئران من شبه الجيرة العربيه بحدوث زلازل وبراكين فى المنقطه


- رأى اخر لمعرفه جنسيه الفأر ( نقوم بوضع الفأر فى قفص ونحضر قط سعودى واخر مصرى )
واذا اكل القط المصرى الفأر يكون الفأر سعودي الجنسيه
وذلك عملا بالمثل المصرى القائل انا وابن عمى على الغريب
واذا اكل القط السعودى الفأر يكون الفأر سعوديا
وذلك عملا بالمثل المصرى مش كل فأر اللى يتاكل لحمه


- تكتم شديد فى وزارة الخارجية المصريه عن ظاهرة هروب الفئران الى الدول العربيه
-

اخبار الفن
- يتم الان الاعداد لتصوير الفيلم الرومانسى ( بين فأرين وميه يا اهل السعوديه يا غاليين عليا)


- المطرب الشعبى شعبولا يرد على اتهام السعوديين بان الفأر مصرى الجنسيه بأغنيه يقول فيها


( الفأر دة من الجزاير********* مش سعودى ولا مصرى

الفأرة دة من الجزاير ********* ومش هقول واعيييييد


الفأر دة من الجزاير ********** واسألوا اخو العمييييد

واييييييييه,

الخميس، 19 نوفمبر، 2009

مصر واسرائيل

كان نفسى بعد 50 سنة الم احفادى الصغار واقعد احكيلهم عن سنة 2010 واحكيلهم عن مصر وهيه بتلعب فى كاس العالم
وازاى كانت فرحتنا
لكن للاسف مش مكتوبالى ان احكى لاولادى واحفادى زى ما ابويا حكالى عن سنة
1990
عموما قدر الله وما شاء فعل
عموما هننتظر لما كاس العالم يرجع يقام فى ايطاليا يمكن مش مكتوب لنا غير ايطاليا دى
نلعب فى كاس العالم لو بقى فى ايطاليا
حتى لو لعبنا فى كاس العالم مانهزمش غير ايطاليا
المهم نرجع لمصايبنا ك مسلمين
مش معقولة ادحور حالنا كدة
واحد مصرى يقولك لو الجزائر هتلاعب اسرائل هشجع اسرائيل
والجزائرين يقولوا احنا لو لعبنا فى تل ابيب كان احسن لنا من القاهرة

وفى الاخر كام مصاب وكام قتيل وكام وكام وكام
ايه يا بشر دى كورة
يعنى لعب
يعنى بلاى بالانجليزى


الثلاثاء، 12 مايو، 2009

الراس ب 1.2 يوم اضافى

مش قلتلكو ساعات الواحد نفسة يكاكى
والله بفكر اغير اسم المدونة واخليها بدل مهاترات عاقل تبقى
( مكاكيات عاقل)
بجد كل يومين اقول خلاص الحالة هتروح يطلع موضوع جديد يرجعلى الحالة تانى
وعلى حسب الموضوع بتكون الحالة يعنى ممكن موضوع يخلينى اكاكى موضوع يخلينى اجعر زى الغول وازعق واقول تعاليلى يا بطة
او اجرى فى الشارع بلبوص واشيل التراب واحطة على راسى والناس تشاور عليا وتقول العبيط اهوه
وافتكرت الراجل العفوى اللى كان عندنا فى البلد زمان ( عم مكاوى) كان بيمشى فى الشارع يقول
هههعهععههههع عليا الطلاج محاجة نافعة هيه خربانة خربانه
***********

بعد مرور 3 سنين على حادث عبارة السلام اللى راح ضحيتة شباب البلد اكتر من الفين شاب وطفل وام وأب
الحمد لله بعد 3 سنين حكمت القضاء المصرى النزيه على الاستاذ
ممدوح اسماعيل صاحب المجزرة اللى تسبب باهماله فى موت الناس دى كلها بتشغيله لعبارة بدون اساليب نجاة وبتحميله حموله اضعاف اضعاف حمولة العبارة الاصلية غير كمان ان العبارة غير صالحة اصلا لنقل الركاب
الحمد لله اتحكم علية ب سبع سنين سجن
اهم حاجة القانون يتخذ مجراة .... وفوت علينا بكرة يا سيد ( همسة عتاب)
************


2000 قتيل = سبع سنين حبس كتير صح ؟؟
يعنى ما يعادل 1.27 يوم حبس عن كل راس . يا حلاااااااوة ( بتاع الراجل بتاع الفيلم بتاع زمان)


الاستاذ هيثم مدرس الرياضيات بتاع الاسكندرية لما ضرب الطالب وبالخطأ حصل للطالب هبوط ومات
بعد شهرين تلاتة اتلمت القضية ودلوقتى الاستاذ هيثم بيدى دروس خصوصية فى سجن ابو زعبل
واتحكم علية ب ست سنين حبس 6 سنوات على راس واحدة يعنى الراس بتساوى 2191.5 يوم لو حسبنا السنة فيها 365 يوم وربع

يا صفايح الزبدة السايحة يا براميل القشطة النايحة

*************
اهالى الضحايا عملوا افراح ما بعدها افراح لصدور الحكم دة ماكنوش متوقعين ابدا انه ممدوح اسماعيل هيتحكم علية اصلا
فلو حتى كانت المحكمة حكمت بالسجن لمدة شهرين كانو هيبقى بردوا فرحانين ويرقصوا ويغنوا ويقولوا يحيا العدل يحيا العدل
ونحن نشيد بنزاهه القضاء المصرى والكلام اللى بيقولوه دلوقتى بعد صدور الحكم

السؤال دلوقتى بعد الحكم ماصدر والافراح دى كلها
الجانى اللى صدر فية الحكم دة هيتحاكم فعلا وهيتسجن ؟؟؟
الراجل دلوقتى عايش فى لندن وزمانة دلوقتى بيضرب كشرى عند بابا عبدة فى بولاق الدكرور بالعاصمة الانجليزية لندن ولا فى دماغة

طب الناس فرحانة لية ؟؟
وفين النزاهه لما الجانى مش هيتحبس ؟؟

انا اللى مزعلنى الناس اللى عاملة افراح والدبايح اللى هتدبح فى سفاجا بعد ما صدر الحكم
والحكم صدر بعد مابردت نار الضحايا
والحكم صدر ب سبع سنين بالتساوى مع الاستاذ هيثم اللى قتل طفل واحد بالخطأ
وفى النهاية المحكوم علية اصلا مش موجود ولا هيبقى موجود شركاته شغالة وهوة بيديرها بالانترنت وكأن شيئا لم يكن

كوكووووووكو
مولاى
وأدرك شهر يار الصباح فسكتت عن الكلام المبارح

الخميس، 30 أبريل، 2009

حلم ..... ولا كابوس!!!!!؟

حلم ولا كابوس
الموضوع دة قديم : يعنى من حوالى 10 سنين كدة كنت كتبتة بس المعنى رجع فدماغى تانى فقلت اصيغه من اول وجديد

الاحلام والكوابيس بس من منظور عالم معاصر
اية الفرق بين الحلم والكابوس ومين فيهم احسن ؟

الحلم هو : كابوس نفسى اصحى منه
الكابوس : هو حلم صحيت منه وندمت على كل لحظة حلوة شوفتها فية

وبالمثال يتضح المقال

كنت مرة باحلم انى بقيت مدير بقة ( اه ساعات كدة بيجيلى الكابوس دة)
ولابس بقى ومتشيك زى المديرين وقاعد فى مكتب متكيف بحرى بحرى
وعندى سواق للعربية وكل الألاطة بتاع المديرين دى
وكنت مطلع عين اهل العيال اللى شغالة معايا
بسرق شغلهم وانسبة لنفسى ومهزءهم فى الريحة والجاية
كل يوم اخترعلهم اخطاء علشان اعاقبهم عليها واطلع عينهم فى المأموريات اللى بيتمرمطوا فيها واخد انا المأموريات الحلوة والسفريات المنغنغه
وكنت باخد سندوتشات الجبنة بتاعتهم واخليهم غصب عنهم يعملولى شاى
وطبعا قريبى وحبايبى وعصفايرى مظبطهم واللى بيعارضنى بنفخة

وفجأة جة واحد نفس اموتة صحانى من النوم
وبدا الكابوس الحقيقى ........


مرة تانية جالى كابوس والعياذ بالله
كأنى كدة كنت نفس المدير اللى كنت بحلم بية من شوية
بس كنت فى ساعه الحساب
اتحاسبت على كل كبيرة وصغيرة وعلى العيال اللى شغالين معايا ( فى الحلم الاولانى) وظلمتهم وعلى حقهم اللى ضيعته وعلى...... وعلى....... وعلى......
وهيبدا العذاب
لحد ما جة واحد ابن حلال صحانى من الكابوس دة
صحيت لقيت نفسى لسة زى ما انا موظف كحيان قلت الحمد لله
احمدك يا رب

دلوقتى بقى تحب تحلم ولا يجيلك كابوس
لو كنت بتحلم وحد صحاك هتصحى متعكنن على العز اللى كنت فية وهتصحى على الواقع المر اللى انت عايشة


اما بقى لو ربنا كرمك بكابوس حلو كدة معكنن وملينا قرف
اول ما هتصحى ياه هتحس بشوية فرح ماشوفتهمش من يوم ما نجحكت فى الابتدائية
وتعرف قد اية انت عايش فى نعيم وهتحمد ربنا على كل حال

ها دلوقتى نفس فحلم ( يعكنن عليك)............................. ولا كابوووس ( يفرحك)