الثلاثاء، 12 مايو، 2009

الراس ب 1.2 يوم اضافى

مش قلتلكو ساعات الواحد نفسة يكاكى
والله بفكر اغير اسم المدونة واخليها بدل مهاترات عاقل تبقى
( مكاكيات عاقل)
بجد كل يومين اقول خلاص الحالة هتروح يطلع موضوع جديد يرجعلى الحالة تانى
وعلى حسب الموضوع بتكون الحالة يعنى ممكن موضوع يخلينى اكاكى موضوع يخلينى اجعر زى الغول وازعق واقول تعاليلى يا بطة
او اجرى فى الشارع بلبوص واشيل التراب واحطة على راسى والناس تشاور عليا وتقول العبيط اهوه
وافتكرت الراجل العفوى اللى كان عندنا فى البلد زمان ( عم مكاوى) كان بيمشى فى الشارع يقول
هههعهععههههع عليا الطلاج محاجة نافعة هيه خربانة خربانه
***********

بعد مرور 3 سنين على حادث عبارة السلام اللى راح ضحيتة شباب البلد اكتر من الفين شاب وطفل وام وأب
الحمد لله بعد 3 سنين حكمت القضاء المصرى النزيه على الاستاذ
ممدوح اسماعيل صاحب المجزرة اللى تسبب باهماله فى موت الناس دى كلها بتشغيله لعبارة بدون اساليب نجاة وبتحميله حموله اضعاف اضعاف حمولة العبارة الاصلية غير كمان ان العبارة غير صالحة اصلا لنقل الركاب
الحمد لله اتحكم علية ب سبع سنين سجن
اهم حاجة القانون يتخذ مجراة .... وفوت علينا بكرة يا سيد ( همسة عتاب)
************


2000 قتيل = سبع سنين حبس كتير صح ؟؟
يعنى ما يعادل 1.27 يوم حبس عن كل راس . يا حلاااااااوة ( بتاع الراجل بتاع الفيلم بتاع زمان)


الاستاذ هيثم مدرس الرياضيات بتاع الاسكندرية لما ضرب الطالب وبالخطأ حصل للطالب هبوط ومات
بعد شهرين تلاتة اتلمت القضية ودلوقتى الاستاذ هيثم بيدى دروس خصوصية فى سجن ابو زعبل
واتحكم علية ب ست سنين حبس 6 سنوات على راس واحدة يعنى الراس بتساوى 2191.5 يوم لو حسبنا السنة فيها 365 يوم وربع

يا صفايح الزبدة السايحة يا براميل القشطة النايحة

*************
اهالى الضحايا عملوا افراح ما بعدها افراح لصدور الحكم دة ماكنوش متوقعين ابدا انه ممدوح اسماعيل هيتحكم علية اصلا
فلو حتى كانت المحكمة حكمت بالسجن لمدة شهرين كانو هيبقى بردوا فرحانين ويرقصوا ويغنوا ويقولوا يحيا العدل يحيا العدل
ونحن نشيد بنزاهه القضاء المصرى والكلام اللى بيقولوه دلوقتى بعد صدور الحكم

السؤال دلوقتى بعد الحكم ماصدر والافراح دى كلها
الجانى اللى صدر فية الحكم دة هيتحاكم فعلا وهيتسجن ؟؟؟
الراجل دلوقتى عايش فى لندن وزمانة دلوقتى بيضرب كشرى عند بابا عبدة فى بولاق الدكرور بالعاصمة الانجليزية لندن ولا فى دماغة

طب الناس فرحانة لية ؟؟
وفين النزاهه لما الجانى مش هيتحبس ؟؟

انا اللى مزعلنى الناس اللى عاملة افراح والدبايح اللى هتدبح فى سفاجا بعد ما صدر الحكم
والحكم صدر بعد مابردت نار الضحايا
والحكم صدر ب سبع سنين بالتساوى مع الاستاذ هيثم اللى قتل طفل واحد بالخطأ
وفى النهاية المحكوم علية اصلا مش موجود ولا هيبقى موجود شركاته شغالة وهوة بيديرها بالانترنت وكأن شيئا لم يكن

كوكووووووكو
مولاى
وأدرك شهر يار الصباح فسكتت عن الكلام المبارح