الأربعاء، 20 يناير، 2010

حنكلولو

تعرف ايه عن الحنكلولوه


الحنكلولوه ده حاجه حلزونيه

مستكينه ملتويه

يعنى سهن وعامل نفسه عادى


أيون

الحنكلولوه ده اسم الخطه الجديده

حنكلولوه زى ماقلتلك

واحد مستكن مسهوك كدة

عنده بلاده فى التفكير

تأخر عقلى واضح

عبط مستمر ليل نهار

تشوفه تفتكر اسرى حرب 73


ده فعلا بقى حال ناس كنير

والاسباب معروفه

مش هقولك بقى السكر اللى بقى باربعه جنيه ونص

ولا رغيف العيس اللى بقى يتشاف بعدسه مكبرة عشرة اكس

ولا التلوث اللى مالى البلد

ولا الزحمه

ولا امناء الشرطه اللى بيتنططوا على خلق الله

ولا عسكرى المرور اللى لازم يتصبح ويتمسى بجنيهين

ولا المدير الفنى لمنتخب مصر اللى مصمم يلاعب عماد متعب حتى لو برجل واحدة

ولا من المدير التانى اللى مانتش عارف عايز يعمل فينا ايه

ولا من المدير التالت ( اللى بالى بالك)- بلاش نتكلم فى السياسه



سيبك من الكلام ده كله

وتعالى نلعب حنكلولوه


اعمل نفسك عبيط وامشى فى الشارع مدلدل ريالتك على صدرك

ولو حد كلمك صرخ فى وشه


واهم حاجه تطول شعرك اخر حاجه وتلبس لبس معفن

بعد اسبوع من تقمص الشخصيه هتلاقى نفسك بتعيشها بواقعيه غريبه

كمل كمان اسبوع يعم ولو عاجبك الحال ابقى ادعيلى



ثوانى همسح الرياله علشان بللت البنطلون

حنكلولو


التعليقات
0 التعليقات

ليست هناك تعليقات:

إرسال تعليق

للعلم يتم مراجعه التعليقات قبل النشر