الثلاثاء، 23 فبراير، 2010

انا البرادعى............................... يا حسنى

انا البرادعى............................... يا حسنى



كثر الحديث فى الاونه الاخيرة على الدكتور محمد البرادعى الرئيس السابق لوكاله الطاقه الذريه

بعد لما ما كناش  بنسمع عنه غير فى مشكله العراق وايران

دولقتى سيرته بقت على كل لسان



القصه كلها انه طقت فى دماغه انه يرشح نفسه لرئاسه الجمهوريه

وعلى طول كل الاحزاب بدات تجرى وراه علشان ينضم لحزبها

على اساس ان ربنا ممكن يكرم الحزب الغلبان دة وفى يوم من الايام يبقى الحزب الحاكم

اشهرهم حزب الغد وحزب كفايه وشويه الاحزاب الغلابه دوول



بس الراجل فاجئنا باول الغرائب انه رفض الانضمام لاى حزب

قلنا والله كويس

شويه والراجل قالك انا نازل مصر بقى علشان ابدا حملتى الانتخابيه

قلنا خلاص البلد هتتقلب

وكل المصريين اللى رفعوا زمان رايه ( عايزين نغير – او بنحب السادات – او رايه كفايه – او حتى رايه الاسلام هو الحل)هيجروا ورا الراجل ويستقبلوه ويعملوا انقلاب فى البلد



المفاجئه التانيه انه مارحش استقبل الراجل غير حوالى الف واحد

من شهر كان بيستقبل منتخب مصر فى المطار ملايييييين الملاييين



دة مش ليه غير معنى واحد بس – انه فيه اكذوبه اسمها البرادعى



وأتاكدنا من موضوع الاكذوبه دى لما طلع فى العاشرة مساءا

وكان بيعيش دور السادات لما كان بيقول للمذيعه (همت)

يا همت دول اولادى بيتدربوا

دة كان بيقول يا منى البلد عايزه تغيير يا منى ( منى الشاذلى )



بعد الحوار الطويل مع الدكتور البرادعى الشخى اللى من شهرين كان حاجه مجهوله بالنسبالى وبالنسبه لكثير من المصريين

لقيناه راجل غلبان خالص – مايعرفش حاجه عن مصر – عن شباب مصر



طب عندك خطه يعم الحج لو بقيت الريس هتشتغل بيها

طلع بردوا غلبان خالص لاعندة خطه ولا عنده اى حاجه



طب سؤال اخير

انت اصلا نطبق عليك الشروط اللى تخليك ترشح نفسك لرئاسه الجمهوريه

طلع بردوا غلبان خالص ولا تنطبق عليه الشروط

الأربعاء، 3 فبراير، 2010

لحظات يقف عندها التاريخ

لحظات يقف عندها التاريخ


اه التاريخ بيقف

بيقف بجد

بس مش اى واقفه

اه بيقف الوقفه من هنا كله لام يستخبى والا انا مش هبقى مسؤل عن اللى هيحصل

على فكرة انا سمعت انه بيقف ماشفتوش لا حد يفتكر كده ولا كده



عموما اللحظات دى بتكون شخصيه

بمعنى لحظه تغيير فى حياه انسان

اتحكم عليه بالسجن المؤبد واتجوز مثلا

نجح واتخرج وبقى عاطل لا قدر الله

خلف ولد هيطلع عين امه مثلا

اه كدة يعنى فى اللحظات دى التاريخ لازم يقف اه لازم يقف وقفه رجاله

وممكن يقف التاريخ علشان دوله شعب ....ممكن

بس ناردا يعنى ماذكرش انه وقف فى تاريخ مصر غير 3 مرات

لما عمرو بن العاص فتح مصر

ولما انتصرنا فى 73

ولما مجدى عبد الغنى جاب جول فى كاس العالم



غير كده عمره ما وقف ولا هيقف حتى لو اخد كل الحبات الزرقاء والحمرا اللى ماليين البلد



تعرف انه ساعات ممكن يعيط

اه التاريخ مش حاجه تانيه



اوعى تكون ماتعرفش

لا اعرف يحج
ممكن يكذب....
مش ممكن يكذب اللى بيكذب دول الناس البشر
ممكن يعيط وممكن يطلع لسانه وممكن يطرطر

يطرطر دى جايه من الفعل " طرطر الواد طرور كبير " اى تبول كميه كبيرة من البول



كتير جدا من الناس التاريخ ضحكلهم

وكتير جدا عيط علشانهم

وكتير تانيين طرطر عليهم



يعنى لو ضربنا امثله مش هنخلص لانه طرطر على ناس كتييييييييير ولسه الطرور شغال



معلش ثوانى كده هروح .... واجى