الخميس، 17 فبراير، 2011

تعديل موعد عيد الشرطة


دى فرحة بقى ولازم اجيب حاجة حلوة أفرح بيها العيال دة يوم عيد
أصل الايام دى بقت هيصة اننا اى حاجة حلوة تحصل ف حياتنا نعملها عيد
فمثلا يوم ما أتولدت عملناه عيد .... المشكله انهم لو كانوا سألونا قبل ما يولدونا عارفين كنا نقول ايه
كنا نقول أعتقونا لعام 2011 

بعد عيد الميلاد دة تختفى الاعياد من حياتنا الشخصية فجأة الى  ان يأتى يوم الزواج
وللأسف بردوا بيقولوا عيد الزواج!!!!
يا جماعه مش قلنا ان الاعياد دى بتتسمى على الايام الحلوة فى حياتنا الشخصية او حياتنا العامة
حد يفهمنى ازاى يبقى يوم الزواج دة عيد ؟؟؟؟!!!!!!!!

أظن همه دول العيدين الوحيدين الشخصيين فى حياة البني أدم يوم ما اتولد ويوم ما أتجوز
البداية والنهاية يعنى 

اما الاعياد الاجتماعية  فتتلخص ف شوية اعياد كدة على قد الحال
يعنى عيد الحب
عيد الام
عيد شم النسيم

ممكن كمان اعيادنا كمسلمين " طبعا دى  الوحيدة التى يطلق عليها كلمة عيد بحق"

خلاصة الاعياد دى انها مواسم للباعة أكثر من الناس يعنى الواحد لو اشتغل بس على طلبات الناس ف  الاعياد دى هيبقى مليونير
زى مثلا  عم أحمد بتاع كله ودة راجل على قد حالة غلبان عندة بس عمارتين تلاتة كل اللى عملة انه شغل مخه حبتين يعنى
بييجى ف عيد الحب يفتح محل دباديب وورد احمر
وف عيد شم النسيم يقلب  المحل لفسخانى رنجة وفسيخ وبصل
وقبل عيد الام بيومين  يفتح محل ملابس حريمى
وف عيد الاضحى بيشتغل جزار
وقبل عيد الفطربيفتح فرن كعك وبيتى فور

ويارب كتر اعيدنا وعلى قد نيته عم احمد اديله 

اما بالنسبة لاعياد الامة فمافيش اى خلاف على عيد النصر 6 اكتوبر والتحرير و ثورة يوليو  
بس مش دى المشكلة خالص المشكلة دلوقتى فى  عيد الشرطة اللى الشرطة صمدت  ضد الاحتلال الانجليزى فى الاسماعيلية عام 1952 يوم  25 يناير
وعيد ثورة شباب مصر اللى اتحررت فيها مصر من الديكتاتوريه و الظلم والفساد  هو 25 يناير بردوا  
عايزين نوفق بين هذا الخلاف لان يوم ثورة مصر هو انتصار وصمود شباب مصر ضد ضباط وبلطجية الشرطة
وتضم أحداث الثورة ايضا خيانة الشرطة للدولة وهروبها وترك خدمتها مما أدى الى انتشار السرقه والنهب وهروب المساجين
فيستحيل ان يكون يوم صمود الشرطة 1952 ويوم خيانة الشرطة 2011 يوم عيد للشرطة!!!

اولا لازم نتفق على حاجة ان 25 يناير خلاص أتحجز يوم عيد ثورة الشباب لانهم همه دلوقتى أصحاب البلد وعلى راى المثل القائل
اللى بيتنجح ثورتة.... بتكون الكلمة الماشية هي كلمتة  



طب نعمل ايه ما انا مش هخلص كتابة المقال دة غير لما أحل الازمة دى
طب نخلى عيد الشرطة مع عيد الام ........!!!!
يبقى عيد أم الشرطة ...... لا لا لا ليفتكروها شتيمة

طب نخلى عيد الشرطة مع عيد الجلاء يوم 18 يونيه
يبقى جلاء الانجليز عن مصر و جلاء الشرطة من الاقسام والسجون – اظن نفس الفكرة ؟؟

أصل مش معقولة نجمع بين عيد الشرطة وعيد الحب دى تبقى مصيبة
هو ممكن نجمع بين عيد الشرطة وعيد زواج أى حد من الشعب مثلا و هيه تمشى بصراحة !!!!
انا احتارت بصراحة مسكت الاجندة ولفيتها أدور فيها على يوم ينفع مش لاقى خالص
حتى يوم خميس الابرار – ودة اول بعد طلعة رجب – وهو ما يسمى بعيد الميتين
اللى تلاقى فيه الستات عاملين قرص ورايحين القرافة يوزعوا القرص على على العيال
حتى دة ماينفعش !!!!

أخيرا لقيته 
عارفين ايه هوافضل يوم هو يوم 30 فبراير دة نخليه عيد الشرطة والحمد لله اليوم دة عمرة مابيجى وبكدة بيقى احنا وفقنا بين الاعياد ومزعلناش الشرطة وعملناهلم عيد
ولو همه جم واشتكوا علشان اليوم دة ما بيجيش وما بيخدوش اجازة نخليهولهم يوم 29 فبراير
ودة بيجى مرة كل اربع سنين
وعلى رأى المثل القائل :
زورنى كل أربع سنين مرة حرام تنسونى بالمرة .... حرام



weather counter

الجمعة، 11 فبراير، 2011

بايدينا مصر بكره أحلى


كانت مهاترات كتبتها فى ابريل 2010 عبارة عن مشهد مكرر اصف فيه خطاب تنحي الرئيس مبارك
ولكن لم أكن ادرى ان المهاترات ممكن تقلب بجد
ف بين الحين والاخر ننتظر ان يخرج علينا من الحتة المستخبى فيها بشريط فيديو- زى الشرائط بتاع اسامة بن لادن اللى كان بيبعتها للجزيرة -ويقول فيها خطاب التنحى الشهير

وبينما انا اشرب كوبا من القرفة الساخن فى اليوم الثامن عشر من ايام الثورة المصرية
جال بخاطرى عده مشاهد اخرى للمستقبل القريب
منها الكئيب البائس الذى يصف المصريين وهم يتحاربون على كراسى السلطة
ولما لا وقد أصبح لكل فرد فى المجتمع صوتا وهذا يرجع الى سياسة الحزب الوطنى فى العقد الاخير
التى لطالما ازعجتنا باعلانها الشهير ايام الانتخابات – خليك ايجابى وأدى صوتك للحزب الوطنى-

لكن اظن المفروض الاعلان دة لازم يتغير بعد اللى حصل ويكون على النحو التالى

منظر فى سجن زباله من سجون مصر اللى ما تتخيرش عن بعضها
المساجين بالبدل الزرقاء المعهودة وواقفين طابور بالعرض جنب بعض
وينام على الارض رجال الحزب الوطنى – مش عايز أقول حرامية لانى مش متاكد انهم حرامية بس!!-
ويقوم المساجين فى نفس الوقت بخلع ال......... واخراج ال ......... والطرطره فى نفس واحد على رجال الحزب
زووووم على احد رجال الحزب
يقوم أحمد عز والبول يشر من على رأسة الى وجهه الى كتفه ..... ويداه ضارعتان .... ضارعتان من شخ عليه
ويقول الجمله الشهيرة فى الاعلان
                                  خليك ايجابى ...... وطرطر عالحزب الوطنى


المشهد الكئيب اللى نفسى ما اصوروش الخناقة الكبيرة – بين الاحزاب ال....
هو حد سمع عن الاحزاب دى قبل كدة بخير
يعنى كل اللى سمعناه
خناقة فى حزب الوفد واقالة الرئيس السابق واعتصام داخل مقر الحزب ورجاله الحزب بيشتموا بعض
لما انتوا جو بعض وبتتخانقوا امال لما تتعاملوا مع الاحزب التانية هتعملوا اية

يظل الرابح الاكبر هم جماعه الاخوان المسلمون الغير محظورة


المشهد الاجمل اللى نفسى بجد أشوفة فى الواقع

منظر خارجى على قسم شرطة
وانا داخل كدة القسم اقضى اى مصلحة
اول ما أوصل على باب القسم
العسكرى اللى واقف يقوم ويعملى تعظيم سلام والاقى الظابط قام يقابلنى على الباب  وبياخدنى بالحضن
واتفضل يا بية وشوفوا الزبون يشرب ايه – دة الظابط
وانا بكل ألاطة اقعد وأحط رجل على رجل
عايز شويبس جولد بطعم الفواكة الاستوائية لو سمحت
والاقى الشويبس جايلى وكمان متلج
بعد كدة الظابط يصمم يخلى ادخل اتفرج على سيستم السجون الجديد ويلحف عليا طلاقين تلاتة لانا داخل اتفرج
الظابط : اتفرج حضرتك أدى أوض نوم  الارضيات باركية والسراير بنجدد تنجيدها كل 6 شهور والبطاطين جايبنها من الامارات وبص حضرتك دة تليفزيون ودش ووصلة انترنت فى كل جناح
بصراحة انا لما شوفت الزنزانة دى فكرت أقوله يأجرهالى ليلتين اجى اغير جو عندهم فقولته
ما شاء الله اية الجمال دة . وهو انتوا ما ينفعش تأجرولى زنزانة من دول ليلتين
رد الظابط : حضرتك معدش فى حاجة اسمها زنزانة دى بقى اسمها سويت
انا باستغراب واستبهلال بعد مالقيتش ولا مسجون قلت له – طب امال المساجين راحت فين ؟؟
رد الظابط : تقصد النزلاء .حضرتك النهاردة الخميس وانت عارف دة العيد القومى فالمساجين بتاخد اجازة خميس وجمعه ويسملوا نفسهم السبت الصبح
كنت هعيط لما سمعت الكلام دة لولا ان الظابط كمل كلامة وقال
اتفضل حضرتك شوف النادى الرياضى للنزلاء قلت لاء أبوس ايدك رجعنى للعصر بتاعى
عصر الحرية والديموقراطية – عصر حبيب ونظيف وشريف وسرور وجمال وعز ومبارك
اه اه قلبى قلبى
وأغشى علي فى الحال ونقلونى الى المستشفى
اول مافوقت – لقيت الاوضة اللى انا فيها لونها ابيض فابيض
قلت أه شكلى مت ودى الجنة
ودخل عليا حور عين لابسين ابيض فابيض
قالولى حمدا على سلامة حضرتك
انا مسبهل مش عارف ارد
(بابا ) وزير الصحة عايز يدخل يطمن على صحتك ووزير الداخلية لما عرف ان حضرتك تعبت فى القسم صمم يجي ياخد أقوال حضرتك ليكون فيه حاجة مش عاجباك فى سيستم القسم

وأخذت الممرضة تنادى على الوزير وتقوله
يابابا
بابا
يبابا

وهنا صحيت من النوم لقيت (على ) بيشدنى من هدومى وبيقولى قوم يابابا



weather counter