الاثنين، 30 مايو، 2011

انا لسه بريك



الناس اللى سخنت وماستحملتش البريك .ورجعت تانى تتكلم 
وتتناقش وتتخانق بعد المليونية
أو جمعة الغضب الثانية أو بعد ثورة الثورة أو بعد ثورة التصحيح 

أعتذر وأقولهم يا أخونا أن لسه بريك

أستغليت فترة البريك دى وسافرت البلد .وهناك قابلت صاحبي الانتيم من أيام الاعدادية ثم الثانوية ثم الكيلة
ليبروا الفريق الكروى اللى انا كنت رأس حربته
وجلسنا نتذاكر أيام الشباب والصبا

هنا ذهلت لأننى فوجئت بأنى 15 سنه من عمرى . بأفراحها وأحزانها قد محيت تمام من ذاكرتى الحاضرة
وانتقلت الى ذاكرتى الغائبة اللى ما بتجيش على بالى خالص

جلسنا تذاكرنا ...الافراح والاحزان


تذكرنا الاستاذ ياسين – مدرس اللغه العربية
الذى عانى الأمرين من طلاب لا تنطفىء شعله مشاغبتهم – لقد تفوقنا على طلاب مدرسة المشاغبين
الاستاذ ياسين الذى يبلغ من العمر فوق ال خمسين
تذكرت عندما دخل الفصل وجمع قطع الطباشير فى يده وأخد يدون على السبوره النقاط والافكار التى سيتكلم فيها أثناء الحصه

وفجأة أنطلقت عاصفة ال " طوووووق أو تووووووك أو باااااق" طبعا مش هعرف أكتبها لأنى لو قعد أحاول أكتبها هعمل زى  أسماعيل ياسين فى مستشفى المجانين
هو صوت يشبه الصوت الذى  حاول اسماعيل يس أن يكتبه ولكن هذا الصوت ينتج عن طريق وضع الاصبع السبابه فى الفم بجوار الصدغ من الداخل مع غلق الفم ونزع الاصبع بسرعه " عموما اانا للسف ماكنتش بعرف اعمل الصوت أطلاقا فكنت بعمل أصوات تانيه – انا كنت محترف فى المكاكية – كنت بعمل كوكوكوكو وكأنى ديك شامورت فى ريعان شبابة "

المهم أنطلقت عاصفة ال " طوووووق أو تووووووك أو باااااق" العجيب أن الاستاذ ياسين من كتر ما عملنا فيه الحركة دى ما تأثرش ولا أتخضش ولا حاجة ولم يستدر الينا حتى ليرى من الفاعل لهذة الاصوات

ولكنها كانت حركة مكر ودهاء منه حتى نزداد ثم فجأ يلتفت لينظر من الفاعل ؟؟؟!!!!!!
لكن طبعا معرفش يقفش أى حد فينا

والكثر من المدرسين الغلابة غيره حاولوا ان يقفشوا أحدنا وهو متلبس بالجريمة ولكن لم يحدث ذلك
فمثلا الاستاذ حمدى " او حمدى شكن " او " حمدى فرخة " هذة أسماء شهرة له

حاول ان يصطاد فى الماء العكر ليعرف من الذى يخرج الصوت " طوووووق أو تووووووك أو باااااق" ده
فأختار أى طالب والسلام وأخرجة خارج الفصل " انت اللى عملت الصوت ده ...أخرج بره " طبعا مش هو

بعد شويه يتكرر الصوت
فيخرج واحد تانى – انت اللى عملت الصوت أخرج بره
ثم يتكرر الصوت – ويتكرر أخراج الاستاذ حمدى للطلاب واحد تلو الاخر
ولازال الصوت يحدث

والاستاذ مصطفى اللى حاول يستفزنا بعد فاصل من " طوووووق أو تووووووك أو باااااق " والمكاكيه
والنهيق – والنعير
فقال قولته الشهيره " مش معقول أبدأ أصوات الحيوانات دى دا الواحد بعد كده يدخلكوا ب تذكره "

      ولما أجمعنا على اننا كل واحد يحمل " مسبحه معه أثناء المدرسة" المهم انتشرت الفكرة فى كل الفصول
        لدرجة ان بعد كام يوم المدرسين تفاجئوا أن كل طلاب المدرسة ماسكين فأيديهم " سبح"

طبعا ذكريات كل هذة السنوات لن تحكى فى بوست ولكن هذا البوست فقط  للتذكير بأيام صبايا

HK2 for ever

الأحد، 22 مايو، 2011

خدلك بريك



السلام عليكم ورحمة الله وبركاته


خدلك بريك تلبيه لدعوه مستر ويكا زعيمنا المبجل
الى كل السادة المدونين انهم ياخدولهم بريك
ويريحو بقى شويه من وجع القلب اللى احنا فيه ده
بقالنا اربع شهور ومش عايز يخلص
لحد ما صوتنا راح وأيدينا وجعتنا من كتر الكتابة
والخوف والقلق والأحباط والتشكيك ف المجلس العسكرى
والتخويف من السلفيين
على حرب الكنائس
على استفتاء على أعلان دستورى
على مجلس الحوار الوطنى ...." كلمة أبيحه فى النص كدة تيييييت "
..من اعتصامات لأحتجاجات لأضرابات لأضطرابات
خلال اربعه أشهر جالى دعوات للأشتراك فى أكتر م 20 جروب سياسى على 30 صفحة
اللى عايز يعزل يحي الجمل
واللى قال ايه أئتلاف ضباط الشرطة ...
اللى عمالين يشتموا ف كل ضباط الشرطة
ماعدا المحروسين من العين اللى اشتركوا ف الجروب اللى نازلين من السما

مرورا ب صفحة ....... على صفحة....... ثم صفحة....................
......................................
يا عم الحج ................. يا سيدي ......................يا أسطى

ما تخدلك بريك

آه البريك أبو سفن أب وكيسين شيبسى عائلى وب 4 جنيه لب سوبر
وأضربلك شورت على فانله حمالات و ف البلكونة


أزأز وتف على اللى ماشى ف الشارع

هتفكر ف لحظة " ما " انك تروح الحمام روح ولا يهمك
وانتى معدى كدة ممكن تسمع كلام غريب فى التليفزيون

بص أعمل نفسك عبيط

الخميس، 19 مايو، 2011

عبر .............ميين قدك

فى العصر البائد كان كل الناس بتقول رأيها وبتعبر بكل حرية وطلاقة لكن مش بصوت عالى أوى 
ومش على الملأ
يعنى شفنا اللى بيعارض وبيقول رأيه بحرية كانت بتكون اخرته فين
أكيد اللى ما يعرفش ...سمع
واللى بيخاف .....يروح
واللى ما بيخافش
 عبر ......مين قدك
اللى بيخاف بقى كان بيعبر برضوا ....لكن بصوت واطى ...أو ف مكان ...
...".ما "
فى المراحيض العامه
***********************

 طبعا محدش كان يقدر يقول كدة من المعارضين الصرحاء أصحاب الاقلام المقرؤه والقنوات والمسموعه 
                                                          لكن ف الحمام ممكن نقول كده......

 أو حتى كده.............





ودى رسالة من شاب مصرى دمه حر بيحذر فيها كل فئات الشعب اللى دخلوا الحمام ده أو اللى هيدخلوه ف المستقبل
علشان الراجل يخلص ضميرة



 الراجل عايز يقول :
الشعب هيفضل ساكت واخرص لحد امتى؟؟
 لحد ما يوصل بينا الحال اننا نبقى زى فلسطين
اليهود والأمريكان مبارك باع لهم اكبر وأهم مؤسسه 
وأصبحوا يمتلكون ثلثى الارض المصرية
يمتلكون ويتحكمون وأحنا ساكتونعن حقنا مثل الشيطان الأخرص
لحد ما نصبح ضيوف على مصر غير مرفوعى الرأس
*********

ولما جه واحد من الانصار أياهم يقول " نعم لمبارك "
أترد عليه بكل حزم وقوه 



 الموضوع مش سياسة وبس لأ طبعا الموضوع شمل كل نواحى الحياه السياسية والاجتماعيه والرياضية
الحمام أو المراحيض العامه  تعد من افضل الاماكن لعرض الأفكار .......أفضل من المدونة دى
 لأن الحمام الناس بتزورة زى الرز كل يوم غصب عنها  ...
.لكن المدونة.... ببوس ايادى الناس علشان حد يدخل يقرالى بوست
ولا يسيبلى تعليق أفرح بيه العيال
***********
اغرب اللقطات اللى صورتها فى الحمام كانت اللقطة دى




وبعد كام يوم واحد مسحها وخلاها كده .....



حد هيقولى وأيه الغريب ف كده ..؟؟؟!!
الغريب أن حمام طويل عريض وبيدخلوا مئات الناس يقضوا حوائجهم
وما فيش واحد زملكاوى هان عليه يشيل " الاهلى " أو حتى " الدراويش " ويكتب " الزمالك" 
مع أن معروف أن " الزمالك " دة انسب ماكن ليها ......................الحمامات والمراحيض العامه





ملحوظة :  الصور أعلاه تم تصويرها بأستخدام أحدث تكنولوجيا تصوير ...."موبايلى الصينى"



















الخميس، 12 مايو، 2011

يلا نولع فيهم........نعم للفتنة الطائفية



بينما أنا أفكر فى فكره لصياغة بوست جاد يعنى بوست بتكلم فيه بجد لأن موضوع الفتنة الطائفية ده موضوع لا يحتمل المهاترات .فالواجب علينا أننا نكتب كما قال جراد جرايند فى روايه " هارد تايمز" وهو رافع حاجبيه الغليظين لأعلى ومبرق عيناه على الاخر
FACTS NOTHING BUT FACTS NO FANCY NO IMAGINATION

أتكعبلت فى نوت كاتبه أخونا الاستاذ " علاء أبو زيد " على الووول بتاعه على الفيس بوك . فبصراحة عجبنى جدا جدا جدا فستأذنت الراجل . والراجل جزاه الله خيرا طلع ذوق جدا جدا وقالى

النوت دي اعمل فيها اللي حضرتك عايزه
أنت صاحب ووووول " فيما معناه يعنى الوووول وووولك "
المهم دى النوت اللى تعتبر من الروائع فعلا
طويلة شويه معلش - ياريت اللى يتضرر من طولها ما يدعيش عليا أنا ....
*****************


في ليلة من الليالي علي 3 ونص الفجر كده لقيت أمن الدولة بيخبط علي باب البيت ..أبويا فتحله.. علاء فين ..ليه خير مين حضرتك؟؟..احنا أمن الدولة ..عن اذنك لو سمحت..الحقيقة أنا كنت بلبي نداء الطبيعة ..أبويا خبط عليا..علااااااااء اتنيل اطلع..أمن الدولة يا زفت.. المهم طلعت سلمت علي االظابط واللي معاه..فين أوضتك يا جميل ..هناك يا عمو.. بصلي بصة من طراز ليلتك سودة..رديت عليه ببصة من طراز جزاكم الله خيرا.. فتش الأوضة وأخد اللي فيه النصيب وقالي يلا يا أمور معانا عشان نركبك المراجيح.. بصيت لأبويا بصة من طراز متقطعش الحلاوة يا أبو علاء

نزلت ركبت عربية الأمن المركزي زي الشطور.. لبست الغماية .. و بدأت ليلة لاظوغلي بمقر وزارة الداخلية



تعالوا نتخطي بعد ما وصلنا ..تحقيق لغاية الساعة عشرة حداشر كده.. بس الحق لله كان تحقيق لطيف

:-)

نزلنا في معتقل كده دورين تحت الأرض

كنا حوالي عشر شباب

الراجل فتح باب الحجز من هنا ولقيتلك أول واحد في الطابور بيصرخ

لأأأأأأأأأأأأأأأأأأأأأأأأأأأأ أنتم فهمنا غلط والله ..احنا مش كده خاااااااااااااالص

أنا قلت بيني وبين نفسي الواد شاف حاجة لا سمح الله أول ما شال الغماية ولا ايه؟

شكلنا كده لبسنا الحلزونة يا أبو علاء



ببص لقيت ..بجد وبدون مبالغة ..واحد من جوة بيفتح باب الحجز ما شاء الله حاجة كده مترين طول وحاجة كده متر عرض ولحيته ما شاء الله محلقهاش من أيام الحضانة



دخلت الحجز لقيتلك حوالي 100 معتقل في مكان أد صالة بيتكم كده

دخلنا واحنا زي ما تقول كده مش فاهمين احنا فين ولا فيه ايه ولا ايه اللي بيحصل ومين دول ؟

شوية كده واستلطفتلي واحد من بتوع أبو مترين ومتر ده وقلتله هو لامؤاخذة في السؤال ؟أنا مش عايزك تاخده علي محمل شخصي.. بس هو مين حضراتكم؟؟؟

احنا ترانزيت

مش فاهم؟



احنا مجموعة من المساجين الإسلاميين متاخدين اشتباه أو علي ذمة قضايا ..توليفة من الجماعات الإسلامية

من سجن المرج والقطا والمزرعةوالفيوم والعقرب والوادي الجديد كده يعني

هنا ناس بقالها 15 سنة و25 و35 بس اطمن فيه برضه 3 سنين وخمس سنين.. ياااااااه لأ أنا كده اتطمنت فعلا:-)طب وحضرتك متاخد في ايه؟

قضية جهاد..بس ظلم والله

صاااااادق يا باشا والله ..من غير ما تحلف..سيماهم علي وجوههم

:-)



شويتين كده يا جدعان وقعدت مع واحد تاني قعد يحكيلي عن التعذيب اللي شافوه الأيام اللي فاتت لغاية لما وقف شعر راسي ...المهم وأنا بسمعه كان فيه واحد مش قادر أرفع عيني من عليه..الوحيد اللي ملامحه مختلفة ..اتلفت للراجل اللي كان موقف شعر راسي من شوية وقلتله..هو الأخ اللي هناك ده مين..قالي ده جورج



نعععععععععععععععععععععععععععععععم

ازاي يعني ..وأخونا جورج من جماعة ايه إن شاء الله

هههههههه..لا ده سوداني متاخد في تهمة تنصير وتهريب وكده يعني



وخلص الكلام

أنا بقي قعدت أتفرج علي العجب اللي قدامي ده ما أنا بصراحة مش فاهم

أول حاجة جت علي بالي ..أمن الدولة عايز يخلص علي الواد جورج ده.. قالك ننزله علي بتوع الترانزيت وهم يقوموا بالواجب

بس اللي أنا شايفه غير كده

جه وقت الغدا..اتنيلنا طفحنا..أستغفر الله العظيم.. الهم اللي جايبنهولنا

وبعد الأكل كده لقيتلك الشيخ أبو مترين ومتر ده بينادي علي جورج

فيه ايه بس يا أبو جورج..شكلك قاعد مضايق كده ليه

جورج : لامفيش حاجة

قول بس يا جورج ده احنا ولاد زنزانة واحدة.. اوعي تكون الجيرل فريند (بتعطيش الجيم وقلقلة الدال) سابتك في الظروف دي

فكلنا ضحكنا حتي جورج

أيوة كده يا عم فك..ده انت قاعدتك هتطول:-)

ما أنت لو تسمع الكلام يا جورج وتدخل في الإسلام هتتبسط

انما أنت مصمم علي اللي أنت فيه...أديك محبوس في الدنيا و هتتلسوع في الآخرة

:-)))

المهم قعدوا يهزروا وأنا في حالة ذهول

باصص زي العبيط مش فاهم ايه ده

ايه اللي بيحصل أنا مش فاااااااااااااهم

رفعت صوتي: مش الأخوة جهاد برضه

أمال ايه الموضوع ؟؟

واحد استلمني بقي وقعد يرسيني عالتيتة

وقالي سيبك من الكلام اللي أنت بتسمعه..أنا عارف انك اخوان ..كان فيه اتنين امبارح منكم معانا ولسة مطلعينهم قبل ما تيجوا

قلتله :بجد والله



قالي اه متقلقش..بس ده مش معناه انك مش هتتظبط ..لازم شوية شعلقة برضه علي حبة مراجيح

:-)

قلتلوا بس أنتم بتتعاملوا بأريحية مع جورج ليه..أنا مكنتش متخيل منكم كده

قالي أمال يعني نقوم نخلص عليه؟

بصيتله بصة من طراز :تقصد إن أنا عبيط

رد عليا ببصة من طراز :بالظبط كده

وقالي:المفروض ان احنا بنتعامل معاهم من منطلق انه أهل كتاب ..سيبك من مسلسل العائلة دلوقتي والارهاب والكباب وعيش معانا اللحظة

قلتله:بس ده متاخد في قضية تنصير

بصراحة الراجل مكنش ليه تعليق غير:وماله..ما احنا برضه بندعيهم لدينا

المهم ..انه من المستأمنين..أهل ذمة يعني

وقمنا صلينا الظهر..كل العنبر..وكاااااااااااااااااانت المفاجأة التانية

لأ أكيد جورج مقامش يصلي معانا.. مش أوي كده يعني

:-)))

كل العنبر قام صلي ما عدا واحد صلي لوحده

سبحان الله يا مؤمن ...العنبر ميت نفر يصلوا مع بعض اخوان علي جهاد علي جماعة اسلامية

إلا البني آدم ده



مقدرتش أمسك نفسي ..رحتله..هو حضرتك مصلتش معانا ليه..مردش عليا..عم الحاج..عم الشيخ..مردش علي الفاميليا برضه

دورت ضهري وعلي عمك أبو متر في مترين.. هو ايه حكاية الراجل ده..قالي لا سيبك منه ده تكفير وهجرة

مش فاهم..يعني ايه ؟

يعني بيكفر المجتمع كله وبيهجرالناس يعني بيعتزلهم علشان مينفعش يختلط بيهم

يعني احنا كفار

قالي اه

أهلاااااااااااااا

أهلا وسهلاااااااااااااااااااااااااااااااااااااا

زغردتي يا أم علاء

المهم علي آخر الليلة نطق واتكلم..أصلنا كنا قاعدين مش جايلنا نوم فقاعدين نسمع من كل واحد حكايته

لقيتلك عمنا بتاع التكفير والهجرة قام وصرخ فينا

مش عاااااااااااااااااااااااااااااااااااااااااااااااارف أنااااااااااااااااااااااااام

يا ليلة بيضة ..الراجل ده شكله هيقوم علينا بالسيف ..خدلك ساتر يا ابني

حاضر والله احنا آسفين..حقك علينا

المهم شوية كده ولقيناه قام يوضب شوية حاجات ليه كده فقربت وسألته ..كنت بس عايز أسأل حضرتك سؤال..هوحضرتك بتعاملنا كده ليه؟؟

بصلي وهو متجهم جدا وقالي عشان أنتم أهل بدعة وكفر

طب ما جورج كافر؟

لا بس جورج أهل كتاب إنما أنتم بتضللوا الناس بإسلامكم الغلط

إنما جورج طالما مرفعش علي المسلمين سلاح يبقي يأمن علي نفسه ...انما أنتم ولا حول ولا قوة إلا بالله

كفار ياباشا ..عارف والله

إلي هنا وينتهي مشهد أمن الدولة...................................................................................................................................

ورغم هزلية اللي حصل ولكنه حدث بالفعل ولم أبالغ



وعلشان كده أنا عندي شعور يقترب من اليقين أن ما يحدث ليس فتنة طائفية بل جهل طائفي

نعم هناك احتقان طائفي..احتقان شديد ..سببه الأكبر هم العامة..عامة المسلمين وعامة المسيحيين

اللي بتسخنهم أي كلمة وتقومهم أي إشاعة وبيشتغلهم أي حد

نعم تحدث مشكلات حقيقية مثل مشكلة وفاء قسطنطين وكاميليا شحاتة وعلي الطرف التاني محمد حجازي صاحب قضية التنصر الشهيرة





ولكن اذا تلكمت مع سائق تاكسي من قبل أوشباب جامعة أو زملاء في الدراسة..ستجد نسبة ليست قليلة بين المسلمين والمسيحيين علي السواء.. بيشتموا في بعض بدون ما تجد لذلك دافع ديني..مجرد تهكم غير مبرر..نعم قد تجد له مبرر بين فئات المثقفين من الطرفين.. زي موضوع الأسلحة في الكنايس..وعلي الطرف الآخر تجد مواضيع مثل خطف البنات المسيحيات واجبارهن علي الاسلام.. من الممكن أن يكون لهذا الدخان أصل من نار فعلا.. ولكنها قصص تتسم كلها بأنها تفتقد إلي الاحتكام للعدل القضائي

من هنا تبدأ المشكلة..

غياب الاحتكام للقضاء...غياب كان متعمدا أيام حكم ولاد اللامؤاخذة السنين اللي فاتت

أما اليوم وبعد هذه الثورة فلابد أن نلتجأ للقضاء وفقط



.................................................................................................................................................................................

لقد وقعوا في الفخ... نعم لقد وقع الجهلة.. عوام متعلمون من الطرفين ..ولكنهم جهلة



تلاقي شوية بلطجية من الطرفين ملهمش ملة ولادين يولعوا الدنيا



المهم مين يلبس..السلفيين

طب يعني المسيحيين معندهمش سلفيين

حاجة كده اسمها تنظيم الكنائس العالمي مثلا

مش فيه برضه ولا أنا غلطان

الاصرار علي محاولة تشويه الاسلاميين بأي ثمن في الاعلام المستقل لن يأتي بخير

التشويه ليس هو الحل

ما أردت قوله أن العامة لاتقرأ المصري اليوم واليوم السابع والشروق ومبيفتحش مصراوي ومعندهمش أكونت ومبيفتحش جروب خالد سعيد وميعرفش مين سليم العوا ولا طارق البشري ومبيحضرش ندوات ولا للاسلاميين ولا العلمانيين..انما عنده ثقة بنت ستين في سبعين في الاسلاميين

لذلك أقول أن محاولة استعداء الاسلاميين هي محاولة لاستجلاب نقمة العامة الجاهلة ..ليس لأن الإسلاميين ستحرض العامة

ولكن لأن العامة لن تري ذلك الاستعداء علي أنه للاسلاميين بل استعداء للاسلام

وهو ما سيزيد حالة الاحتقان لدي العامة



......................................................................................................وقبل أن أختم

كنت حاضرا ذات مرة ندوة في كلية سياسة واقتصاد للمستشار طارق البشري وكان موضوع المحاضرة حول الانتماء

ودوائر الانتماء..وطرح أحد الحضور خطورة أن يكون الانتماء الديني فوق الانتماء الوطني..وانتقد الدكتور طارق البشري هذا الرأي من منطلق أن الانتماء للوطن لا يغني للانتماء للدين بل الدين يزيد من النتماء للوطن ويحافظ عليه في الأزمات وأن سبب الفتن الطائفية ليس التمسك بالانتماء للدين ولكن له أسباب أخري .



هنا قفز إلي ذهني سؤال لم أجد إجابته إلا في هذه الأيام

لبنان؟؟؟ ... هذا البلد فيه طوائف دينية بعدد صوابع ايدينا العشرة ورغم كده لم تحدث فيه مهازل الفتنة الطائفية كما بمصر

اللهم إلا الحرب الأهلية والتي بعد دخولك علي هذا الرابط ستدرك أنها لم تكن في أي مرحلة من مراحلها طائفية.. ييجي 17 حرب أهلية ادخل بس اضرب عين كده

http://ar.wikipedia.org/wiki/%D8%A7%D9%84%D8%AD%D8%B1%D8%A8_%D8%A7%D9%84%D8%A3%D9%87%D9%84%D9%8A%D8%A9_%D8%A7%D9%84%D9%84%D8%A8%D9%86%D8%A7%D9%86%D9%8A%D8%A9

بل جميعها بين أحزاب سياسية تفرض سيطرتها الديموجرافية

في ظل غياب سلطة حاكمة في الدولة





سبب ما نحن فيه هو الجهل العميييييييييييق بالدين؟ وبالسياسة أيضا

هل تراني أصبت

لا أدري

اعتذار واجب:أشعر بأنني كتبت هذه النوت بطريقة الأفكار المتناثرة لدرجة ستشعرك في لحظة ما أن الفكرة تنقطع فجأة.. ولكني من هؤلاء الذين يكتبون نصف ما يدور في عقولهم ..وكذلك عذرا علي الاستفاضة وجزاكم الله خيرا

نقلا عن " ا/ علاء أبو زيد

.

الأربعاء، 11 مايو، 2011

مليونية ف ميدان التحرير 13 مايو

وصلنى 4 دعوات على الفيسبوك لحضور 4 مليونيات مختلفة كلها يوم الجمعه 13 مايو

مليونية دعم الانتفاضة الفلسطينية
ودى بينادوا بيها من كام شهر لاشعال انتفاضة فلسطينية جديدة يوم 15 مايو

مليونية الوحدة الوطنية
ودى ردا على أحداث أمبابه والفتنة الطائفية

مليونية " السلفى اللى بجد "
دى علشان نقول للناس اننا السلفيين مسلمين من واجبنا حماية الكنائس ولو حتى فيه يهود ف البلد هنحمى معابدهم لأن

و مليونية – او عملية تنظيف وتزين المنطقة
كل المليونات دى هتكون ف ميدان التحرير طبعا ماعدا المليونية الاخيرة دى

كدة المفروض ان هيبقى فيه 3 مليونيات ف الميدان وكل مليونيه مالهاش دعوه بالمليونيه التانيه
أو قد يكون فيه تعاون بين كل مليونيه من دول مع المليونيتين التانيين
يعنى لو الغدا ف مليونية من دى مكفاش ممكن نستلف رغيفين عيش ولا حاجة من المليونية اللى جانبنا بقى ماهو الجيران لبعضيها ..أقصد المليونيات لبعضيها
.... أو ممكن نستلف ميكروفون أو يافتتين تلاتة نتصور بيهم قدام الكاميرات ...المهم

اللى مش كويس بقى ان مليونية من دول تطلع خبيثة وتدس الدسائس لتوقيع المليونيتين التانيين ف بعض يعنى مليونيه نمامه موقعتيه كده
وهنا بقى تحصل مشكلة بين المليونيتين التانيين ويحصل ضرب طوب ومولوتوف بقى وتبقى مدعكه
ومليونيه " عدم محاكمة مبارك" تشمت فينا بقى ويقعدوا يقولوا " ولا يوم من أيامك يا ريس"
وتيجى ملوينيه رابعه تصلح بين المليونيتن دول وتسمى نفسها " مليونية الوحدة المليونية "


انا دلوقتى محتار أشترك فأنه مليونية بالظبط
يعنى مليونية " السلفى اللى بجد " بما انى سلفى فالمفروض أشارك علشان لو ماشركتش هبقى سلفى مش بجد وممكن السلفية يقيموا عليا الحد " غير قطع الودان "

أو مليونية دعم الانتفاضة الفلسطينية – ومين فينا مش عايز القدس يتحرر من دنس اليهود

طب أروح مليونية الوحدة الوطنية لأن دى الازمة الحالية ف مصر والبلد مولعه بين المسلمين والنصارى ؟؟

ولا أروح أنظف الشارع وأزينة وأهى النظافة من الايمان

ما هو لو أنا ماشركتش ف ولا مليونية من دول هيتهمونى يا أما انى مش سلفى بجد وهيقيموا عليا الحد " غير قطع الودان طبعا "
أو هيتهمونى أنى سبب الفتنة الطائفيه وأنى متجوز نصرانيه وأسلمت ومخبيها فى الدير بتاعى وبعذبها

أو هيتهمونى أنى ما بحبش القومية العربيه ومش غيور على المسجد الاقصى الاسير

ولو مانزلتش حملة النضافة أكيد هيقولوا انى مش وطنى وماتغيرتش بعد 25 يناير

انا ما بحبش حد يزايد على وطنيتى ...أنا هعترف علشان الكل يعرف أنى وطنى وانى مع ثورة يناير
وان مبارك لازم يتحاكم وان الوحدة الوطنية دى شىء مهم وان الصليب والهلال دول جزء لا يتجزأ

يا أخوانا أنا عندى مليونية تانية خالص يوم الجمعه اللى هو يوم ميلاد " على بن هيثم " ولدى
لاء لاء أنا مش هعمله مليونية علشان عيد ميلادة لاء لالالالا
انا عندى مليونية تانية خالص مليونية مليانة رمل وزلط وأسمنت وطوب وما بصدق يوم أجازتى أنجز شوية من المليونية دى فى "أبني بيتك " البيت الصغنون اللى بابنى فيه بقالى سنتين ومش عارف أخلص
ياريت يا أخونا تطلعوا وطنيين فعلا وتجيبوا كام مليونية وتيجوا تساعدونى فى مليونيتى
ربنا ما يزنؤكوا ف مليونية
هنشيل شوية رمل أعتبروها أعلام من اللى هتشيلوها فى التحرير
وشوية طوب ...بدل الطوب اللى هتحدفوا بيه بعض
وقال على رأى المثل مليونيتى ومليونيتك وأتفرقوا الميلونيات

الأحد، 8 مايو، 2011

فى الميكروباص " تاجر المخدرات"

بسم الله الرحمن الرحيم
فى الميكروباص
زى كل يوم صحيت متاخر كالعادة .. مالحقتش أتوبيس الشركة فتوجهت اللى محطة الميكروباص
وعلشان اروح الشركة محتاج اركب مواصلتين م السيدة لسيدنا الحسين على رأى عبد المطلب
وصلت عربية من ايام الاحتلال الانجليزى على مصر او يمكن من مخلفات الجيش الروسى
دائما فى الميكروباص تلاقى اتنين بيتناقشوا أو بيتخانوقوا أو بيتكلموا ف موضوع بطريقه تشد أنتباهك
وده اللى حصل معايا


أول مشهد
مكالمة تليفونية جت لواحد قاعد ف الكرسى الورانى خالص ...
انا مش شايفة بس سامع صوته بس وهو بيتكلم بصوت عالى جدا
بيكلم واحد صاحبه ف شغل بزينس حاجات كدة اللى شدنى أوى ف الكلام ان الراجل دة ما قلش جملة غير وفيها كلمة " دين "
يعنى مثلا بيقوله " انا صلحت دين أمها " وصرفت على دين أمها كل المصاريف دى عالفاضى "
يعم دين ام الشغلانة دى عليا بخسارة
يووووه دى طلعت دينى على ما خلصتها

بعد ما خلص المقطع اللى فات دة اللى دخل ف كل جملة كلمة " دين" وصوته كان بيزلزل العربية
لقيته راح موطى صوته على الاخر علشان يوشوش صاحبه......
لكن الصوت الواطى بتاع الراجل يكفى انه يسمع ميكروباصين تلاتة – أعلى من صوتى لما بكون بزعق

لاقيناه بيقول لصاحبه ايه بقى ......
يعم انا عايز الفلوس دى هشترى بيها ..... هشترى بيها ......." وراح موطى صوتة اكتر "
هشترى بيها " دخان"

طبعا كلمة دخان دى لو اتقالت عادى جدا بصوتة العادى كلنا هنفهم أن المقصود " السجاير أو المعسل " لكن توطية صوتة دى يعنى المقصود بالدخان " مخدرات " دى اول حاجة بدرت الى ذهنى الى ان دخل الحوار على الصفقة ..... او البضاعه زى ما هة مشهور ف الافلام الابيض وأسود


يبنى انا أخدت الفلوس وقلتله هاتلى " بتاع "
عارف لقتيت " البتاع " بكام ب 1200 جنية


انا قعدت أدور وأفكر بتاع ايه بتاع الدخان اللى ب 1200 جنية ....... ممكن يكون شوال بانجو مثلا
أو فرش حشيش .... أو .........أو بتاع ..مش هنختلف المهم راح الراجل مكمل كلامه

بص انا لقيت السعر كدة غالى أوى فرحت سألت عليه الناس هنا
لقيت ال " بتاع " وهو بيقول البتاع زى ما يكون بيغمزله بعنيه " البتاع ...ها اللى بالى بالك ... البتاااااع"

لقيت ب 500 او 550 لحد هنا كمان

" ديليفرى يعنى"

لكن ب 1200 .. أمال هبيعه انا ازاى

خلاص كدة انا أتأكدت ان الراجل دة تاجر مخدرات وقعدت أرسملة صورة فبالى
لابس جلابيه وبشنب ومضروب مطوتين تلاتة ف وشه ... لكن قاطعنى الراجل وانا برسملة صورة فخيالى
بكلام صريح جدا جدا جدا ... ويعتبر اتراف تام مرسل كل حاجة يعنى


يعم افهم البتاع ب 1200 دة مش بانجو بس لا دة بيبقى مخلوط بالبتاع التانى اللى اسم الماريجونا دة
لكن ابو 550 دة بانجو وهيوصلهولك لحد عندك

بعد الكلميتن دول ما أتقالوا لقيت كل واحد راكب ف العربية أتهز كدة كأنه سمع كلمة أبيحة " مع ان الكلام من أول المكلامة باين من دخانه... لكن الكلام الصريح دايما بيوجع

كمل الراجل كلامه

المهم هشوف انا حالى وابقى أكلمك ..... على جنب يأسطى

قلت انا بقى دى فرصه حلوة أوى انى أشوف فيها تاجر مخدرات بيشتغل "بالبتاع " يعنى تاجر كبير أوى

لقيت كل العربيه بتفكر نفس تفكيرى ونفسهم يتعرفوا لأول مرة على تاجر مخدرات كل بيبص على وش المجرم البلطجى القتال قتله اللى ماعندوش قلب ولا ضمير وهو نازل

لقينا حته عيل لابس بنطلون جينز وتى شيرت شكله عندم مثلا 23 او 25 سنه مسرح شعرة محترم " كدة اتغيرت فكرتى تماما عن تجار المخدرات .... وأتأكدت انهم فى الافلام الابيض والاسود كانوا بيضحكوا علينا"

تاجر المخدرات راح نازل وساب باب العربية مفتوح على مصراعيه وراح ماشى ولا كانه عمل حاجة
وهنا موقف السواق المتناقض
كان كل ما واحد ينزل أو يركب يقوله أقفل الباب كويس يا أستاذ ... لكن لما صاحبنا دة نزل وساب الباب مفتوح على الاخر راح السواق قايل لأاحد الركاب
معلش يا استاذ ممكن تقفل انت الباب

الاثنين، 2 مايو، 2011

دخل فى غيبوبة قبل 25 يناير ولسه فايق حالا " جزء 2"

يوم الاستفتاء
بعد كام يوم أفاق محمود من الغيبوبة التى عاودت اليه بعد أول يوم أصتدم فيه بالتغيير الذى حدث ف مصر
وكالعادة وكما طلب الدكتور عدم واجهته بما حدث للبلاد
وتركه يتعامل خطوة خطوة الى ان يتعايش مع الوضع الجديد
كان اليوم هو يوم الجمعه 18 مارس والغد هو يوم الاستفتاء على تعديلات الدستور
أفاق محمود ف أخر النهار ...... وسمع صوت ضجيج وعراك فى الغرفة المجاورة له
فخرج الى الغرفة فوجد أخاه كريم يتجادل مع والده بصوت عالى
كريم : انا هقول " لاء" مش عايزين ترقيع لحد امتى هنفضل نرقع ف البلد
الاب : يبنى "نعم" هتخلى عجله الحياه تمشى انتوا عايزين نخربوا البلد وحالها يفضل واقف
كريم : بص انا نازل الاستفتاء وكل أصحابى وكل الاحزاب وكل القوى السياسية وورونا بقى الاخوان المسلمون هيعملوا ايه همه بس اللى بيقولوا نعم
محمود: ....... هو فيه انتخابات ولا ايه يا كريم؟؟؟
كريم : لا يا سيدى دة الاستفتاء على الدستور
محمود: دستور ايه؟
كريم : تعديلات الدستور يا محمود .... بص ما تشغلش بالك انت وخليك بكرة ف البيت ما تخرجش
محمود: طبعا مش هخرج ولا استفتاء ولا دستور .....معروف طبعا اللى الريس عايزة والحكومة يتعمل هيتعمل

كريم محاولا انهاء الحوار حتى لا يصدم محمود بالواقع : لا لا معدش زى الاول هيبقى فيه اشراف قضائى على الانتخابات ..... المهم بس انت استريح وما تشغلش بالك
محمود: يبنى واللى هيقول "لاء" دة أمن الدوله هيجيبوهم واحد واحد انت فاكرهم نايمين ولا ايه ؟؟
كريم : أمن الدولة .........دا كان زمااااان ......دلوقت مصر أتحررت
الاب : محمود انت تيجى معايا بكرة نروح نصوت ونقول " نعم " وسيبك من أخوك ده
محمود: ريح نفسك يا كريم وقول " نعم" وخلاص يا سيدى بلاش تمشى ولا الاحزاب المعارضة والاخوان المسلمون دول
كريم : يا عم دا الاخوان همه اللى هيقولوا " نعم" همه والحزب الوطنى
محمود: هو الاخوان انضموا للحزب الوطنى .......ازاى دول طول عمرهم مش طايقين بعض ؟؟؟!!!!
كريم : لا يا سيدى الاخوان شايفين ان التعديلات دى هتسمحلهم انهم يرشحوا من الاخوان رئيس فى انتخابات الرئاسة بكل سهوله – وف نفس الوقت هيكسبوا الاغلبيه ف البرلمان لانهم الجماعه الوحيدة المستعدة للانتخابات
بعد ما الحزب الوطنى اتدمر واتفضح
الاب" وهو يذغد كريم فى ركبته" : مانضموش ولا حاجة يا محمود الاخوان شايفين ان ده الصح ولو قلنا " لا" هنعطل مسيرة البلد واحنا بنمر بفتره عصيبه عايزين ننجز علشان انتخابات الرئاسة تتم والجيش يسلم السلطة

محمود تعادوده أثار الغيبوبة ويشعر بألم شديد فى رأسه ودوران وهو يقول : أخوان ايه اللى هياخدوا أغلبيه
وسلطة ايه اللى هتتسلم

أفاق محمود من الغيبوبة مرة أخرى يوم السبت 19 مارس بعد انتهاء الاستفتاء
وحاول أهل بيته عدم فتح اى نقاشات أمامه حتى لا تتكرر الغيبوبه
جلس الجميع يشاهد التليفاز
فاذا بأحد القنوات تزيع خطبة لأحد مشايخ السلفية
حتى جائت اللحظة التى أعلنت فيها نتيجة الاستفتاء
والتى قال فيها الشيخ " موقعه ذات الصناديق" وان الدوله هتبقى اسلاميه زى ما الشعب عايز وأخذ يكبر ويهلل

لم يتناقش محمود مع أحد ولكنه خر مغشيا عليه ف الحال !!!!!!!!!!!!!!!!!

أخذ أفراد العائلة يتناقشون فى حالة محمود واجمعوا الرأى انه يصموه مره واحدة خير لهم من أن يصدم كل يوم بصدمة فأتفقوا على سرد ما حدث ف البلد خلال فترة غيبوبه محمود
فلما أفاق محمود بعد عده أيام
جلس كل أفراد العائله حول السرير وأخذوا جميعا يتهتهوت ولتلعثمون ...من أين يبدأون !!!
كريم " متلعثما" : بص يا محمود ....صلى على النبي.... وعليه الصلاه والسلام
طبعا انت عارف ايه اللى حصل ف تونس وان الريس اتخلع والحوارات دى
محمود : بص يا كريم انا حاسس ان فيه حاجة انتوا مخبينها عليا .... ياريت تصارحونى بيها
الاب : محمود يا بنى انت عملت حادثة ودخلت بعدها ف غيبوبه طوييله أوى
مصر حصل فيها حاجات كتيييييره أوى خلال الفترة دى

محمود: فعلا انا لما نزلت الشارع امبارح " متوهم... لانه نزل الشارع من شهر تقريبا" لقيت حاجاة غريبه بتحصل ف الشارع ولقيت دبابات وعساكر
كريم :بص ياباابا انا هقول كل حاجة واللى يحصل يحصل
هو كل اللى حصل يا محمود ان الجيش هو اللى ماسك البلد دلوقتى بعد ما مبارك أتنحى
والداخليه والشرطه هربوا وأمن الدوله أنحل
والوزراء اللى سرقوا البلد وأحمد عز ف السجن وكل المساجين والمعتقلين خرجوا من السجون
ومبارك اتجمدت أرصدة فلوسة وهيتحاكم قريب هو وابنه
واتعمل تعديل ف الدستور علشان أى حد يعرف يترشح للرئاسة
محمود يضحك ضحكة هستيريه: ههههههههههههههههههههههههههههه هوهوهوهوهو هي هي هي هي
ويخر مغشيا عليه ف الحال

30 مارس 2011