الثلاثاء، 26 يوليو، 2011

شوارع بلا حفر ولا نقر



كانت أجازة 23 يوليو فرصه عظيمة لعمل بريك بعد فترة من الروتين الممل فى كل نواحى الحياه
أهم ما فى البريك هو السفر وترك مكان الحياه التقليدى طوال الطريق أفكر .... كيف نسموا ونرتقى ببلدنا وتنتهى فترة التتطهير هذة وتأتى فترة البناء والتشييد

...تكلمنا كثيرا جدا وملت أيدينا من الكتابه على الكى بورد من أفكار وتخوفات وتطلعات
وأمتلأت الميادين من المطالبين والمتظاهرين وزخرفت اللافتات بالمطالب
وعلت الاصوات بالهتافات نريد كذا ونطالب بكذا وكذا

أجتمعت الامه على هدف واحد ألا وهو " مصر بكرة أحلى"
تمنينا الأمانى ورسمنا الصور كيف ستكون بلدنا أو كيف نريد بلدنا . فتخيلناها جنه أرضها الؤلؤ ..وجدرانها الياقوت المرجان ..وريحها المسك والعنبر ..أشجارها تصل الى السماء... ثمارها وأزهارها وشوارعها وميادينها وربيعها وخريفيها وشتائها وصيفها .
يمشى بين أرجائها أناس كالملائكة يسبحون , ويطوفون لا يتذمرون ولا يتعكرون ولا يمرضون ولا يموتون , يأكلون ويشربون ما يشتهون .
ويتعلمون .... ويعلمون .....ويحلمون ...ويرتقون ....ويفكرون....ويطبقون.......و​يتقدمون .....ويسودون .

أخوانى دعونا قليلا من هذا الكى بورد فلن يصلح شيئا .... وتلك اللافتات لن تغيرنا

" أقصد اللافتات الخاصة بتغيير سلوك الشعب وليس لافتات الضغط على المجلس العسكرى والحكومه"

فهذا الكى بورد لن يغير شيئا وتلك اللافتات لن تغير سلوكنا والامانى وحدها لن تكفينا

قاطعتنى أثناء هذا التفكير حفره فى الطريق الصحراوى
" طريق صحراوى يعنى طريق سريع أى أن سرعات القياده تصل الى أقصاها فى تلك الطرق "

لم تكن حفرة واحدة أو حفرتين ولكنها حفر كثيرة تركت التفكير والاحلام التى كنت أحلم بها . وأخذت أركز فى الحفر الكبيره والصغيرة والمنخفضه والبارزة .
ماذا على أن أفعل ؟؟؟... أحصى عدد هذة الحفر ؟؟ وما الفائدة ؟؟
حتى أقول أنى عددت الحفر على طريق مصر الاسماعيليه الصحراوى ووجدها 20000 حفرة
وأخرج بلافته وارفعها وأزيد المطالب مطلبا ؟؟ !!! أو أكتبها بالكى بورد على صفحات الفيس بوك ؟؟!!
ما الجديد أذن !!!! أهكذا يكون التغيير ؟؟

الى أن اهتديت لعمل حملة للذين يتأذون من النقر والحفر على الطرق السريعة
حملة للمسلمين لتطبيق سنة من سنن الاسلام " أماطة الاذى عن الطريق"
حملة للجميع من المؤمنين بأن " بأيدينا مصر بكرة أحلى " 


فليكن عنوان الحملة " طرق بلا حفر ولا نقر "
وشعارها " أماطه الاذى عن الطريق صدقة"
وهدفها " سد كل الحفر والنقر بكل طرق مصر "
أستعنت بالله ... والله الموفق
انتهى

مطلوب المشاركه بوضع تصورات لأليات العمل .طبعا وتحفيز وتشجيع ومشاركة
البوست القادم عن أليات العمل أن شاء الله

الأربعاء، 20 يوليو، 2011

صيدلانيه طالعه نازله







ظهرت نتيجة الثانوية العامه وانطوت صفحه من العناء خلال عاميين كاملين من دروس ومذاكره وتوتر وامتحانات وقلق الى توتر وقلق جديد من مكاتب التنسيق والمفاضله بين الكليات والمعاهد
لذلك قررت أن أعطى خبرتى الى أولياء الأمور والى الطلاب المقبلين على مكاتب التنسيق

فعندما أذكر مكاتب التنسيق أحيانا تصيبنى نوبه من الضحك الهستيرى لتذكر
...ى نفسى من أكثر من 10 سنوات
عندما كنت أنتظر نتيجة التنسيق بعد سنوات من الكد والتعب والنصب واذا بى أخرج مسرعا لشراء الطابعه الاولى من جريدة الغد التى تظهر فيها نتيجة التنسيق وعندما قرأت العنوان الرئيسى فى الصفحة الاولى لجريدة الجمهوريه الساعه كانت الثانيه عشر منتصف الليل اذا بى تصيبنى تلك النوبه الهيستيريه . حيث أن الراجل اللى وضع التنسيق والحد الادنى للقبول بكليه الهندسه وكأنه كان يعرفنى شخصيا أو بينى وبينه تار بايت
اذن ما الدافع الذى يجعل هذا الشخص يضع الحد الادنى للقبول بكليه الهندسه أكبر من مجموعى ب 0.1 % أو بلغه أخرى ب 0.5 درجة من 400 - نصف درجة التى تساوى من المجموع الكلى هذا الرقم 0.00125 من 1 صحيح , هذا الرقم منعنى من دخول كليه الهندسة ....

ماهو يا أما الراجل بتاع التنسيق مش طايقنى أو واحد من اللى كانوا بيصححولى أكل عليا 0.00125 من درجاتى ....يمكن نسيت أكتب همزة أو خطى معجبوش فى النهايه تعلمت من هذا الموقف درسين
الاول أن هناك رب لهذا الكون وقد سخر كل شىء بقدر فما من حبه تسقط من السماء ألا بأمره جل وعلا
والثانى أن الدنيا فانيه وف الاخر كله محصل بعضه والتعليم عندنا ف الكلتش والامتحانات والثانويه دى حاجة بيلهوا بيها العيال وأهاليهم

نصيحتى بقى للطلبه وأواولياء الامور
بعد قرائه هذة الموضوعات الاربعه
الموضوع الاول
 الموضوع الثانى
الموضوع الثالث
الموضوع الرابع
يا أيها الطلبه المتوفوقين : عليكم بكليه الصيدله ..
ويا أولياء الامور المبسوطين : عليكم بكليه الصيدله الخاصه لأبنائكم - مش مشكله 100 ألف جنيه هيرجعولكوا بزيادة أن شاء الله . فكك بقى من الطب ووجع القلب تطلع من سبع سنين دراسه وطلعان روح
وبعدين تترمى ف أى مستشفى وحلنى بقى على ما تفتحلك عياده وشوف مين هيعبر دكتور عنده 30 سنه
الناس بتحب الدكاتره العواجيز بيقولك عندهم خبره كده الدكتور منهم يحط ايده فى بؤ العيان يعرف هو أكل ايه وحش .......لأن العيان هيرجع ف وشه على طول

لكن الصيدله .. خمس سنين وأطلع أفتحلك صيدليتين أو خلى حد يفتحهملك بأسمك ويجيلك مرتبك وانت قاعد فى البيت وأديك شايف الاربع موضوعات اللى فوق دول الناس بكل درجاتها مش هتبطل تاخد علاج

تبدأ ب أدويه علشان شهر العسل ثم أدويه علشان الحمل أتأخر وبعيدن أدويه علشان مبروك المدام حامل
وبعدين أدويه علشان المدام ولدت وادويه للنونو وبعدين أدويه للبيبى وبعدين ادويه للواد. يكبر الواد ويبدأ يتعاطى مخدرات ومكيفات وقراقيش وبعدين يتجوز..وبعد شويه يخسع ويبدأ يتعاطى منشطات للسعاده الزوجيه ...وبعيدن هيجيله الضغط من مراته وعياله هيبدأ يتعاطى أدويه للضغط والسكر أو يرجع تانى للمخدرات أذا كان بطلها أساسا

لذلك عزيزى الطالب فأن الصيدليه بالنسبه للشعب أصبحت تماما كسوبر ماركت لابد من زيارة يوميه لشراء ما لذ وطاب

انتهى

فى هذة اللحظة قررت أن أغير عنوان البوست من " الثانويه العامه" الى " صيدلانيه طالعه نازله"
مع الاعتذار لصاحبه هذا الاسم المسجل

الاثنين، 18 يوليو، 2011

عامل دماغ 3




عامل دماغ 1
عامل دماغ 2
*******
عامل دماغ 3

عدت الايام على خير ولله الحمد وربنا أتم شفائى
  لكن الموضوع  اخد كتير من تفكيرى مما جعلنى أحاول دائما الجلوس مع اصحابى المبرشيماتيه أو الضرريبه أو المقرقشتيه
علشان أفهم همه عايشين ازاى وليه بتعاطوا الحاجات دى اى بمعنى أخر
ماهى الدوافع وماهى الاسباب وماهى النتائج وماهى السلبيات وهل الموضوع فعلا أصبح أدمان حقيقى
   مش عارف ليه الناس بتحب تتفشخر بالحاجات دى وأنهم كان معاهم كميات رهيبه وفى السنه الفلانيه ضربله كام شريط وأنهم كانوا بيتاجروا وأنهم وانهم وانهم .....
ما هو داعى الفشخرة?? انا مش عارف 
المهم قعدت أدردش مع صاحبي المبرشماتى ده بعد فاصل من الفشخره بأنه ضرييب وعمل وسوى
أنا :  أنت ليه بتتعاطى الحاجات دى ؟؟
  المبرشماتى  : يا هندسه الحاجات دى أنا با خدها علشان حاجتين لما بكون جاى الشغل وجسمى متكسر بأخدلى ربع حبايه وأقعد أشتغل فى المصنع زى الحمار ولا أحس بأى تعب  وساعات باخدها علشان أبسط نفسى
  أنا : تبسط نفسك يعنى ايه بالظبط ؟
المبرشماتى : أبسط نفسى يا هندسه ... وغمزلى غمزتين بعنيه كده يعنى يقصد حاجه عيب
أنا : طب ماتبسط نفسك من غير مخدرات
المبرشماتى : يا هندسه دى مسكنات مش مخدرات
  أنا :يعم الحج دى مخدرات مع الوقت هتلاقى نفسك مش عارف تبطلها لأنك هتتعود انك تشتغل ف المصنع أو ف البيت وانت ضارب فلو جيت تشتغل طبيعى أكيد مش هتتبسط لا هنا ولا هناك
المبرشماتى : يا ريس أنا ما بخدش أكتر من ربع حبايه يعنى ممكن الحبايه تقعد معايا اسبوع فيه ناس بتضرب فى اليوم حبتين تلاته  وبعدين أنا باخدها لو لقيت نفسى تعبان فى الشغل أو فى المناسبات..... ساعات الانبساط فى الاعياد والمواسم 
أنا : أتبسط أتبسط أتبسيط ...........فيه ايه يبنى هو أنت مريض مثلا ...لو تعبان ومابتتبسطش طبيعى روح أكشف
المبرشماتى : انا طبيعى وزى الفل والحمد لله لكن فيه مناسبات أنا بحب يبقى فيها شغل عالى أكتر من العادى
  أنا : يعنى طفاسه
المبرشماتى بعد ما رديتله على كل حججه  : أيوووه هيه طفاسه والله أنا عارف

  أنا : طيب خلاص دى وعرفناها طب أنت بتشرب حشيش وبانجو ليه؟؟ مالهاش دعوه الحاجات دى بالطفاسه ..أظن يعنى
المبرشماتى : يا هندسه كله فى الاخر بيصب فى الطفاسه الحشيش والبانجو نفس مفعول المسكنات وبيتشربوا بردوا علشان الطفاسه

  أفتكرت واحد صاحبي مبرشماتى تانى كان أخوة بيتجوز فقفشناه فى أوضه نوم أخوه بيخبيله حاجه  لفه ورق كده فى الدولاب – أخدناها و بنفتحها لقيناها بانجو فبنعتب على الولد ده  أنت أزاى تجيب لأخوك حاجة زى دى فى ليله جوازة  رد وقال : أنتوا مش عارفين اى حاجه ده هي دى بقى اللى هتظبط المسائل أنا كده بعمل معاه الصح

   فى النهايه أحب أن أختم بقول المولى جل وعلا – ولا تلقوا بأيدكم الى التهلكة – فهذا الذى يبحث عن الانبساط الزائد بتناوله تلك الحبوب أو الدخان وهو لازال فى مقتبل عمره لم يتجاوز الثلاثين  فقد تجتمع التأثيرات الضارة لهذه المواد المخدرة التى أدمنها والتى تظهر أضرارها بعد فترات فى صورة أدمان أو فشل كلوى أو كبدى  نسأل الله أن يعفو عن كل مذنب وأن يتوب علينا  وأن يجنبنا الفتن ما ظهر منها وما بطن وأن يحفظ شباب المسلمين

  انتهى

الثلاثاء، 12 يوليو، 2011

ميلاد مدونه جديده

السلام عليكم ورحمة الله وبركاته 
لاقتراب الشهر المعظم - اللهم بلغنا رمضان-  الذى تسمو فيه الروحانيات والايمانيات
أسأل الله أن يرزقنى الاخلاص فى القول والعمل
وأقدم لكم مدونتى القديمه " روحانيات "
بعد نقلها الى الدومين bloggers
نسأل الله ان يجعل ما يكتب فيها فى ميزان حسنات الكاتب والقارىء
والله الموفق


رابط المدونة:
http://ro7aneyat.blogspot.com/

الجمعة، 8 يوليو، 2011

قبل ان تكسكس الثورة الى الخلف



انا ليه منشكح بجمعه 8 يوليو دى
بصراحه انا كنت فقدت الامل اننا نتجمع تانى على كلمه واحدة .
بعد الثورة بوسنا الايادى ..احذروا الثورة المضاده
و انتظر من فضلك الثورة ترجع اللى الخلف
شى حااااا  هووب حاسب   الثورة بتكسكس ل وره

لكن طبعا الكل سكمن بكمن
والله دى بلدنا..... ايوه احنا الشعب ..
لا احنا نخبه... ولا احنا اخوان.... ولا احنا مجلس شورى علماء السلفية .
وعمرنا ما طلعنا فى التوك شو

دى بلدنا مش عايزين فيها مجازر ولا خناقات ....
مش عايزنها جزائر التسعينات
ولا ليبيا ولا سوريا
اختلفوا مع بعض ..ده العادى....لكن اختلفوا بتمدن تحضر
عجبني جدا د/ عمرو حمزاوى  ....ربنا يهدينا ويهديه . رغم انه ليبرالى وساعات بيقول كلام يودى ف داهه الا نه عجني لما قال
انا كنت من المطالبين بالدستور اولا لكن بعد الاستفتاء لا يجوز لى الكلام فى هذا الموضع لانها ارادة الاغلبية

غير كدة الكل بقى يخبط ف الكل وانتشر سوس الثوة المضادة حتى ظننت ان خلاص الثورة كسكست ل وره
وحلمنا ان بكره احلي............ضاع

النخبه ركبوا على التوك شو وشغالييين زن ع الودان
الاخوان وحزبهم  قعدين يخططوا ويدبرا وكل ما يتعرض عليهم النزول ف مليونية يتهربوا ويرجعوا بكل كبر وعنطظه يبرروا
ما خلاص بقت بلدهم.........
لدرجة ان انتيمى اللى من الاخوان ..كيمو انتيمو - بيقولى على الفيس بوك-  انه طالع رحلة مع الاخوان  -
قلت لو ينفع غير الاخوان يطلعوا معاكو .عرفنى وانا اطلع معاك......الراجل ولا عبرنى ولا حتى رد بكلمه لا .......التمس له 70 عذر
مش كيمو بس ....لا كل الاخوان اللى كلمونى باساليب فيها تكبر ..التمس لهم 70 عذر

لكن لله الحمد على الاتحاد وان شاء الله نكون كلنا ايد واحدة ونفهم ازاى مانتكعبلش ف الثورة المضادة
انا نازل بكرة .... وانا منشكح .... وعندى شوية قلق ليحصل حاجة غير متوقعه تبوظ الوحدة دى
اللهم وحد شملنا ووفقا الى ما فيه الصلاح فى الدنيا والاخرة

السبت، 2 يوليو، 2011

انا عامل دماغ 2






بعد التجربه الاولى كنت واخد الموضوع على انه فضول عايز أجرب الحاجات دى
كنت عايز أعرف هل فعلا الحاجات دى بتذهب العقل ولا بتسطل .وازى بيكون الواحد مسطول
الشعور ذاته كان عندى فضول شديد انى أعرفه. كنت فى حاجة الى التجربه لدوافع عديدة
لكن بعد أن انتهت التجربه واستمعت بهذا الشعور اللى حكيت عنه فى البوست الاول
وبعد كام يوم انتهى تأثير المسائل على دماغى ..و.بما أنى دماغى لسه جديدة فاستغرق تأثير المسائل حوالى 3 أيام بعدها بدأت أشعر بأحساس أخرجديد جدا بالنسبالى
بدأت أشعر بتوتر شديد لدرجة انى كنت أنفعل على أقل شىء مما جعلنى خلال اليومين الماضيين أتعدى بالضرب على صغيري
" على بن هيثم" بالضرب عده مرات على حاجات كانت بالنسبالى قبل كده  " عادى"
تذكرت الدماغ اللى كنت عاملها وأزاى كنت أشعر بهدؤ أعصاب لا مثيل له
راودتنى نفسى بأخذ جرعه جديدة من المسائل للتخلص من حاله التوتر الشديدة التى أعيشها دافعت نفسى مرة  ومرات
ماذا سأفعل ؟؟!!
لابد وأن أخرج من هذا المود السىء ..والحل هو تلك الحبايه الصغيره التى ستخرجنى من عالم البؤس والتوتر والنرفزة الى عالم الهدوووووووووووووووؤ والروقان
الحباااااايييييييييييييييييييييييييييااااااااااااااه................ الحبايه
ايه ده ؟؟؟
أنا بقيت مدمن خلاص ؟؟!!!!
مش قادر أستغنى عن الحبايه ؟؟
أول مرة باعوهالى ببلاش .....لكن لما هروح أشتريها هيطلعوا عين أهلى وهيدفعونى دم قلبى
مش مشكله الفلوس المهم انى أرجع للدماغ الرايقة
خدوا كل اللى معايا ...مش مهم أكل ...مش مهم ..مش مهم
مش مهم " على " هوديه ملجأ.... وهبعت أمه عند أبوها
وهسيب شغلى .....وهسرق علشان أشترى الحبايه
وفى الاخر أكيد هنتحر ...........
.
..أبوس أيديكم هاتولى الحبايه .