الأربعاء، 30 نوفمبر، 2011

ما لنا ... وما علينا




الأخوة الاسلاميون
" حريه وعداله - وسط- نور- أصاله - الدعوه السلفيه - الاخوان المسلمون ....الخ الخ "
اعلموا أن منافسيكم فى الانتخابات من باقى الاحزاب هم مصريون مثلهم مثلكم مسلمون مثلهم مثلكم
كانوا بالامس يصلون بجواركم فى المساجد و كنتم تنامون فى مخيم واحد فى الميدان وتتقاسمون وجبات الكنتاكى والخمسين دولار

الفائز فى الانتخابات عليه أن يحمد الله ومن ثم يستعد لحمل المسؤلية التى القيت على عاتقه
والخاسر عليه ان يقبل بالنتيجة ويستعد ليكون ناصحا ناقدا - وليكن شعارنا - مش هنفوت لحد غلطة

 اخوانى الاسلاميون أحتضنوا اخوانكم من الليبرالين وناقشوهم وصاحبوهم فأن التجنب يولد العزله والعزله تولد الاحساس بالاضطهاد فكلنا نسيج واحد ويوم لك ويوم عليك

ايها الفائزون فى غزوة الصناديق الثانية تقدمتم لتحمل المسؤليه فى ظل ظروف هى الاصعب فلا تتسرعوا فى أكتساب المزيد من الاعداء بتصريحات أو تلميحات فمن تواضع لله رفعه الله

يامن تنتمون الى التيارات الليبراليه الاشتراكيه العلمانيه الناصريه ...الخ الخ 
دعونا لانكرر ما وقعنا فيه بعد الاستفتاء فلا تحتقروا المواطن المصرى الذي خسرتم صوته فى هذة الجوله ولا تتهموا بالجهل والانقياد ووانه بيدى صوته لبتوع السكر والطماطم " لما انتوا عارفين انه بيجى بالطماطم ماعملتوش كدة ليه يا ناصحين - اه نسيت أسألوا بتاع كورت الشحن "

أستعدوا لمراقبه مجلس الشعب وأعضاؤة والحكومات لا تسكتوا على فساد المفسد , تعالوا نكرس جهودنا فى المعاضه المفعاله حتى نجنى فى النهايه ثمار الديموقراطية

شعب مصر العظيم أنتم فخر وعزة 
اعلم اننا نحتاج لمعاونين حتى نترك السلبيه ونتحرك لهدم الفساد - خد بالك لو انت قلت وانا مالى ونمت الكل هيقول وراك وانا مالى لكن لو انت قلت أمسك حرامى مش هنلاقى بكرة فى مصر حرامى

نساء مصر العظيمات انتن فخر لنا وهذا ليس بالجديد عليكن 
فلكل جاحد أهبل يرجع للتاريخ سيجد المرأه كصفحات النور التى ملأت جنبات كتب التاريخ
وكل واحد فاكر ان الاسلاميين لا يحترمون النساء ويهمشونهن - شكلك ما بتتفرجش على طوابير الانتخابات
قالوا علينا اننا نقول صوت المرأة عورة ... أقول لكم قول ربنا جل وعلا عندما امر النبي محمد بعمل مناظرة " ملاعنه " بين المسلمون واليهود فقال

   قل تعالوا ندع أبنائنا وأبنائكم ونسائنا ونسائكم وأنفسنا وأنفسكم ثم نبتهل فنجعل لعنة الله على

الكاذبين 

أرجوكم كفانا تشميت تشكيك ثرثرة تخويف وتعالوا نقف كتفا بكتف لنبنى هذا الوطن ونرفع رايته 

ليكبر أبناؤنا يجنون ثمار ما قد زرعنا 

السبت، 26 نوفمبر، 2011

ثورة مصر .. والهمم العالية





لقد خلقنا الله ولكل منا همته فمنا صاحب الهمه التى تناطح السحاب  ومنا صاحب الهمه الدانيه ومنا بين ذلك يقول ربنا " قد أفلح من زكاها " اى رفعها وعلاها قد خاب من دساها " تحت التراب هذا فى طاعة الله


تختلف الهمه حسب الشخص وحسب الموضوع فممكن يكون فيه شخص همته ضعيفه جدا فى السعى للرزق هو ما يستحملش يشتغل ساعتين على بعض - لكن همته فى السماء اذا طلبنا منه التطوع لعمل خيرى مثلا
ومنا من همته فى السماء فى المعاصى - وهو رايح يعصى يتعب ويبذل الجهد حتى يصل الى أكبر لذه من المعصيه وفى المقابل همته دنيئه فى عمل الخيرات
واخر من همته عاليه فى السماء فى اللبس والمنظر والشياكه - يلبس ماركات ولازم يكون شكل كويسه - وهمته واطيه لو حد اهانه يقبل الاهانه فى نفسه واهله


دلوقتى تعالوا نسقط المثل على الثورة
انقسم الشعب الى فرق حسب همته فى التغيير
فعندما خرجت المظاهرات فى 25 يناير كان المطلب اسقاط العادلى وتجبر الشرطه وعدم ترشح مبارك مرة اخرى
اصحاب الهمات الضعيفه قالوا : ماله مبارك ما هو حلو وابن حلال كفايه انه مادخلش البلد ف ويلات الحروب


لما المطالب دى اتوافق عليها 
اصحاب الهمات الضعيفه قالوا : يا سلام اهو اللى كنا بنحلم بيه اتحقق حلو قوى كدة عايزين ايه تانى
اما اصحاب الهمم : قالوا لن نرضى بالفتات - فليسقط الزعيم


عندما سقط الزعيم وتولى العسكر 
الضعفاء قالوا : ياه كدة ميه ميه
اما اصحاب الهمم قالوا : لا لن نبرح حتى يتم  تعين حكومة تكنوقراط واقاله حكومة شفيق  مننا احنا - انتوا ازاى ترضوا يحكمنا حد مسلط علينا -وهذا المجلس والحكومة من صنع مبارك فكيف سيحاكموه


للاسف خانهم الشعب وهرب من الميدان


قالوا تعديل الدستور القديم
قال ضعفاء الهمم وماله نغيره ..تعديلات زى الفل .خلى البلد تمشى والعجله تشتغل
قال اقوياء الهمم : لا نريد تعديلات على دستور ملغى اصلا نريد دستورنا يكتب بتاريخ اليوم


وخسر الاقوياء لغلبه الضعفاء فى العدد


 عندما تجبر الجيش وبدأ يستهبل بالوثائق ومد فترة المرحله الانتقاليه
قال الضعفاء : نستحمله ونعديها
قال الاقوياء : لااااااا لسنا نمد لكم ايدينا لتتصدقوا علينا - فتنازل المجلس وحدد موعد لانتخابات الرئاسه


عندما استخدم الجيش نفس السلاح وتكرر استخدامه لسلاح الداخليه والرصاص على الشعب
قال الضعفاء : نستحمله يومين لحد لما نخلص الانتخابات وبعدين اللى بيتضربوا دلو بلطجيه
قال الاقوياء : انتهى حكم العسكر الذى لم لهنينا على اى مطلب من مطالب الثورة
- فلا حكم على قاتلينا فى 28 يناير
ولا رجعت فلوسنا المنهوبه
وزادت السرقات والبلطجة ولم يرجع الامن للبلاد
وبيلف ويدور يعلمنا وثيقه علشان مصلحته
وفى الاخر يقتلنا بنفس السلاح الذى قمنا لاسقاطه فى 25 يناير
يسقط يسقط حكم العسكر


وستظل الحرب دائمه بين الهمتين بين من يريد العزة  والعلا
ومن يريد اى حاجة وخلاص
 نوايه تسند الزير
القرش الابيض ينفع فى اليوم الاسود
 عيشنى النهاردة وأحرقنى بكرة


انتهى



الأحد، 20 نوفمبر، 2011

مهاترات فى وقت لا يصلح فيه المهاترات




فى وقت يصعب فيه المهاترات هكتب فيه مهاترات

-- فاكرين لما كنا قاعدين نضحك عالولد ابو شعر طويل اللى كاتب - ارحل بقى عايز اروح احلق
ولا العريس اللى كان لسه متجود اللى كان كاتب - ارحل بقى مراتى وحشتنى
فاكرين الامام اللى كان بيصلى بالناس على كوبرى قصر النيل ورجال الداخليه بيرشوه هو والمصليين بالميه وهمه بيصلوا
فاكرين ضابط الجيش المسيحى الى كان بيعيط فى الميدان يوم موقعه الجمل
ولا الشاب اللى كان واقف قدام عربيه رش الميه بصدرة
ولا العربيه الدوبلوماسيه اللى دهست الناس فى الشارع
فاكرين .....
فاكرين البرد بالليل فى الميدان والرجاله معتصمين ومرابطين
فاكرين خطاب التنحى ....ورد فعلنا لما كل الناس هتفت ...الله أكبر الله أكبر ...الله أكبر


فاكرين جمعه النصر اللى اول مرة اشوف فيها كل الشعب بكل طوايفه - شارك ما شاركش فى الثورة فرحان وبيهلل
فاكرين الدبابات اللى ولادنا اتصور جنبها


ولا فاكرين يوم الاستفتاء و 18 مليون واحد راح يصوت ووقف فى طابور طويييل عريض وهو مبسوط - لاول مرة يقف فى طابور ويكون مبسوط
حد فاكر يوم 28 لما الشعب كان بيهتف " واحد اتنين الجيش المصرى فين"
فاكرين " الجيش والشعب أيد واحدة "
فاكرين مبارك وجمال وعز والعادلى لما كانوا فى مناصبهم وماليين الدنيا افترى وعنتظه
فاكرين الاجندات والكنتاكى وال 50 دولار اللى كانوا بيتوزعوا فى التحرير


فلكرين واحنا قاعدين بالليل فى عز البرد فى اللجان الشعبيه بنحمى بيوتنا وأولادنا


فاكرين لما كنا بنحلم ب مصر بكرة أحلى
لما رسمناها كأنها سحابه بيضاء فى سماء صافيه
تخيلناها شجرة أغصانها مثمرة
تخيلناها جنه من الجنان
يجرى بها الجداول وبها الحدائق الغناء
شعب متألف متحاب
كلنا أيد واحدة
تخيلنا بكره بعد انجلاء الظلم والظالم يسودة العدل والخير والمحبه


ياااااا  شعب حلم بليل أنه فى الجنة...وأستيقظ الفجر فاذا به فى جهنم
وا أسفا على شعب ..ظلم
.وااا أسفا على دم ..زهق
يا حسرتى على حلم ..قتل

يقول ربنا : كُتِبَ عَلَيْكُمْ الْقِتَالُ وَهُوَ كُرْهٌ لَكُمْ
وَعَسى أَنْ تَكْرَهُوا شَيْئًا وَهُوَ خَيْرٌ لَكُمْ
وَعَسَى أَنْ تُحِبُّوا شَيْئًا وَهُوَ شَرٌّ لَكُمْ
وَاللَّهُ يَعْلَمُ وَأَنْتُمْ لا تَعْلَمُونَ

الخميس، 17 نوفمبر، 2011

سؤال محرج جدا !!

هو انت مسلم ؟؟
هكذا أنفجر زميلنا الصامت بلهجه مليئه بالارتعاد الذى ظهر على وجهه وعلى نبرة صوته
كنت جالسا أهزى فى أحد مدرجات الكليه منتظر بدء المحاضرة  وملتف حولى لفيف من الطلاب يستمعون ويضحكون ويبادلوننى أطراف التهريج اوالقصص
فاذا بواحد من الطلاب يصفعنى على وجهى بهذا السؤال
هو انت مسلم !!!!
اي أو أأأأ اه الللل
 وقلبت على منى الشاذلى بالتهته مش عارف أقول ايه ولا اعمل ايه من الصدمة وواضح انه الطالب دة مش لوحدة اللى نفسه يسمع الاجابه لانى لقيت اهتمام كبير من 2 او تلاته بيبصولى وبيبحلقوا منتظرين رد

فكرت بعد كدة ولقيت فعلا السؤال ده غريب أو صعب انك تسأله لحد بصيغة السؤال المباشر لانه بعد شويه من التعامل بيبان الشخص هل هو مسلم ولا مسيحى ممكن المووضع ياخد يومين تلاته مع بعض او ساعتين او ممكن من اول كلمه تعرف هو مسيحي ام مسلم

يعنى مثلا كان فيه شركه صيانه مسيحيه يعنى صاحبها والكام مهندس اللى جم زارونى فى المصنع مسيحين
يعنى كلهم كانوا مينا – مايكل – ميلاد – جرجس كدة يعنى
ففيوم جه مهندس جديد من الشركه يعملى صيانه الراجل مسلم بس انا متوقع انه مسيحي زيهم والمهندس فاهم وعارف انى فاكره مسيحى وعايز يثبتلى باى طريقه انه مسلم
فبقولهم تشربوا ايه فرد الاخ دة وقال معلش اصلى صايم ...
الراجل حس ان خلاص عرفنى انه مسلم – لاكنى انا بردوا لسه شاكك  يمكن المسيحين عندهم صيام الايام دى ولا حاجة – ما هو كل المهندسين اللى شغالين فى الشركه دى مسيحين وانا متأكد من كدة دول ما بيشغلوش غير المسيحين
لكنى ما اتاكدش غير لما الراجل جه صلى الظهر معانا فى الجماعه

الغريب ان الطالب ده معايا طول التيرم يعنى شهرين مثلا وطول الشهرين بيعاملنى بنظام
أيييييه ؟؟ مسلم دة؟؟ ولا مسيحى ؟؟ طب ايه ده دا مصاحب اتنين مسيحين وماشى معاهم طول التيرم ؟؟ اه يبقى مسيحى
وكمان ضارب دوجلاس وبيتنطط زى الكورة الجلد فى الكليه ..لا لالا هو مسيحي
ايه ده ؟ ده بيتكلم عن القرأن و النبي صلى الله عليه وسلم !!!
هو ايه النظااااام
لحد لما لقى الفرصه وضربنى بالقلم على وشى وقالى
هو انت مسلم ؟؟؟

تقريبا نفس الموقف حصلى لما قابلت لاول مرة واحد شيعى من السعودية – انا قلت من السعوديه يعنى منبع السنه والواهبيه وحبايبنا اللى بيمولونا
هو الراجل اول ما شافنى " ملتحى " يعنى وهابى " لقيته اتخض ووشه اصفر وجاب الوان – ما اخدتش ف بالى
قعدت مع الراجل نتكلم ونحكى فى الثورة المصريه والثورة فى البحرين وبوادر مظاهرات فى السعوديه " بعد ثورة مصر بقليل"
وقعدت اقول لا يعم دا اللى فى البحرين دول الشيعه وعاملين قلق عالفاضى وايران بتساندهم
واللى فى السعوديه دول برضوا الشيعه وهكذا ومن غير ما اخد بالى لقيت انه توجهه الدفاع عن مظاهرات السعوديه وأن الحكومة عندهم مبهدلاهم والحياه غاليه والسكن صعب
وانا واقف مسبهل ...فى السعوديه الكلام دة .... فقراء فى السعوديه ؟؟..بطاله ...فى السعودية !!!
سؤال زى ..هو انت سنى ولا شيعى .... صعب جدا انى افكر انى أسألهوله
لحد لما انضم للحديث بعض الاصدقاء وفجأه أيضا وبلا اى مبررات لقيت واحد من اصحابي بيسأله هو انت سنى ولا شيعي ؟؟ انا ازبهليت من السؤال ؟
لكن الراجل رد وقال انا شيعي
فصاحبي  علشان يلم الدور قاله انا عارف ان الشيعه فيهم ناس كويسين ومعتدلين لكن فيه ناس اسمهم الاثناغشريه أو الروافض دول مش كويسين وبيسبوا الصحابه و و و
رد الراجل وقال انا منهم بس احنا مابنسبش الصحابه وبنترضى عليهم
حاله اسبهلال تخييم على الحاضرين

انتهى