الاثنين، 31 ديسمبر، 2012

بوست أبيح جدا

بعد موضه السب والقذف فى الوسط الاعلامى السياسى قررت أعمل بوست واشتم انا كمان وأقول كلام أبيح جدا

كلام أبيح جدا بقى لكل واحد طلعله صوت أى ان كان تياره ايه عمل بالمثل القائل " مل اناء ينضح بما فيه "
وكلام أبيح جدااااا لكل كذاب ومنافق اى كانت جهته ايه
وكلام أبيح جدا لكل صاحب قناه أبيح ساب مقدم برامج أبيح يطلع على قناته الابيحة ويسمعنا كلام أبيح
وكلام أبيح جدا  لكل واحد قال كلام أبيح قام خلى واحد تانى لسانه أأبح من الاولانى يرد عليه بكلام أأبح من الاولانى
وكلام أبيح جدا لكل لكل واحد هيخش البوست ده يقرأة ويمشى من غير ما يحط اعجابه
وكلام أبيح جدا لكل واحد هيخش البوست ويقرأه ويحط  أعجاب وما يسيبش كمنت
وكلام أبيح جدا لكل واحد هيخش البوست ده ويقراه ويعمل اعجاب ويسيب كمنت وما يعملش شير

الخميس، 22 نوفمبر، 2012

مليونتى ومليونيتك وأتفرقوا المليونيات

بمناسبه الدعوة للنزول بكرة

حته من الارشيف






------------------------------
وصلنى 4 دعوات على الفيسبوك لحضور 4 مليونيات مختلفة كلها يوم الجمعه 13 مايو
مليونية دعم الانتفاضة الفلسطينية

ودى بينادوا بيها من كام شهر لاشعال انتفاضة فلسطينية جديدة يوم 15 مايو

مليونية الوحدة الوطنية

ودى ردا على أحداث أمبابه والفتنة الطائفية

مليونية " السلفى اللى بجد "

دى علشان نقول للناس اننا السلفيين مسلمين من واجبنا حماية الكنائس ولو حتى فيه
|
يهود ف البلد هنحمى معابدهم لأن

و مليونية – او عملية تنظيف وتزين المنطقة

كل المليونات دى هتكون ف ميدان التحرير طبعا ماعدا المليونية الاخيرة دى

كدة المفروض ان هيبقى فيه 3 مليونيات ف الميدان وكل مليونيه مالهاش دعوه بالمليونيه التانيه
أو قد يكون فيه تعاون بين كل مليونيه من دول مع المليونيتين التانيين

يعنى لو الغدا ف مليونية من دى مكفاش ممكن نستلف رغيفين عيش ولا حاجة من

 المليونية اللى جانبنا بقى ماهو الجيران لبعضيها ..أقصد المليونيات لبعضيها

.... أو ممكن نستلف ميكروفون أو يافتتين تلاتة نتصور بيهم قدام الكاميرات ...المهم

اللى مش كويس بقى ان مليونية من دول تطلع خبيثة وتدس الدسائس لتوقيع المليونيتين

 التانيين ف بعض يعنى مليونيه نمامه موقعتيه كده

وهنا بقى تحصل مشكلة بين المليونيتين التانيين ويحصل ضرب طوب ومولوتوف بقى

 وتبقى مدعكه

ومليونيه " عدم محاكمة مبارك" تشمت فينا بقى ويقعدوا يقولوا " ولا يوم من أيامك يا

 ريس"

وتيجى ملوينيه رابعه تصلح بين المليونيتن دول وتسمى نفسها " مليونية الوحدة

 المليونية "


انا دلوقتى محتار أشترك فأنه مليونية بالظبط

يعنى مليونية " السلفى اللى بجد " بما انى سلفى فالمفروض أشارك علشان لو

 ماشركتش هبقى سلفى مش بجد وممكن السلفية يقيموا عليا الحد " غير قطع الودان "

أو مليونية دعم الانتفاضة الفلسطينية – ومين فينا مش عايز القدس يتحرر من دنس

 اليهود

طب أروح مليونية الوحدة الوطنية لأن دى الازمة الحالية ف مصر والبلد مولعه بين

 المسلمين والنصارى ؟؟

ولا أروح أنظف الشارع وأزينة وأهى النظافة من الايمان

ما هو لو أنا ماشركتش ف ولا مليونية من دول هيتهمونى يا أما انى مش سلفى بجد

 وهيقيموا عليا الحد " غير قطع الودان طبعا "

أو هيتهمونى أنى سبب الفتنة الطائفيه وأنى متجوز نصرانيه وأسلمت ومخبيها فى الدير

 بتاعى وبعذبها

أو هيتهمونى أنى ما بحبش القومية العربيه ومش غيور على المسجد الاقصى الاسير

ولو مانزلتش حملة النضافة أكيد هيقولوا انى مش وطنى وماتغيرتش بعد 25 يناير

انا ما بحبش حد يزايد على وطنيتى ...أنا هعترف علشان الكل يعرف أنى وطنى وانى

مع ثورة يناير

وان مبارك لازم يتحاكم وان الوحدة الوطنية دى شىء مهم وان الصليب والهلال دول

 جزء لا يتجزأ

يا أخوانا أنا عندى مليونية تانية خالص يوم الجمعه اللى هو يوم ميلاد " على بن هيثم " ولدى
لاء لاء أنا مش هعمله مليونية علشان عيد ميلادة لاء لالالالا

انا عندى مليونية تانية خالص مليونية مليانة رمل وزلط وأسمنت وطوب وما بصدق

 يوم أجازتى أنجز شوية من المليونية دى فى "أبني بيتك " البيت الصغنون اللى بابنى

 فيه بقالى سنتين ومش عارف أخلص

ياريت يا أخونا تطلعوا وطنيين فعلا وتجيبوا كام مليونية وتيجوا تساعدونى فى

 مليونيتى

ربنا ما يزنؤكوا ف مليونية

هنشيل شوية رمل أعتبروها أعلام من اللى هتشيلوها فى التحرير

وشوية طوب ...بدل الطوب اللى هتحدفوا بيه بعض

وقال على رأى المثل مليونيتى ومليونيتك وأتفرقوا الميلونيات


الأربعاء، 10 أكتوبر، 2012

أبويا قالى ماتتكلمش ف السياسة "من وحى صفحات الفيس بوك"


بقالى فترة عمال اشوف اسامى صفحات على الفيس بوك تحف ووناس تسمى صفحاتهم رد على اسامى صفحات تانيه وحوارات واشتغالات بس فى أسامى الصفحات
ملحوظة " اى حاجة باللون الاحمر ده اسم صفحه من صفحات الفيس بوك "
----------------------------------------------------
معدى الشارع لقيت اللى معلق يافته كبييير مكتوب عليها " أصلح بوابير الجاااز " 
فضولى شدنى قلت بوابير جاز ايه ف الزمن ده لما اخش اشوف المعتوه ده بيعمل ايه
دخلت المحل لقيت " مشروع بنى أدم " قاعد فى محل تصليح اجهز كهربائيه
قلتله " مساء الانوار "
رد عليا
" مساء الجمال مع ميرفت ودلال "
لقيتة هيخشلى أفيه وهيلبخ ف الكلام قلت لما أشتغله
قلتله انا عايز " اتنين فلول وواحد طعمية " 
قالى انت فاكرنا " كافيه الصعايدة هزار بوابين "
قلتله لاء مش دة "كافيه الزهقانين "
قالى هو انت منهم " سلفيون ولكن ظرفاء "
قلتله لا يا سيدى " انا سلفى كول مش معقول " 
لقيته بيبصلى بغل
حبيت اهزر معاه قلتله
" بطل غل يا واد يا فل "
لقيته اتضايق اكتر وقالى
" بطل غل ..أيوه انا فل 
قلت اهه انت منهم بقى مش تقول كده
"امسك فلوووول "
قالى
" فلول فلول ..ولا استبن دلدول "
ايه ده هيغلط فى الريس مرسي  خلانى اقفش منه بصراحه
قلت ف بالى " احنا اسفين يا ريس مرسي "
ضحك اوى وقال
" احنا اسفين يا مرسي ...أنت صغير ع الكرسي "
وضحك ضحكه شريره
قلتله وانا متغاظ
" أضحك يا بن النكدية"  مانت من بتوع " شفيق الدين البونبونى"
رد عليا مالكش دعوه بشفيق " احنا اسفين يا شفيق"
هو انت فاكرأن " أنا اخوان ..أنا مقطف بودان " لاااااا
استغربت اوى ..مقطف بودان !!! لا دانت شكلك من بتوع كوبرى طلخا
" احنا اسفين يا كوبرى طلخا "
قالى " فكك من اساليبك " 
قلتله ماشى
أساحبي 
انا اصلا
أبويا قالى ما تتكلمش ف السياسة" 
رد عليا
" وانا ابويا فقعهملى " 
قلتلك يا عمى سيبك م اللى فاتك وركز ف حياتك 
المهم كلمه من هنا على كلمة من هنا
لقيته بيغمزلى وبيقولى
" أحترس أمامك مزة "
بصيت لقيت تلت بنات داخلين علينا المحل
المزة اللى فيهم سمعته
قالته
خد بالك
مزة أااه ..أمشى مع حد ...لاااااا
ردت صاحبتها اللى ع اليمين
بس " انا مش مزة "
والتالته قالت
" ياريتنى مزززة "
الراجل صعب عليه حال البنتين اللى مش مزز وقالهم ماتقلقوش هو انا نفسي فى مشروع " مزة لكل شاب "
بس انا برضو ابن بلد
" وعشان انا وطنى لما هشوف مزة حلوة مش هقول ع البنت بتاعتى يععععع "
وعشان انا وطنى هتجوز اربعه واحل مشكله العنوسه عشانك يا مصر"
أول ما سمعوا كلمه عنوسه وشهم جاب ألوان وبصوا ف االارض
واحدة قالت ..عنوسه !! لاا بعيد الشر
التانيه قالت أحنا اللى ما بنحبش الجواز بلا هم وقال حب قال
" ما الحب الا شبشب كبير "
رد عليهم بسخريه هو
" عينيى عليه واقول أخيييه "؟
ولا ايه
"أساحبتى "
سألونى وأنت ايه رأي حضرتك
قلتلهم لاااا ماحدش ليه دعوه بيا
انا ديموقراطى وبحترم رأى مراتى 
وبحب حماتى عشان جابت حياتى 
رد الراجل وقال
وانا بكره حماتى عشان جابت غلطة حياتى 
وشفت كمان المصيبه
قلتله ايه خيير
 قالى
" حماتى ...عندى " 
قلتله " ألبس ...يا شعب "
طب الوداع بقى يا برنس
رد عليا
قالى الوداع ..قلتله فكك منى "
وحاسب الفحت لتقع تحت
سلااام ..أساحبي 



"مهاترات عاقل " دى صفحتى انا بقى ع الفيس بوك "

الأحد، 7 أكتوبر، 2012

لا لتعدد الزوجات



عشت طوال عمرى من المؤيدين بشده لتعدد الزوجات ,وكنت من المشجعين والمحمسين والمتحمسين للتعدد
فهذا شرع الله .. ولا احد يستطيع أن ينكر شرع الله
وهذا هو حل لأزمة العنوسه .. ولا أحد ينكر أنتشار العنوسه
وتعدد الزوجات فيه كثرة للأولاد ... ونصيحة نبينا صلى الله عليه وسلم أن تكاثروا تناسلوا فأنى مباهى بكم الامم يوم القيامة
وتعدد الزوجات فيه أصلاح للزوجات ... فمعلوم من قوانين حيتنا انه لايصلح المراة الا المرأة
تعدد الزوجات ليس له سبب فهو  ليس له علاقه بحاله الزوجة الاولى الصحيه ... ولا الانجابيه ولا أى عيب يمسها ولا يشترط غنى الزوج ولا يشترط صحه الزوج المفرطه ولا يشترط .... ولا يشترط ...
و قناعات أخرى عديدة كنت أقتنع بها بشدة واحارب لأجل تلك القناعات
ليس مهما أن كنت سأطبقها أو لا .. المهم كان الاقتناع بالتعدد وأهميته وضروريته فى المجتمع حتى أنى كتبت بحثا عن تعدد الزوجات فى عام 2006 وقبل أن أتزوج أصلا


الأن : وبعد تعمق جديد فى هذا الموضوع وبعد مراجعات عديدة أقول

أن تعدد الزوجات فى هذا المجتمع أمر مرفوض جداا وضار جدااا " ألا فى الحالات الخاصة كمرض الزوجة أو للانجاب او .."
تعدد الزوجات بعد ما تغير دور المرأة فى المجتمع أصبح أمر مرفوض جدا
تعدد الزوجات بعدما أنتقلت المرأة من مرحلة " الحريم " الى مرحله السيدات المتعلمات المثقفات أمر لا يعقل
فى السابق كان الرجل يذهب ليتزوج أبنه فلان .. فقط ليتزوج .. وبعدها يتزوج الثانية لزيادة النسب مع عائله أخرى وهكذا الى أن يرص فى بيته الاربعة

فى عصرنا هذا أصبح للمرأة قيمة أكبر من عصور اخرى - لا أحد ينكر هذا - فتعليم المرأة وتثقيفها وتحويلها من مجرد " حريم " فى البيوت الى مشاركات ف المجتمع - امر لا يختلف عليه أثنين -
تغير طريقة الارتباط بين الرجل والمرأة .. من معرفه ماقبل االزواج والاعجاب والمحبه والمشاركه الوجدانيه والتخطيطية للمستقبل والكفاح المادى والتعاون على الحياة وعلى تربيه الاولاد و...و...و..
كل هذا جعل علاقة الرجل بالمرأة علاقه مختلفه تماما عن علاقة الرجل بالمرأة فى عصور أخرى
لذلك أقولها الان وبعد سنوات من تبنى الرأى الاخر
أقول أن تعدد الزوجات فى هذا الزمان أمر مرفوض - لو كنت فى محل افتاء لقلت " حرام " -
انا اتكلم عن الوضع فى مصر وفى ظروف المدينه المصرية - فقد يختلف الامر فى بعض الاقاليم أو بعض الدول والمجتمعات الاخرى


ليس عيبا أن نراجع أنفسنا ونصحح أخطائنا ومفاهيمنا ... ولكن العيب هو الاصرار والتمادى فى الخطأ

الأربعاء، 12 سبتمبر، 2012

رجع بخفي حنين

عندما أكون انا المتهم فى قضية لم أربح منها مليما يبقى استهبال
فمبارك أتهم بالسرقه هو وأولاده وقد سرق ونهب مال البلد
واللى قتل ..أهو قتل 
واللى نهب مال الدولة ..أهو استفاد
واللى سرقه بطه .أهو اتعشى والحمد لله

لكن أنا متهم ولم أربح مليما ولم أذوق طعم البط منذ شهور ولم أقتنص شبر من أرض والحمد لله مكتفى بال 150 متر اللى مبارك ربنا يكرمك اداهملى
أذن المتهم محبوس  ويعاقب ويعذب وهيطلع عين أمه بلا أى مكاسب

يا حلااااااوة
تذكرت حنين بتاع " رجع بخفى حنين"


القصه
جاء رجل أعرابي الى حنين صانع الاحزية فأراد ان يشترى خفين
وظل الاعرابى يفاصل فى السعر شكله كان أعرابى من المنوفية
المهم الاعرابى طلع عين ام " حنين" وف الاخر لم يشترى الخف
فاتغاظ " حنين " وفكر للاعرابى فى خدعه
فأخذ الخفين ووضع أحدها فى طريق سفر الاعرابي و بعد مسافه وضع الفردة التانيه
فمر الاعرابي فوجد الفردة الاولى فنزل من على جمله وأخذ ينظر اليها قائلا ما أشبه هذا الخف بخفى حنين ولكن ماذا سأصنع بفردة واحدة ؟ وتحسر وتركها وركب جمله وبعد مسافه وجد الفردة الثانيه فقرر أن يترك الجمل يعود مسرعا ليحضر الفردة الاولى
فى تلك الاثناء كان حنين يراقبه من خلف تل ولما ترك الجمل ذهب حنين وأخذه ومشى
رجع الاعرابي بالفردة الاولى فوجد الفردة الثانيه من الخف ولم يجد جمله
فعاد الى أهله فدهش الناس وسألوه أين جملك ؟
فأخرج لهم خفى حنين
فضحك منه الجميع وقالوا رجع بخفي حنين
----------------------
يبقى السؤال : هل الاعرابي ..طماع وأنانى
أم أن حنين هو المخادع

أنتهى

الاثنين، 10 سبتمبر، 2012

من حكم العقلاء

قمة العقلانية قد يراها  البعض جنون أو مرض نفسي. وهو أسقاط من حالهم على غيرهم
**
الفرق بينى وبين غيرى هو نفس الفرق بين قدراتى الدماغيه وقدراتى الجسدية
**
علمونا قديما أن العلم ف الصغر ك النقش ع الحجر ... وهذه دعوه صريحه لتنشأة الاغبياء
**
الفرق بين المرأة والرجل هو الفرق بين الفرخة والديك تماما
**
حلمت فى صباى ان أكون طيرا يطر بجناحيه فى السماء محلقا بيعدا قريبا حيث شاء ..لكن تأتى الرياح بما لايشتهى الاطفال
**
اليوم فقط ... علمت أن  الأقدام ليس السبب فى النصر ولكن الاهم هو الإقدام
**
ما نيل المطالب بالتمنى ولكن تؤخذ الدنيا غلابا ...واللى بيخاف يروح
** 
عندما تكون فى موضع تجذب فيه من ناحية وتشد من ناحية أخرى فأعلم أن القرار لن يكون قرارك ولكنه سيكون قرار الأقوى
**
عندما نتبول نشعر بالراحه .. وعندما نهرب من الدنيا الى النوم..نشعر بالراحه.. وعندما نهرب من حياتنا بالسفر والخلوة ..نشعر بالراحه 
**
ليس كل ما نتمناه ندركه كله ... ولا نصه .. ولا ربعه ... كفايا اننا بنتمنى
**
أعلن تأميم قناة السويس شركة مساهمه مصرية
**
أحلى حاجة فى دنيتنا بنسيبه  ونسعى عشان نلاقى نقطة سودة ونقف جنبها ونعمل عزاء
**
من يظن أنه يبتسم او يضحك ليخفف ما بداخله من هم ونكد ...ده كذاااب
انا عايز أضحك أوحتى  أبتسم م الصبح مش عارف
لا يضحك بشفاهه الا من يضحك بقلبه
**
فى أعياد الميلاد يوقدون الشموع وياكلون التورتات ويقولون الاغنية الشهيرة - سنه حلوه يا جمييل - فعلا الذكريات التعيسه لا تنسى
**
تعريف الذكريات : هى تلك اللحظات السودة اللى عشناها
**
سأكون أنا كالماء الطاهر الطهور الذى لا ينجسه ولا يلوثه شىء اذا زاد عن قلتين عراقيتين
**
غدا هو ذكرى الحادى عشر من سبتمبر ... حتى أمريكا قلدتنا ووضعت هذا اليوم الاسود على قائمة ذكراها التى تحتفل بها
**
أفخر دوما أنى جربت كل شىء ف حياتى لم يبقى لي سوى شيئين أن أقتل أحدا  أو أن يقتلنى أحدهم

أنتهى

الأربعاء، 29 أغسطس، 2012

حمره ....ومن غير بذر !!



كثيرا ما نشبه اى شىء مجهول فى مستقبلنا بالبطيخة وأنت وحظك لتطلع حمره ..لتطلع .قرعه وبختك يا أبو بخيت
أفتكرت واحد صاحبي كان بيشترى بطيخه م الفكهانى فصاحبي قاله : لو طلعت قرعه هعمل وهسوى
رد الفكهانى بكل بساطه : عيب دانت راجل شيخ وعارف ربنا
عايز يقوله يعنى أنك المفروض أكتر واحد يؤمن بالله وقدره واللى جوه البطيخة دى من الغيبيات اللى مش هنعرفها غير لما نكسر البطيخة

أختيارنا لمرسى كان بمثابة شرانا لبطيخة بدون مكسر
ماهو شرا البطيخ نوعين أما ع المكسر ودى هتشوفها وتتأكد أنها حمره قبل ما تشتريها وأما على أبوها كدة وأنت وحظك
أحنا أختارنا مرسى بدون مكسر بختك يا أبو بخيت ..بطيخة يا تطلع قرعه يا تطلع حمرا
على اساس أن مرسى بطيخة أحسن ميت مرة م القتاية أو القثائه او الأتايه أحمد شفيق ومعرف أن القتاية زى الخيارة يوم ف أيدك ويوم ف أمن الدولة
أعتقد الان وبعد أكثر من 60 يوم فى قصر الرئاسة وبعد حركة الانقلاب الواسعه اللى قام بيها مرسي وبعد العلاقات الخارجية الجديدة
والتطور الداخلى المعقول أستطيع أن أقول أننا بفضل الله أختارنا بطيخة حمره ومرمله كمان

لكن عيب البطيخة هو شوية البذر والمطبلاطيه اللى شغالين ورا مرسى
مرسى هيعمل قرض .. يغرقوا البلد فتاوى انه حلال حلال حلااال
مرسى هيخش الحمام ..ينزلوا بالفتاوى انه يجوز دخول الحمام بعد العشاء
مرسي بيصلى الفجر ..الزغاريط تشتغل
محروس مسك المقص ...لووووولوى

نصيحة اخوية للبذر بتاع البطيخة
ستفقد مصداقيتك بأستخدامك التطبيل فى الهيافات ..فعندما تأتى الأمور الاهم لن يكون لرأيك صدى لانك خلاص أتعلم عليك يا معلم انك مطبلاتى
أتذكرنى الان وأنا ماسك شقه بطيخ بألأهط فيها وعمال أتفتف فى البذر
عشان كدة كل ما الواد " على " يجى يقولى يا بابا انا عايز حته بطيخ من غير بذر أقوله يابنى هى دى حلاوة البطيخ أنك تاكل وتفتف وعلى رأى المثل القائل
مش فاكر بصراحة المثل

نهاركم سعيد

الثلاثاء، 28 أغسطس، 2012

أنا عايز ..





أنا عايز أكتب وأقول كلام .محشور من زمااان أوى 

حاسس بخقنه وضييق ......يا وااااااد .......خلييك قوى 

عايز أصرخ بعلو صوتى ............وأقول يااااااا قوى 

أو أجرى فى الشارع وأعرق يمكن تنزل كل الهموم ف العرق 

أو أرسم فى لوحه بيضه ........شجرة التوت والغصن والورق 

وسما صافياااااه .. .وشمس ... ونوم من غير قلق 
 وأرسم كمان .. النخلة . وشط الترعه.. وطيارة ورق 


أنا عايز أغنى وأقوول يااا رب
يا طيبنة بلادنا وترابها ..اللى عشمنا فيه ما خااب
وأقول موال لفلاح ف الارض ...م الشقى  دااااب
عايز أغنى وأغازل كل صبيه........ ..شعرها شاااب 
وأغنى لأخويا اللى ربانى .......وامى ......وأبويا 
وأغنى لليل والقمر.. ونسمه هوا...... وسحااب  

انا عايز أعوووم فى البحر 
وأخد معايا السنارة وأصطاد سمك 

عايز أعتكف المسجد اللى فيه أتولدت 
وأصلى فيه ركعات من غير ما ألتفت 
وأعمل مقرأة قرأن ..ونبطل كلام ولت 

أنا ......
انا عايز أروح لحد 
وألبس لباس أبيض وأغرقه عطر
وأنام ليلة من أسعد ليالى العمر 
وينادونى يا جميل .. ده أجمل قبر 
م الجنة جبنالك ريح وريحان 
وأنسى ما قد كان ...
ده الرب غفر 
ساعتها هصرخ وأقول يااااااااااااا بشر 
ياليت قومى يعلمون بما ربى لى أمر 





الأربعاء، 8 أغسطس، 2012

واه يا عبد الودود




واه يا عبد الودود يا اللى عايم ف دمك
وف ايدك فطارك . فطرت يا واد صحيح
ولا غدروا بيك قبل ما تبل ريقك؟
مجاتلكش أوامر و سلاحك كان بعيد ؟؟


واه يا عبد الودود
كيفك وكيف زمايلك اللى اتقطعوا جنبك
سلامى للجميع وللنعش اللى شايلك
عملولك جنازة ميرى . وحضرها المشير
ومراد بك موافى .. بيقول انا كنت عارف
انك بكرة  قتيل .....*أحيه*



واه يا عبد الودود
بتحرس ف الحدود وترجع لامك شهيد
ومعاك ميت الف جنيه ومعاش ف كل عيد
متخافش يا واد بقول ف العيد هنزور قبرك
وبكرة هندعى ليك
واليتيمة بنتك عم بتسلم عليك 
والبدله اللى فيها دمك هنسيبها للتاريخ
والله يصون بلدنا ... ويحرس السلام
ويخلى رئيسنا مرسى نايم عند الجيران
يامرسي يا اللى أختاروك

ان كنت ود أبوك
تديب حق الشهيد


واه يا عبد الودود
دمك ع الارض سايل وكمان دم اخوك
ودموع الشعب طفحت وبللت التراب
آن الاوان يا ولدى .. والجنه بقيت قريبه
وخلى الكرسى ينفع...... كل ولاد اللئيمه




الثلاثاء، 7 أغسطس، 2012

أسخن أبوس أيدك



ننتقل الان من المشهد الدرامى الدامى الذى راح ضحيتة شباب الامة الى مشهد أخر
مشهد كوميدى هو اى نعم انتقال مفاجىء من دم واحزان وسواد  مرة واحدة الى الكوميديا لكن هذا هو حال المصريين

مذيع بيهدد رئيس الجمهورية وبيخوفه ان ينزل الجنازة العسكرية
لو أنت دكر ..شفت لو انت دكر.. اه يعنى دكر اللى هو دكر يعنى
أنزل كدة ووررينى أنك دكر.
والرئيس يرتعد ويخاف... شك ف نفسه ولا أيه ؟؟
" كلمه أبيحه بمعنى -  أرفض حدوث هذا "

المشهد التالى الذى يكسر حاله الحزن والاسى التى ملأت مصر طيلة الساعات الماضية
الناس بتجرى ورا رئيس وزراء مصر بالجزم
حته تخيلية
الجميع فى وضع الاستعداد
جززززم أستعد
يقترب رئيس الوزراء
وهنا تبدأ المعركه رئيس الوزراء يجرى والناس وراه بالجزم
وننتقل بكم ايها السادة من أوليمبياد لندن الى أوليمبياد المنصه
وتبدأ الان منافسات لعبه الجرى وقذف الجلة و النشان فى نفس ذات الوقت

أرنا يا سيدى الحليم اذا غضب
ورينا يا ريس الشدة
هتسخن امتى كدة الله يكرمك انت والرجاله اللى وراك
يعنى قتلولك كام جندى ع الحدود . هددوا سعادتك وقعدوك ف بيتك زى لا مؤخذة النسوان وضربوا رئيس الوزراء بتاعك بالجزم
أسخن أبوس أيدك ؟؟
والله انا مكسوفلك سلف


الاثنين، 6 أغسطس، 2012

أمتى هنشيل السوااااد ؟




راح البياض م العلم
مش باقى غير السوااااد و .الدم
ودموع كاسرها الهم

يااااا بلد أرخص ما فيها الدم
شهيد وشهيد ووطن ب يأن
ومين هيشفى جرح الأم




صرخوا وقالوا راح الشب
من امتى ضحى غير الشب ؟؟
مات الشباب ... والله وهب
شهداء ....وريح الجنه هب

راح البياض م العلم
وخلاص عملنا حداااااد
ما كل يوم حدااد
فى كل شارع ..حداد
ف كل بيت حداد
أمتى هنشيل السوااااد ؟
يا بلد ملاها الغم

حتى العلم
راح البياض م العلم
مش باقى غير السواد والدم





مطلع مقتبس

الأربعاء، 25 يوليو، 2012

وأنت مال أمك

رمضان كرييم أسال ربى أن يبلغنا ليلة القدر ويجعلنا فيها من المقبولين

فى تلك اللحظة التى تجد نفسك فيها تريد أن تكسر كل القيود العرفية والاجتماعية
هى تلك اللحظة التى تجد فيها الاعراف والعادات والتقاليد تلتف حول عنقك تريد أن تقتلك
لكن أحذر ... عندما تنوى كسر تلك الروابط تعلم كيف تقول جملة " وأنت مال أمك " لانك ستستخدما كثيرا

خرجت الى الشارع ضارب شورت وتى شيرت وشبشب بصباع كأنى رايح البلاج وماسك ف ايدى مضربي الراكت والكورة
وداخل من باب الجنينة ....فاذا عامل شباك التذاكر يبسم أو يضحك مش عارف المهم انه كان ينوى أنه يتتريق عليا
فى وسط هذة الابتسامه قال : هو انت فاكر نفسك رايح ع البحر ؟؟
رديت عليه بكل أستعباط وبرود واستبدلت كلمة " أنت مال أمك " ب ...... ايه ؟؟ بتقول ايه ؟
كرر سؤاله ولكن الابتسامه بدأت تقل تدريجيا
وكررت نفس الاجابه مع نظرة لا موبالاه
ولما كرر السؤال ف المرة الثالثه بدون اى ابتسام
جاوبته : طبعا احنا بنعتبر الجنينه دى البحر بتاعنا ...


كنت ف تانيه ابتدائى وخبطتنى عربية وكسرت رجلى . ولكن شقاوة الاطفال لم تمنعنى أنى أطلع العب واتنطط ف الشارع بالجبس فكانت أمى تجبرنى ..عندما يأتى ضيف ليزورك من اقاربنا تقعد ف السرير وتنام وتستموت حتى يشعر الشخص اللى دافع جنهين ف الزيارة أنها تستحق فعلا .طب رجلى مكسورة والاشعه أهيه . أطمنت يا عم الحج
سيبونى انا بقى اروح أتنطط ف الشارع


هل من اشتراطات الزواج ان البنت  تشترط وتأخذ عهدا على خطيبها أنه لا يتزوج عليها ؟
هم يريدون حرية المرأة المزعومة ونحن نطالب بحرية الرجل الشرعية !!!!
واذا قال لك حماك وانت رايح تخطب بنته أنت أيه رأيك ف تعدد الزوجات ...هنا يجب عليك أن تجيبه أجابة صارمة " وأنت مال أمك"
بس  ابحث عن الاسلوب الذى يجلعه يطردك من بيته ومعك أبنته الى عش الزوجية وليست الطردة التانيه (:

واذا قلنا لنزوج أبنائنا فى سن شبابهم قبل العشرين ؟؟ والبنات فى سن النضوج ؟ ويكون العيش تجت رعاية أسريه
طلعلونا بالاسطوانه العظيمه حرية المرأة والاطفال والسنين السودة
طب أنا هعمل كدة مع اولادى أن شاء الله وسأكتب فى كروت الدعوة للزفاف  تحت خالص كدة " وانت مال امك " لان اللى هيقرأ الدعوه أكيد ستسول له نفسه أنه يقول شوفت الراجل اللى بيجوز ولاده وهوه لسه ما طلعوش م البيضه ...يجد الجمله أمام عينيه " وانت مال أمك" مباشرة

طوال حياتى لا استقر على حال فى شكلى فتجدنى أحيانا أطيل شعرى جدا .. واهتم به .. وشويه اطوله ولا اهتم به واعمله كنيش وشويه دوجلاس وشويه عفاريت ف وشى وشويه احلق زيرو ... وأخيرا قررت ألتحى
وفى كل مرحله أجد من يحشر نفسه ويقولى يبنى لاء كدة ما ينفعش مايصحش ....انت هتقلد الاجانب..
 الاجابه المنتظرة " وانت مال أمك" كله كوم ويوم أن قررت أطلق لحيتى كوم أخر وكأن الجميع أصبحوا لى الناصحون الامناء من له حق عليا ومن ليس له حق عليا ينصحنى ...يابنى أنت وهو أنت مال أمك ؟؟!!

الان أطلقت شعر " على بن هيثم " على الموضه اليومين دول .. ولازال كل ما حد يشوفه يقولى " ماتقص ل على شعره "
فقررت أرزع فى أبني تلك الخصله اللى ان أتربيت عليها " قاعدة " أنت مال أمك" 

أفعل ما ترى يا ولدى .لا ترتبط بقيود المجتمع البالية ولا العادات والتقاليد التى دوما ما تشعرنا بالغثيان.. وأستمع لنصائح الاخرين وخذ منها ما تقبله ولا ترد عنك ناصح ولكن فى النهاية انت سيد قرارك
واللى يزودها معاك قله كلام فيما معناه " وأنت مال أمك"

الان أجهز الكلمات المثالية التى تساوى " وانت مال أمك" لكى أقولها " لمن تسول له نفسه التدخل فيما قد قررت أن أكسر القيود وأقوم به فحياتى
حياتنا ونحن فيها أحرار

" أمك هنا لا تساوى أمه فى الايه " فأمه هاويه " وليس المقصود الوالده "



الجمعة، 20 يوليو، 2012

ذكريات رمضانية

رمضااان .. كرييم
من ذكرياتى الرمضانية



الموعد الرسمى للمسحراتى
" سامح " هو ف الاصل حلاق لكنه ورث الطبله عن أبيه على ما أظن وأصبح هو حلاق طول العام ومسحراتى ف رمضان . الموعد الرسمى له كان الساعه 1.30 صباحا أنا مش عارف مين اللى كان بيتسحر 1.30 صباحا علشان يلف يصحيه ؟ انا كنت بنام الساعه 12  والسحور كان قبل الفجر بنص ساعه . لذلك  لم ننال منه فقط سوى الازعاج حيث أنه كان يعمل بكل أتقان لوظيفته فكان يقف تحت شباك غرفه النوم مباشرة وهاتك يا دب ويا رزع بكل الالحان الموسيقيه أما دوم دوم دم دم دم أو الاخرى تيتا رتاباتا تييت .. بعدها تعودنا أن يسهر أحدنا أول ليله فى رمضان ليقابل المسحراتى ويقوله " أبوس أيديك ماتصحيناش طول رمضان وأحنا هندفعلك فلوسك وعليها شويه كعك هديه  " حتى نتجنب الازعاج طيلة الشهر
فوازير نيللى ..
كنت كل يوم أروح المدرسه اجد من يحكى ويتحاكى عن اقوى الفوازير فى رمضان  مما أثار فضولى وخلانى أهرب مرة من صلاة التراويح عشان أشوف ايه قصه فوازير نيللى دى ... والحمد لله من ساعتها لما كنت ف رابعه ابتدائى الى الان وانا مشفتش فوازير نيللى دى تانى


الاذاعة المصرية


فى الابتدائيه كان عندى بعض الاصدقاء لا يمتلكون التلفاز لم تكن تلك التكنولجيه وصلت اليهم بعد فكانوا يستمتعون برمضان من خلال الاذاعه . أذكر صديق لى أخذ يحكى عن مسلسل فى الراديو يأتى ساعه الافطار وأخر قبل الافطار وأخذ يشوقنى لحد ما روحت وجيبت الراديو وجلست لاستمع لاجمل الابداعات والمسلسلات الاذاعية ... وده كل أول واخر يوم طبعا ....وكما قالوا قيدما الكعكه ف أيد اليتيم عجبه




مسابقات رمضان
والدى من هواه القرأه وجمع الكتب وحل المسابقات الرمضانية المرتبطه بالتاريخ الاسلامى أو بأيات القرأن الكريم . كنت أقضى معه اوقات سعيدة نبحث فيها بين ثنايا الكتب والمراجع عن حلول للمسابقات الرمضانية لم يكن الغرض الفوز بالجوائز المعلنه لاننا بعتنا الاجابات مرات عديدة ولم نكسب أى شىء ولكن كان المكسب الاسمى هو التعب لاجل الوصول الى معلومة من داخل كتبة واالدى الضخمه الثرية وعندما كان يستعصى علينا سؤال كان يأخذة أبى ويذهب به لاحد أصدقائه المثقفين أو المشايخ والعلماء للوصول الى أجابته


الدورات الرمضانية
لن أنسى الدورة الرمضانية التى فوزنا فيها وحصلنا على المركز الاول وكنت هداف الدورة سنة 2001 او 2002

ليس لى اى ذكريات مع صناعه زينة رمضان وتعليقها والافلام دى لان بيتنا مش قدامة اى بيوت فماكنش فيه حد نعلق عنده قصادنا

الاعتكاف ... والكبسه
أفتكر مرة اعتكفت فيها وكان فيه خير كتير ف المسجد لدرجة أنهم كل يوم كانوا بيفطرونا " كبسه... ولحم ضانى " بعد 10 ايام اعتكاف تحولت من أكلى خضر الى أكلى لحوم ودة كان أحد اسباب اللى انا فيه دلوقتى

كل عام والجميع بخير وعافيه نسأل الله أن يوفقنا الى طاعته وأن يعيننا عليها




الاثنين، 16 يوليو، 2012

عالم الحيوان



ف يوم من الايام ... كان عندى حبيبه كنت ألاعبها وأداعبها وأجرى خلفها و أستهبل عليها لكنى بعد شوية أكتشفت أن اللى بعمله ده اكبرغلط أرتكبته فى حياتى فكلما أذهب لافتح كتابى وأذاكر تيجي بنت الرخمه وتلزق ف رجلى تنط عليا يا بنت اللذينه أوعى كده أنا بغير من رجلى , أهشها وأبدأ أركز فى كتابي ... تيجى مخربشانى فى صباعى الكبير أو عضانى ف كعب رجلى وأنا أتعفرت .... أيه يا روح امك أنا مش فاضيلك عندى ثانويه الله يخرب بيتك
لما أزعق لها ... تستهبل عليا وتتسهوك وتقعد تنونو بصوت كله رقه وضعف عشان تصعب عليا وأول ما تلاقينى نخيت ليها .. تروح بنت اللذينه هبشانى وطالعه تجرى وانا أرمى الكتاب وأجرى وراه وأحلف بالايمان ما هسيبك يابنت الكلب

بعد ماجبت مجموع ماعجبنيش, أنتهت علاقتى بالحيوانات الاليفه و أنتقلت الى مرحلة اليحوانات المفترسه
فى النهاية كلها حيوانات وكل حيوان له طباعه الخاصه منها ما يهبش وما يعض وما يهوهو ع الفاضى والمليان ,ومنها من يتسحب ويتدحلب ثم يلدغ كالثعبان ومنها ما يستهبل ويعمل نفسه ضعيف مريض هيموت من غيرك عشان يمتلكك فقط
ومنها الفيله والخراتيت والديناصورات , ومنها الحيوانات المنقرضة أو المتطورة , ومنها الثعالب شكلها جميل فروها ناعم صغيره لطيفه ,
لكنها بنت كلب مكاره , ومنها الحرباء التى تتلون بلون المكان حتى لا تراها ومنها فصيلة القرود التى تحب أن تتنطط وتعمل شقلبظات وخلاص

أخر مرة شاهدت فيها ناشيونال جيوجرافيك كانت الحلقه عن الحيوان صاحب أقوى عضه , حيث قام العلماء بتصميم جهاز يقيس قوة عضة الحيوان وتقدم فيها احد انواع الذئاب على التمساح والنمر والاسد
لكن تعليقى على الحلقة أن الامر ليس بقوة العضة ولكن الاهم هو تأثير العضة على المعضوض فقد تكون العضه قوية ولكن أنياب الحيوان رحمت المعضوض وحنت عليه وتحولت من أنياب مدببه صلبة الى جلد أملس طرى فكانت عضه بردا وسلاما على المعضوض

وقد تكون العضة من حيوان ضعيف ولكن قلبه أمتلأ غلا فانتقل هذا الغل من قلبه الى فكه وأنيابه فنهش المعضوض عضه بكل ما أوتى من قوة وحقد

فى النهايه عالم الحيوان سيظل العالم الاكثر تعقيدا وتنوعا وجذبا وتشويقا لذلك حاول ألا تعيش مع حيوان واحد وفقط أنظر حولك وتأمل !!

أنتهى

الأحد، 15 يوليو، 2012

خاين ..وعميل ... وأبن كلب



قبل الثورة كانت الحرب قوية جدا بين نظام مبارك وقوى التغيير من أول الاخوان المسلمين مرورا بالاحزاب المعارضه والحركات السياسية وصولا الى السلفيين حتى الالتراس الجيل الصاعد خلقوا لهم أعلاميين لتشويههم
تشوية وتخويف واللعبة الرئيسية كانت التمويل الاجنبي .. الولاية لدولة أخرى ... الضمير الفاسد ..... وأحيانا كان اللعب على الدين وعلاقة الشخص بربه ......الخ الخ

دعونا ننتقل من نظام مبارك المنقضى لنصل الى الثورة الطاهرة التى جمعت كل الاطياف فى ميدان واحد الجميع يستظل بظل الجميع لا يرى من هذا ومن ذاك الكل فى خيمة واحدة ومصير واحد .
أنتهت الثورة ..... وبدأت الحرب
نفس الاتهامات .. من ضدى فهو ..... ايوه صح .... خاين ....وعميل ..... وأبن كلب 
وانا أشرف م الشرف مافيش ......فله شمعه منوره

أستمرت الحرب الى أن طفش العديد من الشخصيات السياسية وأختاروا مبدأيا المشاركة فى صف المعارضة ... قبل أن يتكون صف الاغلبيه أساسا ..لكنهم علموا أنه لن يكون لهم مكان فى صف النظام الجديد .

وفجأة
أيه خير
حبايبنا والله طول عمركم ...أنتوا كنتوا فين ... تعالوا نحط أيدينا ف ايد بعض قبل ما شفيق يبقى الريس ... تعالوا نكمل ثورتنا قوتنا ....ف وحدتنا.

كلام أخر حلاوة ...زى اللى كنا بناكل بيه دماغ البنات زماااان
وبعد ما وصلوا يا أخويا للكرسى رجعت ريما الى نفس العادة القديمة ....ها
خاين .. أيوة ... وأبن كلب ....ها ...... وعميل
.
خلونى أقول ما أعتقده
أولا
: كفانا أحلام ....فالديموقراطية لن تأتى بالخلافه .... دة مبدئيا كدة وعلى بلاطه ستحتاج أن ترضى الجميع .. وأقامة الشرع لن ترضى الجميع.
ثانيا : أن لم نقم دولة الخلافة .... طب ما نقيم دولة العدل ... دولة تعطى الحرية للعلماء فى نشر العلم الصحيح ... مش دة كان من أهم الغايات من سنة ؟

ثالثا : أسلمة الدولة لا يحتاج الا الى شوية روتوش كما قال ابو اسماعيل الفرق بين الاسلام السياسى والنظم الاخرى  لا يتعدى 5 % .

رابعا : يا حامل لواء الاسلام لا تهين الاسلام .... ولا تكذب بدينك وتتجار به .... فأية المنافق ...ثلاث  .... منها أذا وعد أخلف .

أخيرا : يقول النبي محمد صلى الله عليه وسلم " ولا يزال الرجل يكذب حتى يكتب عند الله كذابا "  فعند الله من أعتاد الكذب كتب كذابا ... وعند الناس من أشتهر بخيانة العهد كتب لا عهد له .
أنتهى

الخميس، 12 يوليو، 2012

حــــافظين ... مش فـــاهمين

بالامس كنت اتحاور مع بعض الاصدقاء المنتمون لتيار الفلول الكنباوى  عن الاحداث الاخيرة فبعد سماع أرائهم أسترجعت ذكريات عام ونص العام الماضيه . هى هى نفس ردود الفعل فى كل موقف
همه ايه اللى وداهم .. نقعد جنب الحيط ... ماهى ماشيه ... البورصة خسرت ... البلد هتقع ...الجيش حامى الحمى ... أحنا شعب مايجيش غير بضرب البلغ " بضم الباء... وهى نعال تلبس فى القدم"

فسبحان الله سيبقى كل تيار له ميزته التى تميزة وأراؤه التى تحمل نفس المعنى فى كل المواقف فسيظل المنطبح منبطحا والثورى ثوريا والنائم نائم على ودانه
هذه المقدمة كان لابد منها قبل الدخول فى المشهد التالى

تباين الأراء حول أنتشار صور الرئيس محمد مرسي وهو يؤدى مناسك العمرة
 

رد فعل شباب الاخوان ملتزمون ....و الرئيس يبدأ رئاسته من بيت الله الحرام ...الله أكبر ولله الحمد ...أول خطوات أقامة الخلافة
السلفيون : الرئيس يؤدى المناسك فيما لا يخالف شرع الله
الاخرون : الدكتور محمد مرسي يصر على أقحام الدين ف السياسة
النصارى : يا ليلتنا السودة ده بيعمل عمرة كمان .... داحنا هنشوف مرار طافح ومش بعيد يخلينا نروح نعمل عمرة احنا كمان مع المسلمين 
المشير وهو بيكز على سنانة :ايه اللى انا جبته لنفسي ده
العواكشة :
الدكتور محمد مرسي ذهب الى السعودية لأخذ دعم الملك عبد الله للاخوان المسلمين لتنفيذ مخطط هدم مصر ....كله بالمستندات
انصار شفيق ها هاااااااى ....ريسكوا عمل عمرة فى ساعتين بالزمة ودى تنفع ؟؟؟!!
ريسنا بقالوا اسبوعين ... اسبوعين ... ولسه ماخلصش
الشيخ خالد عبد الله :يا واد يا مؤمن !!

المستشار الزند :
العمرة دى غير دستورية لانها مش من صلاحيات الرئيس وهما بتوع الفوص بوك وطنطير دول بيفهموا حاجة

تهانى الجبالى :

انا وصلت لمركزى دة بسبب زكائى وقدراتى الخارقة ...... ... ايه بتضربى صواريخ زى بتاع أفورديت ؟؟

متخاذلى محمد محمود ومجلس الوزارء :

وهو أيه اللى واده هناك ؟؟
شيخ الازهر : عدم اصطحاب الرئيس لى فى هذة العمرة خلل فى البروتوكولات الرئاسية
سعد الكتاتنى : عقبال العودة يا ريس ......" عودة المجلس يعنى "
حازمون و6 أبريل يسقط الاعلان الدستورى المكبل


وهكذا سيبقى كل فريق أعمى لا يرى ألا من ثقب أبرته الخاصة
بعد عام ونصف أقولها صدقا
لم يتعلم أحد الا القليل
الله يسامحهم من أنشأوا نظام التعليم المصرى الذى جعل كل الناس
حافظين ..... مش فاهمين

أنتهى



الاثنين، 9 يوليو، 2012

الدنيا زى الخيارة



صدق القائل " الدنيا دى زى الخيارة .... يوم فأيدك ... ويوم . ف السلطة "
انا شخصيا مش عارف هو ليه قال كده
هناك قصة فى الاساطير القديمة تقول : أنه كان هناك رجلا من عامة الشعب فقيرا وهناك رجلا غنيا ذو سلطة على هؤلاء الناس
المهم الرجل الغنى ذات يوم كان يأكل خيارة ... بيطرى بيها على قلبه عادى يعنى
فدخلت عليه أبنته البكريه ....
عندنا ف البلد بنقول على الابن او البنت أكبر أخواتها " البكريه " فوجدته يأكل الخيارة بيده فقالت له يا أبت أعطنى نصف هذة الخيارة لاقطعها فى السلطة
فقال لها الرجل الغني .... لا وحياة أمك عشان عندى حرقان ف فم معدتى
مرت سنوات وكبرت البنت وتعلقت بشاب وسيم هو أبن الرجل الفقير وأتفقا على الزواج
ذهب الشاب الملىء بالطموح الى المشير ... أقصد الى الرجل الغنى وقال له زوجنى أبنتك
قال له نعم يا روح امك ... بنت مين يااااد
ونهره وسبه وأحتقره و المهم يعنى
بعد أن تعنت الاب ولم يوافق على هذة الزيجة الشرعية والدستورية لم يجد الشاب سبيلا سوى أن يغتصب أبنة الغنى
يغتصب فى لغه اهل الصنعه أى يأخذها عنوه من صاحبها فأتفق مع البنت وهربت من بيت أبوها وذهبت الى الشاب الذى تحبه
أستيقظ الاب فلم يجد بنته فأخذ يبحث عنها يمينا ويسارا مش لاقيها خالص !!!
ووجد رساله مكتوبة له على مراية التسريحه بالقلم الرووج
" عندما ولدتنى أمى ... فوضتك لرعايتى الى أن أبلغ الحلم واختار من يرعانى
 الان أصبحت بالغة ..........وأستطيع أن أختار
"

الخميس، 21 يونيو، 2012

مرسي..... رئيس مننا




الى الان مش قادر أتخيل أن المدنيين اللى زينا زيهم اللى بياكلوا أكلنا وبيشربوا من شربنا هيمسكوا البلد
يعنى لما شفت صورة بنت محمد مرسى اللى شبه أختى واختك وزوجتة اللى شبه أمى وأمك حسيت أننا بجد فى عصر جديد
عصر اللى هيحكم فيه البلد هيكون شرب بجد من النيل مش من أكوافينا وهيكون راجل غمس فول وطعمية ومش زينا


وهيمسك الشرطة أن شاء الله ناس مننا ناس زينا مش بشوات وبهوات بكرابيج وكأننا عبيد عندهم وكأنهم أشتروا البلد باللى فيها
وظابط أمن الدولة مش هيكلمنى كأنى جاسوس وخاين وأبن كلب عميل وهو الوطنى اللى بيحافظ على تراب مصر اللى انا اللى بتمرمغ فيه مش هو لانه أكيد أبن باشا برضو


لما مبارك جه يفتتح المصنع اللى بشتغل فيه,  أمن الدوله والحرس الجمهورى فضلوا أسبوع يفتشوا فى المدينة خرم خرم وعملوا ملفات لنص البلد  واللى أتعمل عليه حظر تجوال واللى أتحبس , ويوم الزيارة كان كل 2 متر واقف عسكرى وكل 100 متر فيه سلاح أربيجية مزخر وجاهز للضرب


بكرة هلاقى مرسى جنبي ف الصف ف المسجد والوزير كان معايا فى الشارع فى يوم م الايام


سنة 52 الشعب اللى اتمرمط بجد فرح بالثورة لانه هيخلص من الاقطاع ومن حكم الملك وظلم البهوات والبشوات واللى فرح بنجاح مرسى برضو هو اللى أتمرمط بجد فى حكم العسكر وأتظلم من الزباينه وم الشرطة ومن أمن الدولة ومن كل حرامى سرق مليم م البلد


أنا متفائل وفرحان وربنا يديم علينا الفرح ويبعد عننا العسكر والفلول ويتمها على خير 
مـــــــــدنية   حريـــــــه     عــــــــداله     نهـــــــضة

الأربعاء، 20 يونيو، 2012

قصة قصيرة

بسم الله الرحمن الرحيم
قصه قصيرة
خرج الطفل الصغير الذى لا يتجاوز السابعه من بيته متجها صوب السوبر ماركت لشراء شيكولاتته المفضلة كما اعتاد يوميا
واذا به فى وهو سائر فى طريقه يجد بوسترا لرجل ملتحى علاه التراب وأثرت فيه الرطوبة وعوامل الجو فبهت لونه وكادت أن تختفى ملامحه حتى الشعار أسفل الصورة لم يبقى منه سوى بعض الحروف التى تجمع كلمه
" ك ر ا م ا "  " نحيا" , شده هذا المنظر وظل متابعا الجدران مترقبا البوسترات عليها فوجد بوسترا برتقالى اللون لا يكاد يرى منه شىء سوى كلمة "  القوية ", أخذ يجمع الكلمات والحروف التى يراها فى ذهنه وبعد قليل وجد بوسترا أخر فيه صورة فقط لرجل ما أشبهه بصورة الشيطان التى رسمها فى ذهنه ,
لازال يجمع ويرتب هذة المشاهد فى ذاكرته بعدها وجد بوستر بقيت من محتواه كلمة
" و ا ح د " , ثم بوستر أخر فيه صورة مصطنعه لرجل يظهر فيها وكأنه حبوب وودود ولكن الصورة تفضح ما بداخله من شر متوارى تحت ابتسامته ويشع من عينية غضب مكظوم وحقد دفين ومكر .
فى أخر رحلة الطفل وجد بوستر لم يلوثه التراب ولم تقطعه الرياح بوستر ناصح صريح مفتوح به صورة لرجل طيب وجهه يشع كرما و مكتوب تحت الصورة شعار
" النهضة ارادة شعب "عاد الطفل الى بيته يحمل فى دماغة كل تلك الصور والشعارات التى جمعها من البوسترات المنتشرة فى الشارع وأخذ يقلب فيها يمينا ويسارا فتذكر حدوته من حواديت الجدة التى كانت تحيكها له عند نومه ,
أن هناك حمل طيب  وديع أراد أن يقيم مشروعا لينهض بالامه فذهب الى حكيم القرية لينصحه فنصحه حكيم القرية أنه يجب أن يكون عنده " أرداة " قوية   أن يبقى مع "الشعب" ولا يعيش ك "واحد" بل يعيش مع " الناس"  فالحياة مع الناس هى الحياة "القوية " فبالوحدة "سيحيا" الجميع "كراما",وأخبره أنه ان عاش وحيدا سيأتى اليه" الذئب"  الشرير وينقض عليه ويلتهمه وأن عاش مع الناس عليه أن يحذر فهناك "ثعلب مكار" سيأتى ليوقع الفتنة بينه وبين الناس حتى يقسمهم ويضعفهم ويفرقهم حتى تسهل  عملية التخلص منهم واحد تلو الاخر 
انتهى

الثلاثاء، 19 يونيو، 2012

مرسال غرامى



مبدئيا كدة أنا بكتب البوست ده وانا جعان و وشى متكعبل ف بعضه ولسانى قافش ف حلق بؤى وكل ما حد يكلمنى أقوله
هــــه !!
قلت للراجل يروح يجيبلى حاجة أفطر بيها وكوباية شاى تفوقنى ع الصبح أو ع الضهر عشان أعرف أركز وأشوف أنا هكتب أيه ف البوست اللى مش فايت ده
ماهى(  أم على )لو كانت حاطتلى حاجة أكولها زى كل يوم كان زمانى فاطر ومتهنى ....

هو أنا هكتب أيه النهاردة !!!! اه هكتب مهاترات

يبنى أخلص الله يهديك بطنى بتتقطع
أهو وصل الحمد لله وجابلى كيس شيبسى بطعم الملح أمزمز كده وأروق ونشوف الدنيا فيها ايه

فعلا يا أخى زى ما بيقولوا - عايز تأذى واحد تخيين .... جوعه
انا ما بحبش حد يلعلبى على الوتر الحساس " اللى هو بطنى " بصراحه"


دلوقتى بعد كيس الشيبسى وشوية الشاى اللى ف التمام أتغير المود ممكن نكتب حته رومانسى كدة من اللى انا ما بكتبهاش أساسا
يعنى لو أنا هكتب مرسال غرامى " من ربع ساعه وانا جعان وهنام على روحى " أكيد كنت هأبدع وهقول

حبيبتى الغالية (فاصل من التثاؤب ومش حاطت ايدى على بؤى مع أصدار شوية أصوات اللى أخرها دايما بيكون ......هاا أخخخ)حبيبتى الغالية أكتب اليك كلماتى هذه وانا فى حالة يرثى لها فعيناى زابلتان -أه  والله  -من قله النوم ووشى مكرمش لانى لسه صاحى من شوية صغيرين ويكاد قلبى أن ينفطر وينتاب جسدى رعشة عنيفه من قلة الاكل ويكاد الجوع أن  يعصف بى...... يفتك بى ..... يمزقنى .
وأنا أجاهد نفسى مرة ومرات ولكن ضعفت قواى وأنهار تماسكى فلم أعد أتحمل
وأخذ قلبى يدق ....يدق ....يدق 
وخلاص هيغمى عليا ....لحد ما جه "مختار" وجابلى كيس شيبسى وكوباية شاى
أعتب عليك عتابا مريرا مملؤا بالحب والحنان المرة الجاية ماتنسيش تجهزيلى فطار الله يخليك
وأخيرا جانب من الشدة حبيبتى ...عارفه لو أتعمل فيها كده تانى مش هعديها بالساهل !!!!
أكيد هروح أضرب شيبسى وأمزمز ميرندا برضو زى كل مره
وختاما
أذكرينى عند بذوغ ضؤ الفجر, وأذكرينى عندما تلوح الشمس  ف الافق
أذكرى أنى هروح الشغل الصبح وهحتاج أنى أفطر فلا تحرمينى
توقيع
المعذب : أبو على

الأربعاء، 13 يونيو، 2012

سيارة بيجو





يحكى أنه كان هناك 7 أخوة ورثوا قطعة أرض صغيرة لا تصلح للقسمة عليهم فأقترح عليهم أحد العقلاء أن يقوموا ببيعها وشراء سيارة بيجو "7 راكب" وتشغيلها أجرة وتقسيم الايراد عليهم
الطبيعى أنهم يستأمنوا أحدهم يتابع السيارة ويجمع الايراد - ولكنهم جميعا يخوونون بعضهم البعض فقرروا أن يتابعوا السيارة جيمعا ويجمعوا الايراد جميعا ويصرفوا على السيارة جميعا
ف ركب السبعه فى السيارة مر يوم ويومين وثلاثة ولا يوجد أيراد للسيارة


تناقلنا هذة النكته وضحكنا عليها لسنوات طويله ولكننا اليوم نقوم بتمثيليها على الواقع


أخوانى الاعزاء
اذا ظللنا جميعا نخوون فى بعضنا البعض ونترصد لبعضنا البعض فسنظل ك السبعه أخوة راكبون فى السيارة ..فمن أين سيأتى الايراد ؟؟
الاحزاب مخونه بعضها والمفكرين مش طايقين بعض وكله عايز يمشى لجنة الدستور على مزاجه وداخلين فى الشهر التالت ومش عارفين نختار اللجنة وسنظل واقفين فى نفس النقطة وستظل السيارة البيجو لم يركب فيها زبون حتى تتحرك




نخلص من دى نخش على الشعب شوية هيطلعوا يقولولك اللجنة التأسيسية دى لا تمثلنا
بروح أمك انت وهو هيه ناقصه خلف خلاف ماصدقنا بوسنا أيد الاحزاب والسياسين هتطلعولنا انتوا
هو مش كان فيه أتفاق أن كل دور الشعب هو أختيار مجلس الشعب ومجلس الشعب هو اللى يختار التأسيسية ؟ يبقى تحط حاجة ف بؤك وتنقطنا ب سكاتك ولما يجى دورك فى الاستفتاء على الدستور أبقى أتكلم
مش كفاية شوية الاحزاب بتوع " لأ مش هنلعب " تلاقى الحزب من دول ليه كرسى ولا كرسيين فى المجلس وعامل شبه الخازووق يوقف المراكب السايرة .... والله العظيم الاخوان همه الاغلبية أنتوا لسه مش مصدقين ؟؟


عموما يا حبايبنا يا ناس زى الفل ... غدا ستحكم المحكمة بعدم دستورية المجلسين وهيتحلوا ولا هيتكتب دستور ولا هنشوف وشه
وخلونا خلف خلاف خلف الله مخلوف ويا شماتة الفلول فينا
انتهى

الأحد، 10 يونيو، 2012

مواليد برج العذراء




القصة بكل بساطة أنى من مواليد برج العذراء . ايه المشكلة بقى ؟؟
يقول علماء الابراج ايه بقى بالصلاة على النبي محمد صلى الله عليه وسلم
وأنا أصلا مش عارف ليه سموا البرج دة كدة ولا ايه اصلا فكرة الابراج دى بالظبط كل اللى اعرفه أنهم جمعوا سلوكيات اللى أتولدوا ف الشهور دى ولقوا انها متشابهه " ربما"
عموما قال علماء الابراج عن العبد لله الماثل أمامكم ما يلى :
- يسيطر دائماً على عواطفه،
-ربما يُتهم بأنه بارد، لأنه يسعى جاهداً الى السيطرة على عواطفه،
من أولها كده ...عموما شكرا يا سيدى على ذوقك -أوقات العمل عنده مقدسة , صادق , حازم ووفي , قليلا ما يجد لنفسه متسعا من الوقت للراحة , وهذا لا يزعجه لأنه بطبعه ليس من هواة اللهو والتسلية , جلسة مريحة في البيت حيث جو من الهدوء والضمانينة أهم عنده من رحلة بحريةأيوة كدة الله يكرمك فكها شويه -دائم الاشراق يليق به لقب الاميرلاااا دأنت فكيتها على الاخر -يميل الى الانتقاد ولا يمتنع عن الصراحة الجارحةعايز تقول " مدب " ومكسوف يعنى
-رجل عاقل موصوف بحكمته وحسن تدبيره يعشق الحقيقة والعدل
-غضبه يختبىء وراء هدوئه وبسمته
-ويعرف كيف يتجاهل إذا دعت الحاجة إلي ذلك
-يتميز بالذكاء المتوقد والقدرة على التكيف
-مناقش بارع
- عيناه تشعان ذكاءاً
-يتميز بالعبقريه والمهارة والمرونه
-انه اعظم مراقب ومحلل تعرفه في أي مجال


-ينظر الى الامور بعين فاحصة وشامله اكثر من بقية المواليد
-ويعتقد البعض انه خطير في وضع الخطط
أيه يعم أنت بتتكلم عنى ولا عن مانويل جوزيه ؟؟
-انه بحق انسان وصولي
الله يسامحك-فهو ناقد من الدرجة الاولى وهذه صفة فطريه فيه ناقد ناقد يعنى مش اى كلام-العذراء ذو طبع خجول جدا -وصولي . اناني . وبخيل لا يحب مشاركة احد في اغراضهانا مش هكمل  لو فضلت على النغمه دى -ينغمس في اللهو والملذات التى تجلب له الفرح والسعادة وتعفيه مما يحاصره من اضطراب وتفكير دائم وقلق صح فعلا عندك حق-المولود العذراء محبوب جدا . رغم طباعه الحادة ونقده الجارح . شخصيته مهيبة ووقورة وملفته للنظر
-من الصعب على العذارء ان يسيطر على نفسه رغم مظهره البارد . فهو عندما يغضب يكون وقحا اذا استفز أو اجبر على هذا التصرف
may be yes & may be no 
-يكره الاعتراف بالخطأ . انه ليس شريرا . نواياه حسنه . لا يضمر الشر لاحد
الله يخليك-فانه يميل الى الكسل والمماطله  لانه لم ينته بعد من تجميع الامور ولم يتوصل الى تحليلها النهائي
-بسبب تبذيره وحبه للفخامة والبذخ يصرف ما يكسبه
-والطعام يفضله لذيذا اكثر مما لو كان صحيا . لانه معرض للسمنه
هو شافنى قبل كدة الراجل دة ولا اية ؟؟






-العذراء شديدو الذكاء، يمتازون بالدقة والحكمة والصبر
-التعود على كبت المشاعر وإخفائها يؤدي بهم إلى خلق علاقات سطحية مع الآخرين وإلى قلة عدد الأصدقاء.
-مواليد العذراء يمتازون بالعقلانية والمنهجية والمنطقية في أسلوب تفكيرهم
-ويحترمون وجهات نظر الآخرين.

أنا شايف أن الراجل دة بيثبتنى يشتم وبعدين يرجع يلم الدور وساعات يقول الصفه وعكسها .
عموما أنا شبه مقتنع بالكلام ده وأن كانت الدايرة وساعه شويه وكل شخص بيختلف عن الاخر حتى لو كانوا من نفس البرج لكن بيكون بينهم تشابه كبير جدا

















الأربعاء، 6 يونيو، 2012

سلة بيض



هناك أماكن وشخصيات ومواقف تقبع فى ذكرياتنا وتظل قابعة فى حته معينه من ذكرياتنا
على الشمال كدة فيه سلة  قابع فيها شوية ذكريات مرصوصه جنب بعضها زى البيض بالظبط وأمبارح وانا قاعد بفتش فى ذكرياتى أتكعبلت فى السلة دى




كنا شباب زى الفل فجأة طل علينا برنامج ف الراديو سبقه كميه أعلانات رهيبة أنه برنامج الحيارى والمعذبين ف الارض وأصحاب المشكلات العاطفية..... أنا ...و النجوم ... وهواك  مع أسامه منيير


أستغفر الله العظيم على أم ده برنامج وعلى ده راجل كدنا أن نصاب بالشلل الرعاش فعلا يستحق مكان كبير فى سلة البيض القامعة على جنب فى ذكرياتى




الاستوديو التحليلى


قبل الماتش بساعتين يبدأ الاستوديو التحليلى للمباراه بحضور نخبة من النجوم العالمية الكابتن مصطفى عبده الكابتن ابراهيم يوسف والكابتين مجدى عبد الغنى والمعلق الكابتين أحمد شوبييييير يفلقونا قبل الماتش بالخطط والتكتيكات وكأننا هنشوف ماتش كورة بحق وحقيقى , ويبدأ الماتش بين فريقي الترسانه ومزارع دينا – طبعا دى مش كورة دى لعبه الحوكشه أو السبع شقفات اللى كنا بنلعبها فى ابتدائى ,وبعد الماتش يفضلوا الاخوة الكباتن قاعدين ساعتين بيحللوا الماتش ..ماتش ايه بروح تييييتك انت وهوه
هو انتوا مش وراكو شغلانه تعملوها ف بيوتكم .روح يا جدع منك له ساعدوا مراتتكوا فى تنضيف البيت جاتكوا القرف عليكو وعلى دى كورة
ويقولك دى بقى لو كان شاطها بوش أم رجله الخارجى الملفوف كانت عملت سكرو
سكرو عليك وع اللى علمك

*

شو عام بتعمل حبيبى وحدك ؟
نور !!! ايش صاحكى ها الحين ؟
يعنى شخصيات بتلزق و مختارين لغة بتلزق وجايبين مسلسلات بتلزق وأسماء المسلسلات بتلزق سنوات الضياع ... العشق الممنوع .... المسلسل الجاى هيكون سنين أمك السودة
فاكر مرة زمان جابوا مسلسل كورى او يابانى كان حاجة كدة مش فاكر كان أسمه – أوشين - شوف فرق الاسماء بس
*

كنت فى أبتدائى كان فيه اختراع بيبوظ لنا يوم العيد أسمه الافلام الهندى – الفيلم يبدأ الساعه 2 الضهر عادى جدا زيه زى أى فيلم شويه يقلب بغم والبلد كلها تولع بجاز ويعيش منها عيل صغير بس – تلف الايام والنسين والواد يكبر ويروح يحب بنت الشرير اللى قتل عيلته و ف كل الافلام أسمه " جبارسنغ " – ندخل على فاصل من الاغانى اللى كلها زى بعضها ولازم حركات الشلل فى الرقصات بتاعتهم – وكل الممثلين بيعرفوا يغنوا
بعدها بساعتين نخش بقى ع السخن والدعك ولحظة الانتقام – المغرب يأذن عندنا ف مصر – يخلص الانتقام والشرير يموت ويسيب سر خطيير جدا وف الاخر تتطلع البنت اللى بيحبها تبقى فى الاصل أمه – والفيلم يخلص بعد العشاء وكل عيد وانتم طيبين
*



أعتادوا كل سنه – ايام أبتدائى برضوا- يعملوا حاجة اسمها فوازير رمضان واللى بتعمل الفوازير دى لازم تكون راقصه درجة أولى, ومقدمة الفوازير نص ساعه اوبريت رقص والختام كذلك والحلقه كلها ما بتكملش دقيقتين وكله ف الهايف
*

مدرس اللغة الانجليزية أيام ثانوى :
بكرة عندنا ورك بوك ..كله يجيب معاه الكتاب الاخضر أوعوا حد ينسى . علمتونا الجهل أيها السادة
*



البنت أو الولد اللى أمه تبقى شغاله مدرسه معانا فى نفس المدرسة يخبر أبيض على الشلل
اولا لازم الولد ده يبقى رئيس الفصل , كل المدرسين والمدرسات يقدموله فروض الولاء والطاعه وينادوله بأسم الدلع الى امه بتناديه بيه ,ويوم الامتحان اللجنة كلها تقف جنبه وتساعده ف كل سؤال ,أوعوا حد من الطلبه يزعله اللى يدوسله على طرف يترفد تانى يوم م المدرسة أو يتضرب لحد ما يبان له أصحاب
*



مديرك ف الشغل – تبقى عامل شغل فل الفل وتقرير حاجة ماحصلتش ونتائج مبهره وتروح تقدمة لمديرك يكون تعليقه الوحيد على الموضوع


كلمه dosnt ليه ماحطتش الابستروف قبل ال تى عشان تبقى كده doesn’t






أحنا أسفين يا ريس






































الثلاثاء، 5 يونيو، 2012

قدامى 7 عربيات وأفوول




شعب ما يجيش غير بالعين الحمرا . العربيات ملت البد والتقسيط مخلاش حد نفسه ف حاجة نقول للشعب يا شعب يا عظيم تعالوا نعمل يوم أٍسبوعى مانركبش فيه العربيات أو حتى يوم شهرى ,ويكون يوم غير محدد عشان كل مجموعه تقاطع العربيات وتمشى على رجليها فى يوم من ال 30 يوم بكده هيخف الضغط ع الطرق وهتقل الزحمه وهيقل التلوث ونوفر الوقود والناس هتخس م المشى .

لكن ولا حد كان بيعبر , الى أن وصلت الوزارة الجديدة بارك الله فيها, الجنزورى ماشى ف الشهر السابع أهوه – ربنا ينتعه بالسلامه – والراجل عارف هو بيعمل ايه

4 شهور أزمة غاز – 4 شهور أزمة بنزين وسولار بالتناوب يومين يقطع البنزين الملاكى يتركن ف الجراجات ويومين يقطع السولار النقل يقف ف نص الطريق والمكروباص يتوقف حاله .


والشعب بعد ما كان فاضى للسياسه دلوقتى يدوب يروح الشغل ويرجع م الشغل ياكل لقمه ع السريع ويجرى يلحق مكانه فى صف البنزين أو فى طابور الانابيب

 
وشاعر الثورة دلوقتى بيكتب دواوينه وهو واقف فى طابور البنزين أخر قصائدة

" قدامى 7 عربيات وأفوول ........ وبكرة هنعيد م الأول "

" يا حبيبى على نار هستناك .....وبكره جاى مش هيطوول "



فى أحد برامج التوك شو

المذيعه :ومعانا على الهاتف المحلل السياسى الدكتور سعد عبده

المذيعه : ايه رأى حضرتك فى الحكم الذى حكم به القاضى على مبارك والعادلى ؟

الدكتور سعد : أحب أقول للجمهور أن الحكم ده" فاضى" من الجوهر لان مبارك وأعوانه قتلة الثوار يجب أن يحرقوا ببنزين 92 – هو بيحط بنزين 80 عشان كدة أختار 92 مش هيفرق معاه -



وزى ما بتوع وزارة التعليم عملوا فى الامتحانات وكتبوا فى أمتحان التعبير : أكتب موضوع عن حمايه المجلس العسكرى للثورة ,أجاب بعض الطلاب الثوريين : يسقط يسقط حكم العسكر .

ف أخر السنه هيكتبوا فى امتحان الكيمياء ماهو الفرق بين بنزين 92 وبنزين 80

وهيجاوب واحد من اللى أتبهدلوا فى طابور البنزين برضو يسقط يسقط حكم العسكر


أخر مرة رحت طابور البنزين كانت الجمعة اللى فاتت بس عملت حسابى الحمد لله جهزت الشنطة وفيها ما لذ وطاب وشويه تسالى ودخلت نت من على الموبايل

وكان يوم جميل بصراحه ماحسيتش بالوقت شغال ع الفيسبوك بأيد وبقطع أناناس وباكل بالايد التانيه وفيه ناس بتولع " راكيه" ومعاها عده الشاى والسكر ولا فيه أى مشكله أنا بفكر المرة الجايه أخد العيال معايا كأننا طالعين رحله وأخد معايا مضربين الراكت وكورة السله وناخد الغدا واللب والفشار وانزل بالشورت والكاب ونقضى احلى يوم ف طابور البنزين .




فليعلم الجميع أننا شعب لاننهت أبدا والتاريخ خير شاهد على ذلك , فالسابقون منعوا عنا الحشيش قمنا بالثورة وقلبنا عليهم البلد .. هتمنعوا عنا البنزين هنولعلكوا ف البلد .

وكما قال ريتشارد قديما : أنكم تحرقون أغصان الزيتون.

وقال بعده القذافى بمئات السنين : من كان بيته من الزجاج فلا يحدف الناس بالحجارة

ثورة ثورة

















الأربعاء، 30 مايو، 2012

قرار ادارى

قررنا
عمل اشراف على التعليقات عشان اللى عايز يقولى كلمه فى السر بقول براحته
شكرا لاستخدامك ألو

الخميس، 17 مايو، 2012

كوكتيل من مهاترات مفقوع

يا قاعدين يكفيكو شر الجايين




سنه ونص مستنين رئيس و البلد اللى من غير رئيس زى المعزة من غير تييس
كله بيتحرش بيها
**************************


قالوا تحيا الثورة ويحيا الشهداء هنجيب الحق لأم الشهداء .. وهم يسعون فقط عشان ام الكرسى
قديما كانوا ينادون بتغيير الكرسى بأخر تيفال حتى لا يلتصق فيه رئيس


واضح انهم جابو كرسى مغناطيسي ينجذب اليه المرشحين
****************************


أيام العزوبيه تعلمت الطبخ حتى لا أغسل الصحون فقانون بيت العزوبيه أن الطباخ لا يغسل الصحون
وقانون العزل أن الفلول لا يحكمون
وسبحان الله طبقنا القانون بدون الحاجة الى مجلس شعب منتخب ولا محكمه دستوريه


*****************************
مجلس الشعب والمجلس العسكرى بيفكرونى بحنفى .وأم حميدة
حنفى هو ." مجلس الشعب " وام حميده " المجلس العسكرى "


حنفى : انا اللى الشعب أنتخبنى وانا اللى بحط القوانين فى البلد دى وكلمتى ماتنزلش الارض أأأأبدااااااا


أم حميدة شاخطه فى حنفى : حنفييييييييييييييي


حنفى مكسكسا للوراء : خلااااص تنزل المرادى
******************************


مرشحى الرئاسة بيطلعوا ف التليفزيون الايام دى أكتر من " مهند بتاع المسلسلات التركى"


بيطلع المرشح على القناه ويجيى حواليه " حريم السلطان " يسلوه ف كل حاجة من أول " فاطة" لحد " العشق الممنوع"
وأخر الليل  " مطلوب رجال " يحللوا تعليقات المرشح


*****************************
أيها المواطن الكادح اللى ماطلعش ولا مرة فى برنامج توك شو واللى عمرك ما خبط على بابك مرشح للرئاسه وقالك شبيك لبيك رئيسك وملك أيديك تطلب ايه


نصيحتى لك أن تكتب ورقه بها كل طلباتك الشخصيه والخاصه جدا وترفقها بأستمارة انتخاب الرئيس وتضعها ف الصندوق لعل وعسى حد يفتكرك
**************************


الحب هو ذلك الاحساس الذى يجعلك تقترب ممن تحب ممسكا له بيدك اليسرى سكينا وبيدك اليمنى وردة وتقترب  ..تقترب  اكثر ثم تقول له بلهفه .... ادى أم الوردة اللى كان نفسك فيها استريحتى ....أبقى خدى بالك م العيال يا باتعه ... وتتوكل على الله






يا كاتما بين أضلوعى محبته ... نطق قلبى بما عجز عنه لسانى


فافتح أبوابك لتيار الهوى ........ وأغمض عينيك حتى ترانى


أنا من عاش عمره يخفى. سره .... وبعيدا عن الناس كان مكانى


لا أبوح ولا احرك ساكنا ..... وفى ليلى ووحدى كنت أعانى


تركت زحام أماكن العشاق..... ولذت بأماكن الأموات عسانى


لا يسمعنى أحد ف يحسدنى....... ولا يرى دموع عينى أنسانى


ملكت العقل والقلب والعمر والروح.... وبسحرك ملكت كل كيانى


ايه ياد الحلاوة دى دانت بتشعر اهوه يا معلم
***************************
علمونا فى الابتدائى أن سنة 2000 دى هنشوف فيها العجب - فاكرين العربيات اللى هتمشى بعصير القصب والكلام ده -
طبعا انا دلوقتى نفسى أشوف اللى كان كاتب الموضوع ده عشان أ***** عليه


من كام يوم " على " كان ماسك سكينه فحد حب يخوفه انه يمسك سكينه عشان ماتيعورش فقاله : اوعى تمسك سكينه تانى السكينة دى  بتاع الشيطان !!!
ومرة تانية كنت بحط بنزين وحد حب يعلم الولد ليه احنا بنحط بنزين فى العربيات وقاله ان البنزين دة هو الاكل بتاع العربيه لازم نأكلها عشان تمشى
فى كلا الحالتين كان موقفى واحد - مش لازم نعلم الولاد خرافات عشان لما يكبروا ما يلعنوناش زى مانا بلعن بتاع عصير القصب
نعلمهم الحقائق - مش هيفهموها النهاردة بس بكرة هيفهموها


**************************
كل يوم يسألنى حد : هتنتخب مين ؟
ساعتها يعجز لسانى عن الاختيار وعقلى عن التفكير
بعد ما كان صوتنا ما بيأثرش ...... كدة كدة الريس كان بينجح بنسبه 99.9 %
أتى اليوم الذى أصبح لأصواتنا تأثير ......... ولا نجد من يستحقه