الثلاثاء، 3 يناير، 2012

المدونة اتسرقت

مش عارف دى مشكله بلوجرز ولا المدونة اتسرقت منى
بس هتتسرق على ايه يا حسرة
قلت يمكن فيه ايادى خفيه بتتلاعب بأمن المدونة
أو الطرف التالت وصل لحد عندى
أو مجهولون
أو أطفال الشوارع ايديهم امتدت الى المدونة
أو حملات اعادة الامن اللى عاملها الوزير الجديد
أو يمكن المدونة مخرومة زى شبكه الجون بتاع المحلة
أو بتوع التفتيش عن التمويلات الاجنبيه دخلوا هنا يتفتشوا يمكن جوجل بيمولنى ولا حاجة - انا اصلا مش عارف اشترك فى اعلانات جوجل

من هذا المقام وبعد عودة المدونة أقول  لكل من تسول له نفسه ويمد ايده عالمدونة
أقول له بكل صراحة وجرائه وشجاعه : يعم اتنيل ..فكك منى
ولا بلاش دى هعمل فيها مناضل وطنى وكأن المدونة منبر من منابر الثورة وهعيش دور مصطفى كامل أو احمد الشحات او احمد حرارة
وهقول بلهجة ثورة
لن نسمح ...لن نسمح
اه لن نسمح

ودى رساله لكل الاحزاب والتيارات اللى طنشوا لما حصل اللى حصل عند مجلس الوزراء
واللى واكلين عيش وفلافل مع المجلس .... بماذا تبرروا سكوتكم وحنيصتكم على سرقه مدونتى ؟؟
ياريت محدش يقولى : وهو ايه اللى نزلها الشارع اصلا وازاى هيه لابسه من غير هدوم