الاثنين، 27 فبراير، 2012

قليل من الماء يطهره



سئل شيخ من الشيوخ أياهم
ماذا نفعل فى هذة المصيبه لقد " شخ الكلب " على الجدار ...أفتنا يا مولانا
تنحنح الشيخ وقال :
أهدموا هذا الجدار وأبنوه سبع مرات ليتطهر من نجاسه الكلب

قالوا : لكن هذا هو جدار بيتك يا شيخ
قال الشيخ
جدار بيتى ...!!!!
أذن قليل من الماء يطهره

*************
يا اعضاء مجلسنا الكرام الذين أنتخبناهم
هذا اعتراض منى على ما جرى من سيادتكم تجاه النائب المحترم مصطفى بكرى والنائب زياد العليمى
تحت قبة البرلمان أمام مرأكم ومسمعكم يسب مصطفى بكرى الدكتور البرادعى
والراجل قاعد ف بيته فحاله أو عمال بيبوس ف المزز وبكرى بيشتمه وبيستهزء بيه فى المجلس والاخوة الاعضاء بيضحكوا
هل هذا نائب محترم ؟؟؟" الذى استهزء ..والذى ضحك على الاستهزاء ؟؟؟

فى النهايه يصوت السادة الاعضاء المحترمين على برائه مصطفى بكرى كبرائه الذئب من دم بن يعقوب
يا فرحت أمكوا بيكم وانتوا فرحانين وبتباركوله

وهو عشان زياد غلط فى الحج تعملوها كبيرة من الكبائر ؟؟ هى فعلا كبيرة انه يشتم الحج او يصفه انه حمار
لكن هو الراجل غلط ؟؟؟
احنا هنرجع تانى للخيار والفاقوس يا حضرات النواب المحترمين ؟؟

من رضى بالظلم اليوم.... سيتجرع كأسه غدا

الأحد، 26 فبراير، 2012

الجدول



تعلمت كتابه الجداول وانا فى الصف الثالث الاعدادى ف
كنت استغرق وقتا فى كتابه جدول " خطة الحياة " شهريا او اسبوعيا - كنت أكتب تفاصيل التفاصيل
متى سأأكل ومتى سأشرب ومتى سأرقد ومتى سألعب ومتى سأقضيها وأمتى هذاكر خلال الشهر او الاسبوع القادم
فى النهايه كانت نسبه تطبيقى للجدول لا تتعدى ال 60 % وهذة النسبه تمثل دقديرا " أمتياز " لأنى لو طبقت الجدول بنسبه أكبر أكيد كنت هاكون مكان زويل او فاروق الباز ... وانا مش عايز أقطع على حد فأكتفيت بال 60 %
وطبيعى جدا أن بعد فترة الجدول يتلخبط ويبوظ وارجع اجلس نفس الجلسه وأاخذ نفس الوقت فى ترتيب حياتى
قبل الرحلات وضعت جدول قبل المشروعات وضعت جدول وجدولا لتسديد المديونيات وأخر لاقامه الشعائر والعبادات
واخر للاعمال اليوميه الروتينيه



وهكذا التزمت بوضع الخطه والسير عليها فى حياتى شهورا اتابع الجدول وشهورا متكاسلا حرا طليقا بلا قيود وبلا جدوى  او بلا جدول
مرت سنوات وتذكرت اليوم اننا نعيش حياتنا بلا تخطيط فترانا كرياح عاصفه تموج يمينا ويسارا بلا هدف واضح وفى النهايه تضيع زهرة عمرنا هباءا
تذكرت المثل القائل
FAIL TO PREPARE IS PREPARE TO FAIL
الفشل فى التحضير و التخطيط هو التخطيط للفشل
فأذا كانت الاهداف والغايات مبهمه اذا نحن نسير فى طريق أعوج كالذى يتخبطة الشيطان من المس مصيبتين طريق أعوج وشخص متخبط ... لا يرجى له وصول


أحن الان الى الماضى فما أجمل اللحظات التى أمسك فيها  قلما وورقه وأكتب ماذا اريد وماذا سأفعل ومتى سأفعل أشعر وقتها وكأنى أنجزت الاعمال من قبل أن أِشرع فيها
لكن نفسى الكسوله تجلعنى أسوف هذا الامر يوما بعد يوم ......................  الان أقول لها يومك يومك - الان الان
قررت قرار الان وانا أكتب هذا البوست أننى لن أقوم بنشره الا اذا اعددت الجدول المبدئى للاسبوع الحالى


********
بعد ربع ساعه
******
ان العمر لحظات تفنى .......فهنيئا لمن ف الخير أفناها
فيا مضيعا عمرك سدى ...  اما آن للحياة أن نحياها






الخميس، 23 فبراير، 2012

البتاعة دى ...... حررررراااام !!!







الشيخ عبد المنعم الشحات عمل زلزال لما أفتى بحرمه أدب نجيب محفوظ الذى يصف بيوت الدعارة والراقصات و ..و ..و..البلد اتقلبت وكأن الراجل عايز يرجعنا لعصر الجاهليه - عذرا فعصر الجاهليه كان فيه ما يسمى بالغزل الصريح الذى حرمه الاسلام -
أذكر تلك القصيدة الشعريه اللى كنا بندرسها فى سنه أولى ثانوى " معلقه الاعشى"


وَدّعْ هُـرَيْرَةَ إنّ الــرَّكْــبَ مــرْتَــحِــلُ وَهَـلْ تُـطِــيـقُ وَداعـاً أَيُّـهَـا الـرَّجُــلُ؟
غَـرَّاءُ فَـرْعَـاءُ مَـصـْقُـولٌ عَـوَارِضُـهَا تَمشِي الهُوَينَا كَمَا يَمشِي الوَجي الوَحِلُ
كَـأَنَّ مِـشْـيَــتَـهَا مِـنْ بَـيْـتِ جَــارَتِـــهَـا مَـرُّ الـسَّـحَـابَـةِ ،لاَ رَيْـثٌ وَلاَ عَــجَــلُ
تَـسمَعُ للحَـلِي وَسْأوَاسأاً إِذَا انأصَرَفَـتْ كَـمَـا اسـتَعَـانَ بـرِيـحٍ عِـشـرِقٌ زَجِـــلُ
مش ده شعر برضو وأدب وحاجة زى الفل

فى النهايه ماذا دخل الى مخيله طالب فى سن المراهقه - طبعا بعد ما المدرس ترجملنا البلاوى دى - سوى كيف أكتب شعر غزل صريح بمفاتن النساء وما هى تلك المفاتن أصلا وماذا كان يستهوى رجال العرب من النساء

معروف بعدها توجهه المراهقين الى شعر نزار قبانى الاباحى

ماذا جنينا من تلك القصيدة الغزليه الصريحه الابداعيه؟؟ لا لا لحظة واحدة كدة


هرجع ورا سنه وانا فى الصف الثالث الاعدادى واحنا لسه ماطلعناش من البيضه بنتفرج على مسلسل " لن أعيش فى جلباب ابى " فى أحدى الحلقات تم التركيز على كيف كان عبد الوهاب بن عبد الغفور البرعى يشاغب مع المدرسين و " ينونو " يقوم المدرس يلتفت ويدور على من الفاعل


تانى يوم رحت المدرسه وفى حصه اللغه العربيه و الابله عزة مش واخدة باله وجيت قايل " نياااااااووووو "


تقريبا الابله عزة كانت لسه شايفه المسلسل وقالت لاااااا لست انا اللى يتعمل فيا كدة

راحت اول حاجة ضربت الجانب اللى سمعت منه الصوت كله ماعدا تختة المتفوقين " انا وتلاته زمايلى يعنى "


ولمت علينا المدير والناظر ومشرف الفصل وعملوا لجنه تحقيق لمعرفه من هو الفاعل

وبما أنى كنت لسه مادخلتش جو الاجرام فأعترفت من أول قفا وأترفدت ... واستدعاء ولى الامر والخ الخ


ماذا جنينا من هذا المشهد المبدع فى مسلسل عبد الغفور البرعى ؟؟

دخلنا الثانويه وأمتلانا خبرة فى المشاغبه من مسرحيه مدرسه المشاغبين بل كنا أشغب من مدرسه المشاغبين


وبهدلنا شويه المدرسين الغلابة اللى فى سن أبائنا وامهاتنا



ماذا جنينا من المسرحيه الابداعيه " مدرسه المشاغبين "؟؟


ناهيك عن أفلام الغرام لعبد الحليم حافظ

والرويات التى كنا نقرأها ويشار الينا مثقفين ونحن نقرأها فى هذا السن



ماذا استفدنا من روايه مبدعه فى الادب الرومانسى سوى كيفيه تظبيط بنت الجيران واللقائات بعد منتصف الليل





بالمثل : عندما يكتب مبدع ويصف كيف تحولت أمرأه عفيفه جميله ضاقت عليها الدنيا الى راقصه ماذا سنجنى من هذا الابداع سوى توجه نسائنا الذين يمرون بهذا الظرف نفسه التوجهه؟؟





كم روايه أبداعيه وصفت وعلمت الرجال كيف يوقعون النساء والعكس ؟

كم عمل أبداعى علمنا كيف نجرم ونسرق ونخطط ؟

كم عمل أبداعى ربى فى شبابنا البلطجة والعنف ؟

كم عمل أبداعى علمنا تعاطى المخدرات وشرب الخمر ؟

كم رواية أبداعية وصفت خيانه زوجة لزوجها مع صديقه والعكس ؟؟

كم روايه أبداعية وصفت ذلك الموظف المسكين اللى اتزنق ف قرشين واختلسهم من خزينه الدوله ؟

 نحن لاننكر الابداع .. ولكن ننكر وصف العرى ووصف الفحشاء وكل ما يخالف معتقداتنا ونشرها فى مجتمعنا لتعلم ويقلدها الجميع


نحن لا ننكر وجود تلك الجرائم فى مجتمعنا ولكن وصفها وتضخيمها ونشرها فى أخبار الحواث يجعلها تنتشر ويتعلم منها الجميع فبعد ان كان عندنا عاهره واحدة أصبحنا كما قيل " لو كل واحد تحته واحدة رقاصه ........"


و بعد ان كان عندنا بلطجى واحد أصبح الجميع " الفتوة"






بالعقل










الأحد، 19 فبراير، 2012

توافقى عليك وعلى اللى جابك

احدث نكته نزلت السوق دلوقتى هيه نكته الرئيس اللامؤخذة التوافقى .
وكملة توافقى تنضم الى الكلمات والمصطلحات اللى ما شفناهاش غير بعد أم الثورة دى اللى ملت البلاد مصلحات غريبه
القصد
قررت السيد المهتم بهذا الشأن بعمل تقرير من الشارع عن مدى فهم الناس لكلمه توافقى
هاخد الكاميرا والمايك وأنزل اسأل الناس
أول واحد قابلته أفندى كدة شكله موظف حكومة
أنا : ايه رأيك ف الرئيس التوافقى الراجل أول ما شاف الكاميرا قعد يلمع فى شعره وينضف عينه من العماص ويشاور لعياله فى البيت
واتنحنح وقال : احنا مع الريس وبنحب الثورة ومصر هى أمى وهنضحى بروحنا فدا ترابها وقعد يعيط
ستوب
يارريس صلى على النبي كدة واهدى الله يكرمك
واضح ان الكاميرات بتجيب هتسيريا للشعب بلاها كاميرا ولا مايك تعالى نسأل الناس بوقيقى أو بؤئيئى

قابلت عيل سيس من بتوع البنطللونات الساقطه
ايه يا برنس عامل ايه سمعت عن حوار الرئيس التوافقى ؟؟

قشطه يا با طبعا الرئيس توافقى
هيجيبوا المرشحين فى المجلس واللى يقولوا عليه موافقه يبقى هو ده الرئيس التوافقى ..قشطه  ممممممممموه

واحد تانى
سمعت عن الرئيس التوافقى

الرئيس التوافقى ده هو الرئيس اللى هتوافق عليه أمريكا

 تالت
الرئيس التوافقى
ده الرئيس اللى هيبقى توافقى ف كل حاجة بالصلاه على النبي كل ما هيقلوله حاجة يقلوله " توافقى ياريس " هيقولهم " توافقى " ما بيرفضش حاجة أبدا

راجل غلبان واقف على كشك العيش
ايه رأيك يحج بيقولوا هيجيبوا رئيس توافقى
ياريييت هو فين ده من زماان انا طول عمرى بطالب برئيس توافقى


واحد ليبرالى
ايوة ايوة الرئيس التوافقى ده اللى هيطيبق الليبراليه الحديثه والحريات المطلقه ويكون توافقى كدة مع روح العصر


واحد ثورجى :
الرئيس التوافقى ده بقى أخر لعبه من ألاعيب المجلس العسكرى والفلول والطرف التالت لكن وعليا التوافقى ماهنسيبهم


 بنوته
الرئيس التوافقى ده احلى هديه بنقدمها لمصر ف يوم الفالنتينز داى

ست بتبيع خضار
توافقى... توافقى يابنى بس المهم نلاقى ناكل
محامى
الرئيس التوافقى ده يتناقض تماما مع الدستور وخاصه المادة 48 و 49 وانا أطالب بتأجيل الانتخابات لحين حل هذة الاشكاليه


الدكتور يجي الجمل
احنا لو جبنا رئيس توافقى مش هيوافق عليه 70 % من الشعب ... وقال مثال تانى أستغفر الله العظيم

عمرو خالد
الرئيس التوافقى يا جماعه يا اخوانا يا اخوانا يا اخوانا لازم نبقى توافقيين مع نفسنا ما نخليش الشيطان يضحك علينا

ميمى الشربينى
الرئيس التوافقى  لازم يكون من مواليد أكتوبر شهر العظماء طبعا


 مدحت شلبى
يا سلام على الطعامه والحلاوة والظرافه والرشاقه أيوة كدة أيوة كدة هو ده الشغل العالى يبنى تسلم أيدك ووالديك يبنى

علاء صادق
الرئيس التوافقى هو لعبتون جديدتون من ألعابى أتحادى الكرتى للغطرستى على فخيم عمر ومصائبه التحكيميه

الشيف شيربينى
الرئيس التوافقى ممكن نعمله بالبسطرمة أو باللحمة المفرومه المهم  لازم يستوى كويس فى الفرن عشان الوش يكون أحمر

عماد حمدى " الخطايا "
أخرج برة بيتى أنت مش أبنى أنت توافقى وراح لاسع عبد الحليم على قفاه



مبارك
طيله ثلاثون عاما كنت فيها نعم الرئيس التوافقى لنعم الشعب التوافقى ايضا

عمر سليمان
يعلن الرئيس التوافقى تخليه عن منصب رئيس الجمهوريه ويفوض المجلس التوافقى لادارة شئون البلاد والله الموفق .الرئيس التوافقى الحق
الرئيس التوافقى الحق هو الرئيس الذى يثور ليهدم الفساد ثم يهدأ ليبنى الامجاد
السلفيين
الرئيس التوافقى هو الذى يحكم البلاد فيما لا يخالف شرع الله عفاف شعيب
احنا عايزين اى رئيس توافقى وخلاص لان مافيش بيتزا فى البلد والرئيس التوافقى بيقولى يا خالتو انا عايز بيتزا وانا مش عارفه اعمل ايهتوفيق عكاشه
قال رئيس توافقى قال - طب قولى يا رئيس ياللى أمك سمتك توافقى تعرف ربطه الجرجير فيها كام عود يا حلو انت يا مقطقط ياللى عاملى فيها توافقى ؟؟

البرادعى
الرئيس التوافقى يا منى
هو الرئيس اللى يخلص ثورته ويروح يبوس موزته يعنى بيوفق بين الاتنين الثورة والبوسكفايه كده لان الناس شكلها مش فاهمه اى حاجة
ويبقى السؤال التوافقى يا ترى يا هل ترى مين هو أم الرئيس التوافقى اللى كل الشارع بيتكلم عنه وبيتخيله ؟؟
التوافقى هنا يرد علينا

الخميس، 16 فبراير، 2012

تدوينه أهداء للراحل جلال عامر



سبحان الله خلق البنى أدم منا كل يوم فى شأن وحال فأحيانا يخيم على قلوبنا الغم والهم نعوذ بالله من الهم

الى ان يرزقنا الله بواحد صابحنا من المروقين يزيح عننا الهم والغم

وسبب الهم معروف لكل المصريين الاختراع اللى اسمه البيع بالتقسيط

فكل المصريون يشترون بالتقسيط و يتزوجون بالتقسيط حتى الكفن يتعاقدون عليه بالتقسيط

ممكن بعد يوم او كام ساعه تزول حاله الهم دى وتتبدل بحاله من السعادة والضحك والتفاؤل



لكن ست الحاجة اللى هحكيلكوا عنها دى حاله نادرة بمعنى الكلمه

جلست تشكو معامله ابنها لها وقسوته عليها الى أن بكت وأبكت كل الحاضرين بنحيب يعنى بكاء من القلب زى ما بيقولوا

انا قلت اه هى بدأت اليوم بنكد وغم دا يوم  باين من أوله

فجأه وبدون مقدمات دخلت تحكى عن جارتها اللى جوزها طلقها لما غلطت وعملت الطبيخ بالسكر مش بالملح وأنقلبت من البكاء والعويل الى الضحك الهيستيرى فى زمن قياسى لا يتعدى الدقيقتين

أخذت تمثل الخناقه اللى دبت بيت جارتها وجوزها وتضحك الى درجة انها كانت بتتمرمغ فى الارض من الضحك ونسيت ما بها وما فعله ابنها معها



يالك من شعب اذا حاربت وانتصرت ضحكت واذا حاربت وهزمت ضحكت واذا اغتنيت ضحكت واذا افتقرت ضحكت

اللهم دمها علينا نعمه واغفر للراحل جلال عامر كان يضحكنا فى عز الازمات بكلماته الساخرة  ويبكينا بكلمات ساخرة  اللهم تغمده برحمات من عندك






الثلاثاء، 7 فبراير، 2012

ميين اللى سرق البطة ؟؟!!



فى أحداث محمد محمود اتهمت الداخلية الثوار بأنهم يهجمون على مبنى وزارة الداخلية والعساكر الغلبانين بيدافعوا عن المبنى والثوار ولاد التتيييييت اللى عايزين يخربوا البلد بيحدفوهم بالحجارة والمولوتوف

لكن الثوار فضحوهم ف كل الوسائل الاعلاميه وصوروا الخرطوش وقنابل الغاز اللى كان بيتحدف عليهم وهمه معتصمين فى حالهم فى الميدان



ثم تكرر المشهد فى أحداث مجلس الوزراء

الثوار يحكون عن سحل الجيش لهم

والجيش يحكى عن حرق المجمع العلمى و ضرب الثوار للجنود بالطوب وشتمهم والاشارة لهم باشارات بذيئه" اشارات بذيئه يعنى بصباع ابراهيم حسن "



وهكذا وهكذا كل يوم الموقف يتكرر مما أعاد الى ذهنى الاستكتش اللى كنا بنمثله ف كل رحله كنا بنعملها - كل مرة كنا بنمثله تقريبا لاننا مش عارفين غيره



أستكتش " مين اللى سرق البطة "



يقف المنتج السينيمائى المصرى الغلبان أمام المخرج الاجنبي اللى أتورط فيه عشان يخرج له فيلم يكسر الدنيا


الخواجة : خبيبى انا بقالى شهر بدور على ممثلين ممثلين بجد مش لاقى اى حد بيعرف يمثل فين الممثلين المصريين الاصليين خبيبى

المنتج : يا خواجة مانا جبتلك كل الممثلين وانت اللى مش بيعجبك حد


الخواجة : وانت بتسمى المهرجين دول ممثلين دور أرجوزات خبيبى


المنتج يرد عليه وهو خلاص جاب أخره من المخرج ابن ال ... اللى مطلع عينه ده : بس يا خواجه انا المرة دى جايبلك اتنين ممثلين أنما أيه على كيفيك
وينادى .. يا محمدين .. يا حسنيين

يدخل محمدين وحسنين اتنين لابسين اللبس الصعيدى الاصلى والعمم



المنتج : أتفضل يا خواجة دول أجمد اتنين ممثلين يارب بس يعجبوك - يا محمدين يا حسنين ابوس ايديكم أعملوا اللى راجل ابن التيييت دة عايزة عايزكوا كدة تمثلوا وتندمجوا وتعملوله أحلى شغل


محمدين وحسنين : ان شاء الله هتعمله أحلى شغل



كلاكيت " مين اللى سرق البطة " اول مرة


محمدين يقول لحسنين بطريقه الكلام العاديه بدون اى تكلف : حسنين انت اللى سرقت البطة يا حسنين

حسنين يرد بنفس الطريقه : لا والله مش أنا يا محمديين


محمدين : لا انت اللى سرقت البطة يا حسنين


حسنين : لا والله مش انا يا محمدين

محمدين : لا انت اللى سرقت البطه يا حسنين

حسنين : مش انا اللى سرقت البطة يا محمدين


محمدين : هطخك يا حسنين


حسنين : لاء يا محمدين


محمدين : طاخ طاخ طاخ


حسنين : أى أى أى


المخرج يتشال ويتهبد فى الارض ايه ده انا عايز حرارة سخونه سرعه فى المشهد



كلاكيت " مين اللى سرق البطة " تانى مرة - سرعه وحرارة



محمدين يقول لحسنين بسرعه وكأنك بتجري الشريط وحرارة وصوت عالى : حسنين انت اللى سرقت البطة يا حسنين

حسنين يرد بنفس الطريقه : لا والله مش أنا يا محمديين


محمدين : لا انت اللى سرقت البطة يا حسنين


حسنين : لا والله مش انا يا محمدين

محمدين : لا انت اللى سرقت البطه يا حسنين

حسنين : مش اللى سرقت البطة يا محمدين


محمدين : هطخك يا حسنين


حسنين : لاء لا يا محمدين


محمدين : طاخ طاخ طاخ


حسنين : أى أى أى



المخرج بنفس الطريقه يتشال ويتهبد ف الارض مش دة اللى انا عايزة انا عايز برودة ف الاداء اووووف


كلاكيت " مين اللى سرق البطة " ثالث مرة - برودة ف الاداء



محمدين يقول لحسنين وكأنه سقعان وبيتكتك وبيطلع الكلام ببطىء شديد ومقطع : حسسسنييييين انت اللللللى سرررقت الببببطة يا حسسسسنين

حسنين يرد بنفس الطريقه : لا والله مش أنا يا محمدييييييين


محمدين : لا انت الللللللى سرقت البططططططة يا حسنين


حسنين : لا والله مشششش انا يا محمدين

محمدين : لا انت اللى سرقت الببببطه يا حسنين

حسنين : مش انا ااااا اللى سرقت الببببطة يا محمدين


محمدين : هطووووووخك يا حساااااانين


حسنين : لاااااااااء لااااااء يا محمدين


محمدين : طااااااخ طااااخ طاااااخ


حسنين : ااااااأى أااااااى أااااى



المخرج بنفس الطريقة يوووووه انا عايز كوميديا عايز ضحك جتكوا القرف


كلاكيت " مين اللى سرق البطة " رابع مرة - كوميديا


محمدين يقول لحسنين وهو ميت على نفسه من الضحك : حسنين ههههه انت اللى سرقت البطة يا حسنين هههه

حسنين يرد بنفس الطريقه : هههه البطة ؟ هههه لا والله مش أنا يا محمديين


محمدين : لا انت هههه اللى سرقت البطة يا حسنين هههه


حسنين : لا والله مش انا يا محمدين ههههه

محمدين : لا انت اللى ههههه سرقت البطه هههههه يا حسنين

حسنين : مش انا ههههههههه اللى سرقت البطة يا محمدين


محمدين : هطخك يا حسنين هههههه


حسنين : لاء هعهعهعهع لاء هه


محمدين : طاخ هعهعهع طاخ هعهعهع طاخ هعهعهع


حسنين : أههههه هههه أه أه ههه



المخرج أبو أم التمثيل على اللى عايزين يمثلوا انا عايز رومانسيه يا بقر



كلاكيت " مين اللى سرق البطة " خامس مرة - رومانسيه يا بقر



يستلقى محمدين على الارض مستندا بظهره على حسنين الى استلقى فى الجهه الاخرى


محمدين يقول لحسنين بكل حب ورومانسيه مستوحيا من طريقه عبد الحليم حافظ : حسنين انت اللى سرقت البطة يا حسنين " تسبيله وتنهيده


حسنين يرد وهو متقمصا دور زبيدة سروت : لا والله مش أنا يا محمديين "تنهيده طويييله"


حمدين : لا انت اللى سرقت البطة يا حسنين " ههااااا"


حسنين : لا والله مش انا يا محمدين " بوسه عالهوا"

محمدين : لا انت اللى سرقت البطه يا حسنين

حسنين : مش انا اللى سرقت البطة يا محمدين


محمدين : هطخك يا حسنين " تنهيده طويله يعقبها عمزة عين "


حسنين : لااااء لاااااء " وتبدأ الدمعه تفر من عينيه"


محمدين : طاخ وهو يتألم لتألم معشوقته طاخ وقلب بيتقطع يا عينى طاخ


حسنين : أه أه أه



المخرج لسه هيقوم ويزعق يقابله محمدين وحسنين ويشيلوه ويرزعوه ف الارض