الأحد، 25 مارس، 2012

الاخوان ... الاخوان ... الاخوااان


عناوين الاخبار خلال عام


الاخوان المسلمين ... يدعون مظاهرات فى كل انحاء الجمهوريه للمطالبه باقاله حبيب العادلى والغاء قانون الطوارىء
الاخوان يرفضون الدخول فى مفاوضات مع عمر سليمان
الاخوان حموا الثورة والثوار  فى موقعه الجمل
الاخوان هينافسوا على 30 % من المجلس ... لا لا على 50 % من المجلس
الاخوان هيعملوا فريق كورة و شركه انتاج سينيما
الاخوان .. مش هنرشح حد  للرئاسه ولا نسعى للسلطه
الاخوان وجمعه قندهار
الاخوان.. فين الاخوان... أحنا بندبح فى محمد محمود
الاخوان حصلوا على اغلبيه مجلس الشعب ومن حقهم تشكيل الحكومة
الاخوان أبرموا اتفاقيه مع المجلس العسكرى وباعوا الثورة ودم الشهداء
الاخوان هندعم  مرشح توافقى للرئاسه
الاخوان بيناقشوا بجديه الدفع بمرشح للرئاسه من الجماعه
الاخوان بيفقدوا شعبيتهم ومصداقيتهم بعد وصولهم لاغلبيه مجلس الشعب
الاخوان هيسحبوا الثقه من الحكومة


الاخوان وصلوا للنهائى وبينافسوا المجلس العسكرى ع الكاس 

الثلاثاء، 20 مارس، 2012

حداااااد







مات شنودة (بابا الاسكندريه وبطريرك الكرازة المرقسية) وحصل تباين ف رد فعل الناس والتباين الاكثر فى رد فعل الاعلاميين على سلوك بعض الناس وتفخيمهم وبروزتهم لمواقف بعض الناس بصورة محرضه على الطائفيه
الموقف كالتالى

توجهه جهلاء الدين ..أو الناس اللى مش فارق معاها دين الى الاستغفار له والترحم عليه
وتوجهه البعض من باب أذكروا محاسن موتاكم -  بوصفه بالوطنيه والقوميه مفتخرا بقرارة بعدم زيارة المسيحين للقدس وهى محتله - او وهم بأيديهم المسلمين - ورفضه للتدخل الخارجى لحل مشاكل الاقباط
و الاخرون تركوا كل شىء وقالوا انه هو من بارك على مشروع التوريث وكان ضد الثورة الخ الخ
وهاج أخرون وتذكروا المسلمات الاتى عذبهن فى الكنائس والاديرة حتى ارتدوا عن الاسلام
والاخرون الذين وصفوه بأنه
رأس الفتنه وأمام الكفرأما عن موقف حزب النور الواضح فكان أول المعزيين لنصارى مصر فى مصيبتهم فيما لا يخالف شرع الله
وأخيرا : اعلان الحاكم الحداد فى البلاد ثلاثه ايام وهذا لم يعجب البعض فقريبا مات كبار علماء الازهر ولم يفعل لهم ما فعل لشنودة
تعليقا على ما سبق أولا وقبل كل شىء اقدم التعازى للنصارى فى مصيبتهم ونسيبنا بقى من شغل المداهنه فلنا ديننا ولهم دينهم ونحن نراهم كفار بعقيدتنا - وهم يروننا كفار بعقيدتهم والموضوع ده خلصان مش هنقعد نحكى فيه طول عمرنا

وهناك فيديو لشنودة فيه أنه لا يجوز الترحم على غير المسيحي هذا ما يوافق معتقدهم
وهو ايضا ما يوافق معتقدنا - كقول ربنا :
مَا كَانَ لِلنَّبِيِّ وَالَّذِينَ آمَنُواْ أَن يَسْتَغْفِرُواْ لِلْمُشْرِكِينَ وَلَوْ كَانُواْ أُوْلِي قُرْبَى مِن بَعْدِ مَا تَبَيَّنَ لَهُمْ أَنَّهُمْ أَصْحَابُ الْجَحِيمِ
فنحن كمسلمون لا نترحم على كافر بالعكس كان النبى صلى الله عليه وسلم اذا مر بقبور المشركين بشرهم بالنار
لكم دينكم ولى دين
انتهى

ثانيا : الميت قد أفضى الى ما قدم وحسابه على الله فكان مع التوريث مش مع التوريث عمل سوى... حسابه  الان على الله
ثالثا : الذى أضاع حق المسلمات هو الحاكم

رابعا :  للنصارى حق علينا كما شرع لنا الله
وكما علمنا نبينا محمد صلى الله عليه وسلم فلهم منا المعامله الحسنه والبر وينقسم البر الى قسمين :

1- فيما لا يخص شعائر الدين-    فكما قال ابن القيم فى أحكام اهل الذمة - أن التهنئه بولد او غائب او سلامه من مكروه أوالتعزيه جائز ولكن  بكلام ليس فيه ما يدل على الرضى بلمتهم
2- فيما يخص شعائر الدين - كأعياد الميلاد والقيامه الخ الخ - فلا نهنىء فيها النصارى - يقول ابن القيم انها أشد من تهنئه القاتل على قتله وشارب الخمر على شربه والزانى على الزنا

خامسا : ارى أن حزب النور ( أسف نسيت اضيف كلمه السلفى ) فيما لا يخالف شرع الله قد سلك الصراط الصحيح وكسب به القلوب
فلم يداهن ويبارك لهم ف الاعياد ..وفى المصيبه كان اول المعزيين

سادسا : اقامه الحداد ف البلاد -بما أنه حصل وخلاص -  هذا تفضل من الاغلبيه للاقليه وحسن جوار لهم - فأنتم تقدسون البابا ونحن لا نقدس رجالا فافعلوا ما شئتم في موتاكم

لكم دينكم ولى دين ..ومن ديننا ما يوجب علينا حسن جواركم بما لا يخالف الدين

الثلاثاء، 13 مارس، 2012

نتائج أم الثورة

بسم الله الرحمن الرحيم
فى هذة اللحظة الفارقه سأكتب فيها نتائج الثورة المصريه من وجهه نظرى كمواطن أنوي " بتشديد الياء "  عايش ف أم البلد دى


















من وجهه نظرى ان النتيجة الاولى للثورة المصريه هى

- أتخرب بيتى ك موظف فى شركه قطاع خاص بعد خصم الحوافز والبدلات وأغلاق الشركة الجزئى
 وحالى دة طبعا أحسن من ناس تانيه كتير أتشردت وأنطردت من شغلها
ف المقابل ارتفاع حوافز موظفى الحكومة الى 400 % وزيادة الاجور لكل قطاعات الدوله ومن أهمها وزارة الداخليه اللى الثورة أصلا قامت ضدها أصبحوا أكثر المستفيدين منها


ثانيا :














أنتظارى كل مرة أفكر أستحم فيها نص ساعه عشان أسخن شويه ميه على البوتوجاز اللى شغال بالغاز  الطبيعى أو سخان الشاى اللى شغال بالكهرباء - نظرا لانى مش عارف اغير أنبوبه السخان بقالى تلت شهور - ايام مبارك كانت أزمة الغاز لا تتعدى شهر واحد دلوقتى الموضوع دخل ف تلت شهور - نفس المشكله طبعا فى البنزين والعيش اللى كانت اتحلت مشاكلها فى أخر  عصر مبارك


ثالثا:
محاكمه رموز النظام السابق وفرحتنا بيهم وهمه لابسين أزرق ف أزرق - أعتقد ان النقطة دى ممن نحذفها قريبا - بعد البرائه


رابعا :




عرفنا يعنى ايه حزب وطنى لما شفنا الاشكال اللى ف مجلس الشعب - لا هم رجال اعمال ولا اصحاب سلطات دول ناس غلابه زينا
الغلبان ده ان شاء الله هو اللى هيراعي حق الغلبان - بس لما يفوقوا من صدمه دخولهم المجلس


خامسا :
كنت بسافر زمان وانا خايف ان واحد غبى من بتوع أمن الدوله يثبتنى - دلوقتى بخاف اخرج من البيت لبلطجى يثبتنى


سادسا :
انى شاركت فى اختيار من يمثلنى ف مجلس الشعب - وبشارك فى  اختيار رئيس للبلد - زمان طبعا كنا موكلين الحزب الوطنى يعملنا القصه دى بالنيابه عننا


سابعا :
كنت فاكر ان لما مبارك هيموت مش هنلاقى حد يمسك البلد دلوقتى أكتشفت ان البلد فيها مليون رئيس - شوفوا نسبه سحب مظروف الرئاسه


ثامنا :






















ان الحمد لله مش هنشوف أبن أمه صاحب  الوش العكر ده فى قصر الرياسه


تاسعا  وأخيرا
حسبى الله ونعم الوكيل


ولا يوم من أيامك يا مبارك

الأحد، 11 مارس، 2012

تتجوزينى ؟؟!!




من ذكريات الماضى الطريفة

تتجوزينى


أول مرة حد يتبلى عليا كنت ف تانيه ابتدائى وكنت من العيال اللى مش ف دماغها خالص
داخل الفصل بعد الفسحة ما خلصت لقيت الابله " حياة " لسه فاكر اسمها لانها اول واحده تضربنى ظلم
وجابت خرطوم و فين يوجعك خير يا ست الكل حصل ايه جرى ايه
أنت بتقول للبنت " ساميه" - تتجوزينى – يا قليل الادب .. دببببببببببب
أأأأأأأأأأه
والله العظيم ما قلتلها حاجة ولا شفتها طول الفسحه
وكمان بتكذب .....دببببببببببببببببببب
أأأأأأأه
انا أٌقول لبنت تتجوزينى وانا مش واخد بالى – دة حتى ما ينفعش
وبعدين دى "ساميه" يعنى زيها زى أخويا الكبير بالظبط
الموضوع فضل شاغلنى فترة كبيرة جدا أكونش قلتلها كدة من ورايا !!!!!
أو قلتلها بصوت واطى فأنا ماسمعتش !!!!!
لدرجة انى سألت زمايلى اللى كانوا بيلعبوا معايا طول الفسحه
يا أخوانا حد منكم شافنى بقولها – تتجوزينى -
بعدها عرفت يعنى ايه حد يتبلى على حد
لكنى شكيت ف نفسى لما الموضوع اتكرر مع بنت تانيه فى السنه اللى بعدها !!!

ضربنى بالطوبة ف راسى
فوجئنا فى الصف الرابع الابتدائى ان هناك ترابط من نوع أخر بين افراد الشله ألا وهو فن كرة القدم



الرعل وزيزو وجدو و عبد ربه وانا كنت رأس الحربه وكملنا الفريق


ف أولى اعدادى لعبنا أول ماتش رسمى مع فريق ثانيه اعدادى – رسمى يعنى على فلوس – كل واحد ف الفريق دفع ربع جنيه و الفريق اللى يكسب كل واحد ياخد نص جنيه


الماتش الرسمى الاول لينا وعلى ربع جنيه فكنا متوترين جامد جدا عشان دى هتبقى مصيبه لو خسرنا الربع جنيه


والتوتر كان باين عليا وعلى باقى اللعيبه بس انا كنت أكترهم توتر مش عارف ليه


لدرجة انى كنت السبب ف الخسارة الرسمية الاولى ف حياتنا


لما جدو رفعلى كورة على راسى بالظبط وانا والجون وحطيتها برة الجون – دى المصيبه الاولى


المصيبه التانيه واحنا فى منطقه الجزاء بتاعتنا واحد شاط الكورة جت ف دراعى غصب عنى والله


واتحسبت ضربه جزاء وخسرنا الماتش وكنت انا السبب الرئيس ف الخسارة


خلص الماتش وانا خارج من الملعب لقيت حجر نزل على رأسى " أأأأأأأأأأأه " واترميت ع الارض ومسكت رأسى – بعدها قعدت أدور على مين ابن التيييت اللى ضربنى محدش اعترف


بس طبيعى انه واحد من اللعيبه ماتحملش خسارة الربع جنيه اللى انا كنت السبب فيها وراح باطحنى


بعد ماتش البطحة ربنا كرمنا واخدنا بطولات بس مش من أم ربع جنيه – وكنت انا هداف الفريق – ودى كانت أول وأخر بطحه






جهاز مخابرات فى مدرسة ابتدائى


قررنا عمل جهاز مخابرات سرى – أظن الحوار دة بعد ما شفنا رأفت الهجان – أخترعنا شفرة جديدة لكتابه الرسائل السريه  


وبدأنا نرسل خطابات سريه بين اعضاء المنظمه


أحنا كنا ف خمسه ابتدائى وكنت انا والعضو التانى فى المنظمة أصلا قاعدين ف نفس التخته يعنى الموضوع مش مستاهل شفرات ورسائل ومخبأ سرى للرسائل وأصلا كنا بنتجسس على مين ده الواد والبنت اللى كانوا شايفين نفسهم الفصل او احنا اللى كنا بنتخيل ان بينهم حاجة – خمسه ابتدائى اساسا احنا ما كناش نعرف الالف من كوز الدرة -


المهم عملنا المنظمة السريه وأخترعنا الشفرة ودورنا على مكان ف الفصل " سرى برضو " ونكتب الرسائل – من ماركه – الحق الواد بص للبنت – الواد مشى ورا البنت – البنت بتضحك وبتبصله – الواد راح الحمام – البنت بتاكل ساندوتش جبنه


العميل التانى قاعد جنبى فالاتنين زمايلنا اللى ف التخته اللى قدامنا لاحظوا بعد كام يوم كده انه فيه حاجة ما!!! سريه بينا وقعدوا يدعبسوا عشان يكتشفوا المنظمه السريه بتاعتنا – وقع ف ايديهم كام رساله من رسايلنا السريه طبعا لانها مكتوبه بالشفره فما حدش فهم اى حاجة ودة خلاهم يتجننوا ويصاحبونا عشان يتجندوا ف المنظمة السريه بتاعتنا


بصراحه احنا لما لاقيناهم لزقولنا جندناهم ف المنظمة السرية للمخابرات الابتدائية ودربناهم على التجسس وكتابه الشفرات
وبردوا قعدنا نراقب نفس الولد ونفس البنت طول السنه







الطالب المثالى !!!


وانا ف أولى ثانوى كنت من الاوائل ف الترم الاول وبخاصه فى الرياضه والفيزيا


دة اللى خلى الابله ليلي مدرسه الرياضه تحترمنى وتقدرنا ويكون ليا مكان ف قلبها


وبما أنى شكلى مؤدب ومحترم وهادى – طبعا ده الظاهر بس


فأنطبع السلوك دة جوه الابله ليلى لدرجه انى كنت لما بشاغب ف الفصل تضرب الواد اللى جنبي


على فكرة الواد اللى جنبي كان هو هو نفس الواد بتاع جهاز المخابرات بتاع خمسه ابتدائى-


المصيبه انها أختارتنى الطالب المثالى عن الفصل – انا فضلت مستغرب نفسى يومين ع الموضوع ده !!!


ف سنه تالته ثانوى كان بيدرس لى رياضه ا/ عبد الباسط وف يوم كنت مزود عيار الشغب معاه حبتين لدرجة انه طردنى من الفصل وقرر استدعاء ولى أمرى


فرحت بعد الحصه ألم الدور معاه ومن حظى الحلو ان الابله ليلى تكون معاه ف المكتب –وهيه بصراحة قامت بالواجب بدل منى وقعدت تقول عنى كلام انا اول مرة اسمعه ف حياتى لدرجة انى أفتكرتها بتتكلم عن واحد تانى


الابله ليلى : يا استاذ عبد الباسط معلش هيثم ده من أكتر الناس أحتراما وأدب وشاطر لكن شويه العيال اللى معاه ف الفصل همه اللى عملوا فيه كدة معشان خاطرى تسامحه المره دى وهو مش هيعمل كدة تانى


وانا واقف هعيييييط من الكلام اللى بيتقال عنى






لذلك فأن الانطباعات الأولى تدووووم






الأربعاء، 7 مارس، 2012

انا عايزه أتجوز " سلفى "


بسم الله


انتشر  فيديو للشيخ محمد اسماعيل المقدم من علماء السلفيه فيه ان " وائل غنيم " الماسونى التراباتونى البتنجانى هو مؤسس موقع islamway وأظن مافيش واحد ما يعرفش يعنى ايه اسلام واى ومافيش حد ما يعرفش ايه اللى أتقال عن وائل غنيم

وأنتشرت صورة لعمرو حمزاوى بيصلى جماعه ف بورسعيد ...

وأنتشر خبر سميه الخشاب اللى عايزة تتجوز واحد سلفى

وخبر غادة عبد الرازق اللى بتعلن فيه انها من الاخوان


كل دة زى الفل لكن
لما تنتشرت صور الحج البرادعى وهو بيبوس أنجيلينا جولى .... انا عارف ان كل اللى علقوا عليه علقوا عشان غيرانين منه أكيد !!!

ولا خبر ترشح هياتم لرئاسة الجمهوريه .. وطبعا دى مرشح ليه تقله برضو !!!

وروح أم الطرف التالت اللى سفر الامريكان

وخبر الشيخ البلكيمى اللى سمعنا كلام من اللى يسوى واللى ما يسواش

فى النهايه أقول
- أننا جبلنا - يعنى خلقنا ونحن نحب الطاعه فمهما أبتعدنا عن الله فى داخلنا ما يربطنا به فأذا لاحت الفرصه تجد أصل المعدن

- وأقول أن من أكبر الكبائر أن يسب الرجل والديه ....قالوا وكيف يسب الرجل والديه ..قال يسب أبا الرجل فيسب أباه
    فما نصنعه الان اننا نسب أبائنا ومرشحينا وممثلينا وقادتنا بسبنا والسخريه من من هم ضد أفكارنا

- أن الله ليغير بالسلطان مالا يغير بالقرأن " انا بكتب المعانى لاقتناعى بها - لكن قد تكون الاحاديث عن النبي صلى الله عليه وسلم غير صحيحه لكن المعنى هو المطلوب-
فأتجاه الدوله الدينى بدأ يدب ويؤثر فى مجتمعات كنا نظنها من أخبث الناس لذلك مطلوب منا السمت والخلق الحسن فمعلوم ان انتشار الاسلام فى الشام لم يكن بدعاه الى الله ولكنه كان بأخلاق التجار فمع الخلق الحسن والتأنى والصبر سيأتى الفرج بأذن الله

بأيدينا مصر بكرة أحلى


الاثنين، 5 مارس، 2012

يا ووااااد... يا ..مؤمن



صحيت من نومى فجأه
لقيتى كبرت فجأة وكبرت دمعتى
أشهر الاغنيات اللى اتخرم بيها ودانى وانا ف المكروباصات

ال ام ام يوو
أرخم اعلانات شفتها ف حياتى

مسلسل محاكمة مبارك
المسلسل الوحيد اللى اول حلقه فيه أجمل واشوق من الحلقه الاخيرة

برامج التوك شو
كوبى باست

مرشحى الرئاسة
محدش فاهم اى حاجة

فاصل ونواصل
من ابداعات الشيخ على جمعه

أنا عايز أعيييييط
ده حالى دلوقتى

سلفنى تلاته جنيه
أسم فيلم لعلى الكسار

ان كان ليك عند الكلب حاجة
هوهو له يمكن يفهم

يوم لك يوم عليك
ويم الجمعه أجازه

فيما لا يخالف شرع الله
اجمل أبداعات النواب

أنا عايز أعييييط
تانى...مانت عييط فوق مره

اللهم أنى أعوذ بك من الهم والحزن وأعوذ بك من العجز والكسل وأعوذ بك من الجبن وبالخل وأعوذ بك من ضلع الدين وقهر الرجال
اللهم أستجب

سؤال كان يراودنى ..لماذا ينتحر المنتحرون ؟ أغبيه دول ولا أيه
الاجابه : اللهم فرج همى


القرش الابيض ينفع ف اليوم الاسود
للاسف طلع ما ينفعش مع الايام التانيه زى الاحمر والاخضر

من ضربك على قفاك
لف وأضرب أمه بالشلوت

تعلم كيف تقول " لا"
وشوف حد ينقذك يا فالح

البرادعى " بعد الاستفتاء " : انا مع المادة التانيه من الدستور ومبادىء الشريعه الاسلاميه
يا واااااد يا مؤمن


من بات أمنا فى سربه معافا فى بدنه يملك قوت يومه فقد ملك الدنيا بأسرها
اللهم صلى على نبيك محمد ... قلت فأوجزت يا حبيبى
لا يشعربها الا من فقد أحدها

شم النسيم اقترب
وجب علينا تجهيز الكمامات اللى هنمشى بيها فى الشوارع

الفرق بين النصاب والحرامى والبلطجى
الضحيه بيبوس أيد النصاب عشان يديله فلوسه
الضحيه بيبوس أيد الحرامى انه يرجعله سجارة الحشيش اللى ف المحفظه
الضحيه بيبوس ايد البلطجى انه يقتل مراته



عليا الطلاج ما حاجة نافعه هيه خربانه خربانه
من حكم عم مكاوى الله يمسيه بالخير

عمال المصنع عاملين أعتصام دلوقتى وبيتهمونى أنى فلول انا وباقى المهندسين
من هذا المقام أقولكوا .... اه أنا فلول اذا كان عاجبكو

ف الختام أقول
زغرطى ياللى مانتش غرمانه


الأحد، 4 مارس، 2012

كلمات



أبنك ..
ده اللى بيطلع عينك عشان تتجوز وبيطلع عينك عشان يتولد وبيطلع عين أهلك على ما يكبر ويتربى ..

أمك
لن تجد ف العالم مثيلا لها ......
أبوك
كنت تكرهه وانت صغير لانه كان بيضربك على قفاك ...لكنه الان أحب الناس الى قلبك وتتمنى ان تكون له ترابا يمشى عليه .... لكن للاسف لم يعودك على التصريح له بأنك تحبه فأكتم الحب بداخلك

أخوك
رباك وربيته نصحك ونصحته وسلفك ... وأكلت الفلوس عليه

عمك
مش فاكره !!!

حماتك
زى الملح ........... راشقه فى أى أكله
مديرك
انت عارف انه كويس لكنك مصمم انه بيبيض عليك .... طب أسالك مرؤسيك عنك هتلاقيهم مسمينك أبو بيضه

خالتك
وحشتك

النيل
يااااه ... نسيته ونسيت أيام الصيد 

كيمو وزيزو ومون وميدو وقنش وكسكسه و جدو وبطه و الرعل و أوكس وعوض وخضرة و باليرينا و غشم
ذكرياتى الجميله مع أحب الناس

الترامادول
العقار الوحيد الذى يجعلك صاحب عقار من اول قرص

الانترنت
مقطع من اسبوع عشان سلك التليفون العمومى أتسرق بعد هيكله الداخليه والغاء قانون الطوارىء

الصبر
عندما أصبر أعلمه الصبر ... ولكن اذا نفذ صبرى.... لا أعى ما هو الصبر

حماتك
الشخص الوحيد القادر على أنفاذ صبرك فى أقل من دقيقه

 بنزين 80
بنزين ف التنك ولا ألفين فى البنك

صاحب الشركه بتاعتى
قال ان عصر الاشتراكيه والشيوعيه أنتهى من العالم ... وبعد ربع ساعه ساوى بين الفنى والمدير .. "من اول دعوتين المصنع ولع وبنطفى فيه دلوقتى"

الثورة المصريه
هى الثورة التى نتج عنها رفع حوافز مرتب موظفى الحكومة 400 % وزيادة المرتبات 200 %
وخراب بيت موظفى القطاع الخاص

مبارك
ولا يوم من أيامك يا ريس

الجنزورى ومبارك والمشير وشفيق و شرف ونظيف
ما أزفت من زفته ...ألا ميت غمر

الدكاترة
الله يخرب بيتكم زى ما خربتوا بيتنا
كنت عايز أطلع أبنى صيدلى .. بفكر أخليه دكتور عشان يمص دم الناس

الوطن
أيه ؟؟؟!!! ... بتقول أيه ؟؟

حبب الينا من الدينا ثلاثه
 : النساء ...... والمال ... والطعام
وكرهنا من الدنيا ثلاثه   
النساء .." الحموات - والزوجات اللى بيفتحوا حنفيه الهات هات"....
و المال " اللى استلفناه  ولازم نرده  ..."..
الطعام ..." اللى جابلنا تخمه وقرحه معده "

الفالنتينز داى
ألحروف الاولى من   "أرفض حدوث هذا "