الاثنين، 30 أبريل، 2012

الحل الجذرى لمشكلة التحرش الجنسي




فيه حاجات كتير فى البلد بتحصل وانا نايم على ودانى ولا ايه يا جدعان بيقولى بقى فيه تحرش جنسي دلوقتى والدنيا بايظة خالص والبنات مش عارفه تمشى فى الشوارع من كتر التحرش لدرجة أنى لقيت أعلان فى التليفزون من فترة كدة لجهاز قال ايه " مانع التحرش ".الموضوع بجد بقى !!!

تعالوا نتكلم بكل مهاترات " ملحوظة يكتب هذا المقال شخص عامل دماغ عالى جدا "
بكل تهريج ومهاترات الحل موجود وبدون ما نقعد نتكلم عن الموضوع وأبعاده ونحكى ونوسع ونعمل أفلام هندى.
هل هناك مشكله ؟؟ أى نعم هناك مشكله .... زى ما بيقولواما هى أسباب المشكلة ؟.الحرمان ... قله الادب ... السكوت عن المتحرش .. عدم وجود عقاب اجتماعى للمتحرش

كما تعلمنا فى حل المشكلات سنقوم بأختيار سبب واحد من أسباب المشكله ونبحث له عن حلول.
الحرمان السؤال : هل الحرمان سبب رئيسي من أسباب التحرش ؟.الاجابه وبكل وضوح نعمممممممم

ماهى أسباب الحرمان ؟

1- اعراض الشباب عن الزواج و الاكتفاء الذاتى

2- تكاليف الزواج الباهظة وتوقف الزواج على الانتهاء من الدراسه - البحث عن عمل - البحث عن شقه وكل مرحلة تحتاج الى تأبيدة " 25 سنه مع الاشغال الشاقة"  تقريبا حتى تنتهى

3- تأخر سن الزواج لدى الطرفين بسبب كل ما سبق

دة بالنسبه للعزاب ودول تقريبا خمسين فى المية من المتحرشين " انا ضارب الرقم دة لانى مش فاضى بقى اروح أقعد فى الاتوبيسات وعلى النواصى وفى الاسواق وأعد المتحرشين وأشوف مين فيهم متجوز ومين عازب

اذن ما هى اسباب حرمان أخوانا المتجوزين ؟

- السبب الاساسى هو العلاقات الزوجية الغير مستقرة والامر دة شكله منتشر جدا بعد ما قريت بوست حالا بخصوص الموضوع ده وكم المشاكل الزوجية التى دائما ما يتكتم عليها الزوجان

الان بعد ان حددنا المشكله وحددنا أهم أسباب المشكله وركزنا على أحد هذة الاسباب الا وهو الحرمان
 
ما هى الحلول المقترحه لحل مشكله الحرمان عند الشباب أو المتزوجين؟
أولا : ليه اهالى الشباب ما يجوزوش أولادهم وبناتهم  أول ما يبان عليهم البلوغ - يعنى نلاقى عريس وعروسه العريس ما شاء الله 16 سنه وفأيدة عروسته 14 سنه كدة شكلهم يفرح كدة ويكملوا تربيتهم تحت أيد أهاليهم زى ماهمه عايشين بالظبط هيكملوا دراسه عادى جدا
لا بنت هتشيل مسؤليه بيت ولا ولد شاغل باله بمصاريف وبكدة هنكون لمينا الواد بدرى بردى وحافظنا عليه
لو سيبنا الولد دة يتجوز فى سن التلاتين هيكون عاش 14 سنه تحرش .. دة هيكون تحرش  بنص بنات البلد

ثانيا : الاخوة المتزوجين هيحصل ايه لو كل واحدة متجوزة تبطل أنانيه شويه وتسيب هوايه حب الامتلاك وما تعكننش على جوزها وتسيبه يروح يتجوز عليها ... والله ده هيكون فى مصلحتها قبل كل شى.... واذا تعكننت الحياه مع زوجتين يبقوا تلاته يبقوا أربعه
ساعتها الراجل ده هيتهد ف أى بيت من بيوته ومش هنلاقيه ضمن لستة المتحرشين .. ولو تحرش نطخه ونخلص منه ..هنعمله ايه تانى ده

وهكذا نكون قضينا على مشكله التحرش اللى ماليه البلد وهنخش بقى على مشكله تانيه هيختعوهالى بعد الحل اللى اقترحته ده
قال ايه هيقولولى ايه التخلف والرجعيه والبهائمية دى  ... ولد يتجوز فى عمر 16 سنه والبنت فى عمر 14فين حقوق الانسان والمرأة
والمتجوزات هيقولوا : يا سلام ويتجوز عليا ليه يعنى هو ده الحل لا طبعا يتروح يتحرش أحسن

قال السادات قديما : أن 99 % من اللعبه فى يد امريكا
وقال مبارك من بعده : أن 100 % من اللعبه فى يد أمريكا
وأنا أقول الان : أن كل اللعبه بيد المرأة
أنتهى

الأحد، 29 أبريل، 2012

يا علماء السلفية .....أرجوكم لا تركبوا الموجة





كتبت هذا البوست من شهوور وأستحييت من نشره
موضوع ركوب الامواج دة بيكون دايما ف شواطىء المحيطات

وبما ان مصر ما فيهاش محيطات دة يجعل عقلى يشطط مما يحدث الان
فجأة تحول كل المصريين " كل بمعنى كل" الى ركاب للأمواج 

وكأنهم أتولدوا فى بقهم ألواح تزلج
بدأت الثورة التى قام بها كل المصرييين اللى طول عمرهم بيقولوا "لاء "
طول عمرهم بيحاربوا الظلم والفساد السياسى والاقتصادى
لو ذكرت أسماء هقول أبراهيم عيسى وهقول الاخوان المسلمون وهقول حمدى قنديل هقول البرادعى والجبهه الوطنية للتغير والشباب اللى اتعلموا منهم ومش هقدر أعد أكتر من كدة ....
ممكن كمان أقول الشباب اللى حاولوا يولعوا ف نفسهم قبل الثورة بكام يوم علشان الناس تصحى والحكومة تعرف ان الشعب مش ساكت وان عندنا ظلم زى تونس
لكن فجأة وبلا مقدمات أصبحت الثورة "ثورة الشباب"
هو حمدى قنديل ده مراهق مثلا ؟؟؟!!!!
ولا هما الشباب اللى عملولها وجه حمدى قنديل ركب الموجه؟؟؟!!!
طب الاخوان المسلمون كلهم شباب  ؟؟!!
وهنا كانت بداية الركوب ... ليكون الشباب هم أول من حمل لوح التزلج وركب الامواج ف مصر
فامتلئت الشاشات بالشباب " شباب الثورة" والشهداء" شهداء الثورة " حتى الشهداء للاسف ركبناهم الموجة
عملنا منشورات بشباب التحرير اللى ماتو ونزلت صورهم فى كل المحطات
والغلابة أول اتنين قتلوا فى السويس – اللى يعتبروا هم فتيل الاشتعال – لم يذكر أسماؤهم ولم تعلق لهم البراويز
ولم يعد لهم ألوح للتزلج
من بعد الشباب هب كل مصرى ليركب له حبه ....

وكما أن مصر أعظم الدول فأمواجها ايضا أعظم الامواج تكفي لكل المصريين لكل من جاء من  كل صوب ووادى
لم ينجوا احد من المصريين جماعات وأفكار وأحزاب ألا وركب الموجه
حتى الجماعه السلفيه والجماعات الدعويه الاخرى التى لم تشارك يوما ف الحياه السياسة وكرثت حياتها للدعوه اللى الله على بصيرة فكان دورها هو تعلم العلوم الشرعيه والدعوه الى رب البريه على بصيرة
هب مشايخها من كل زاوية و مسجد الجميع يتكلمون ويشحدون ويجيشون
فتكلم الدعاه فى الدساتير والقوانين  وف الاحزاب والفرق السياسة
حاربوا العلمانيين والليبراليين من فوق المنابر .........

اين الفكر الدينى السياسى من عشرات السنين ؟؟؟؟
ترك الملعلب لليبراليين والاشتراكيين على مر العصور .........

ومن أول يوم لكم فى الحياه السياسه تحاربون وتقطعون الرقاب !!!!!

يا سادة ..... يا علمائنا الافاضل
ليست هذة هى الحرية التى بغاها شعب مصر وثار لأجلها
وليست نتيجة استفتاء الدستور ب "77%" نعم" معناها ان المصريين يريدونها اسلامية وأن الحرب على العلمانيين نجحت
أيها السادة ..............تريثوا
لا احد ينكر حب الشعب للدين الاسلامى ..... وخوفهم من النار وحبهم للجنان
لكن أرجوكم
لا تركبوا الموجه..... حتى لا تفسدوا مصر .... علمتونا ....." لا تسأله الامارة" علمتونا ...... وعلمتونا

لكن اليوم مصر ليست امارة
أعتبروها بعثة جديدة بالدين الاسلامي
وأبدؤا بما بدأ به النبي صلى الله عليه وسلم
لن أشرح لكم كيف تدعو الناس و كيف تتعاملوا بحكمة فأنتم أدرى بهذا
لكن أرجوكم راجعوا التاريخ
تاريخ النبي محمد فى مكة وبعد الهجرة وكيف نشر الاسلام وحبب فيه فمن دخله فى أول الدعوه دحله عن حب واقتناع لم تحارب القبائل الا بعد انقضاء نصف زمن الوحى
مصر الان ف بداية الدعوه ......................أقصد ف بداية الدعوه لأقامة دوله أسلاميه
دعوتم لأقامة الدين فى أنفسنا عشرون سنه
أدعوكم للدعوه لأقامة الدوله الاسلامية خلال العشرون أو الاربعون سنه القادمة
راجعوا تاريخ الجزائر هدانا الله للحق
وما حدث بعد سنوات قلائل من الثورة – وبعدما أكتسح التيار الاسلامي المجالس والمحليات والرئاسة وساندهم الشعب لحبه للاسلام
ثم راجعوا أرواح الابرياء التى زهقت بعدها
..................................
لم يفتح الله عليكم مصر ........ فلم تجاهدوا أصلا !!!!
وجبت الجزيه على اهل الكتاب الذين الذين خيرهم الفاتحين المسلمين بين الدخول فى الاسلام أو دفع الجزية او الحرب  ثم اختاروا الجزية
أنتم ما فتحتم ولا غزوتم .............

فهل أخذ النبي صلى الله عليه وسلم الجزية من يهود المدينة؟؟؟!!!!!
................................
أريدها اسلاميه والله يشهد .....

لكنى لا أريد أن أرى دما مدنيا مسال ......
لا أريد حربا أهليه بين مصرى ومصرى مسلم ومسلم
أريد ان أرى حااكما ملتزما بشرع الله عادلا لا ظالم فقيه سياسى ودينى لا دينى فقط ولا سياسى فقط

أعلموا اننا مصرنا حديثى عهد ب ...... 
وأعلموا ان شعب مصر ثار من أجل الحريه ......
الحريه التى أستفدتم منها ........ فأدعوا الى الدوله الاسلاميه بحريه .... ليقتنع بها الشعب ...بحريه
فيا علمائنا ........اجعلوها مشاركة ....لا منافسة 
مواطنه..............لا محاربه
يا علمائنا ........أرجوكم ...لا تركبوا الموجة

سبحانك اللهم وبحمدك أشهد ان لا اله الا انت استغفرك وأتوب اليه


" ليس المقصود انتقاد شخص أو موقف معين فمشايخنا كم علمونا وربونا ونجلهم ونوقرهم-لكن المقصود محاوله لاعادة النظر ف المنهج
- صورة الشيخ يعقوب فقط للتعبير عن السلفية ليس لشخص الشيخ جزاه الله عنا خيرا"
weather counter

الاثنين، 23 أبريل، 2012

الى كل ست نائمة على ودانها .... فى بيتك خائن


الى كل ست نايمه على ودانها وهناك خائن يعيش بين يديها وهى لا تدرى احيانا , اوتدرى وتحاول جاهدة ان تقنع نفسها بثقتها فى رجلها اللى طول عمرة بيبص تحت رجليه وعمرة ما مد طرف عينيه بره.
أقول لها لا تدفنى رأسك فى التراب سيدتى وتابعى أحدى السلوكيات التاليه فى تصرفات زوجك .
ان الخائن دائما ما يفعل شيئا ما لا يريد أن يتطلع عليه احد وخاصة ..أنت  ,  فستجدينه فجأة أصبح من محبي العزلة والوحدة وأنتى ايتها الغلبانه بسذاجتك المعهودة ستقولين أنه ربما أصبح محبا للتأمل والخلوة .يا خلوة أنت يا خلوة.
يشعر الخائن دائما أنك اذا نظرتى مباشرة فى عينيه فستعرفين كل شىء يخفيه لذلك سيكون حريصا كل الحرص على عدم التقاء أعينكما , واذا حدث فسيصحب ذلك رعشه فى داخله ستشعر بها التى تشعر أًصلا.
دائما ما يحب أن يكون خارج المنزل بعيدا عن نظرك لان فترة وجودة تحت عينيك يكون تحت ضغط فيحاول الهروب من هذا الضغط بكثرة الخروج لاى سبب أو يكثر من النوم على غير العادة ,لو جاله تليفون وظهر عليه التوتر ولم يرد أمامك - أكيد هتسأليه مين دة ومرديتش ليه , هيجاوبك أجابات ليس لها صله ببعضها .
المهم الحدق بيفهم والمغفله هيحصل معاها أكتر من كدة وولا هتفهم شىء .

عزيزتى راقبى السلوكيات السابقة فأن وجدتى منها ما يدخل فى قلبك ريبة فلا تتسرعى فقد يكون هناك خيانة وقد يكون هذا التغيير طبيعى وتتعجلين فتفسدين حياتك السعيدة , كل ما عليك الأن هو متابعة الموقف عن بعد." كنت عايز أكتب " عن كثب " بس مش عارف يعنى ايه " لا تشعرية بأنك تحولتى الى مخبر أمن دولة وأنصحك ألا تشستخدمى الجورنال المخروم لان هذة الطريقة أستخدمت فى خمسميت فيلم عربى من قبل وأثبتت فشلها فأن لم يكن يخونك وشعر بأن زوجته تحولت الى ديفيد شارل سمحون فسيتعامل معك بعدوانية مقابله لهذا التصرف الجديد وقد يتطور الامر الله يكرمك أعقلى كدة
أقتربى منه أكثر وأكثر أملأى عليه حياته كل يوم بشىء جديد فاليوم هو ذكرى أول لقاء وغدا ذكرى اليوم المشؤم اللى أتخطبتوا فيه , وبكرة هتعزميه على العشاء كعربون محبه وبعد بكرة تستضيفى أحب الناس له من عائلتك لشرب معاه الشاى وأكيد هيتفقوا على خروجات وأنشطة عائلية معا , أجلسى بجواره وشاهدى معه الماتش الذى يتابعه وشجعى نفس الفريق الذى يشجعه , ناقشيه فى أرائه وتحليلاته الاجتماعيه والسياسية وأشعريه أنك أقتنعت تماما بفكرتة وبطريقة تفكيره العبقرية وبشخصيتة الذكية
أمتدحية ... بس ماتزوديهاش أوى لتتفكسى يا ناصحه
غيرى له من وضعيات أساس المنزل وأطبخى له أكلات مفاجئة لم يأكلها منذ زمن بعيد أو أكلات جديدة صينيه أو هنديه
أمتلكيه لمدة أسبوع واحد حتى تكون الاخرى مللت وطقت منه ويكون هو أستعد نشاطه فى بيته وبين يديك وأحب العصفور الذى فى اليد الذى هو خير من عشرة على الشجرة

بعد أنقضاء الازمة بشهور أو سنوات وبعدما أطمأننتى أنه أصبح لك وحدك  أياك وأياك وأياك أن تصارحيه بما شككتى فيه يوما أو بأنك تعمدتى فعل هذة الحركات معه وألأ هتكونى بالنسبة له مفكوسه وقد يمثل عليك أنه خائن حتى تكررى معه ما سبق أو قد يخون وهو يعلم جيدا أنك أطمأننت له ويعلم خبراتك السابقة عن الخيانة فيتلافاها
أنتهى

الأحد، 22 أبريل، 2012

حد يعبرنى

مبروك النيو لووك للبلوجرز
أحلى حاجة ف المواقع دى أنها ما بتعبرش اللى خلفونا - عايزين يعملوا تحديث ..يعملوا تحديث
وانتوا يا ولاد ال .... أتعبوا شويه واتعلموا أزاى تتعاملوا مع التحديث

ولو مش عاجبكوا دوروا على اى ووال وأخبطوا راسكوا فيه
انا مش هتكلم عن التحديث ده لانه حلو كويس خلى الشكل احسن كتيير وأسهل وبقى بيواكب العصر
لكن أنا مش عاجبنى الطريقة والاسلوب اللى بيتعاملوا بيها مع البنى أدمين
اذا كان هنا أو الفيس بوك او أى موقع تانى

أمتى الناس دى هتحترمنا والاقيهم بعتينلى ماسج أو فويس ماسج زى بتاع اتصالات
عزيزينا العميل رصيدكم الحالى أقل من اتنين جنيه
ولا التانيه بنت الغسله " رصيدكم الحالى لا يكفى لأجراء المكالمه ..شكرا لاستخدامككم ألو "
ولا الماسج الجديد " لقد تم خصم نص جنيه من رصيدك يا مغفل وكل شهر هنعمل فيك كدة " ايقونه واحد مطلع لسانه"  "

وهكذا
عندما نشعر أننا أصبحنا أحرارا وأًصبح لنا صوت .. نستيقظ على الحقيقه المرة
ان هناك من يفكر لنا ويخطط لنا ويرسم لنا خارطه الطريق ويغير لنا شكل المواقع والصفحات
وبعد شويه سنجدهم يختارون لنا ويقررون لنا

شويه أقنعونا أن الثورة دى حراااام وأخرون قرروا لنا أن نقول " نعم " والا ستسرق بلدنا
وأخرون أختاروا لنا تأجيل الحاكم الاسلامى لان مش وقته نمشيها توافقى المرة دى
وتانيين فكرولنا فى وثائق ومبادىء فوق دستوريه
وشويه تانيين وغيرهم  وغيرهم وغيرهم هيفكرولنا ويقنعونا

من عمر 10 سنوات وعلمنى أبى أن اختار لنفسى وأفكر لنفسى وأستفيد من غيرى فى الاستشارة فقط أأخذها أو أردها
فأشتريت لنفسى ملابسى و أخترت المدرسين الذين يعلمونى وأخترت أصدقائى كبرت فأخترت الاقسام التى أدرسها .. تزوجت حسب أختيارى ...أستعمت للنصائح من الاخرين فى كل الأمور .. ولكن فى النهايه كان الخيار خيارى
أذا تطفل أحد واختار لى يوما فليستعد لوابل من النقد والتشهير على اختياره اذا فشل

هكذا كانت تربيتى
لذلك أقول لكل من يفكر انه يفكر لى ويدبر لى ويخطط لى أو نيابة عنى
ليس لى عندك ألا الاستشارة .... وأنا من سيختار لنفسى

الخميس، 19 أبريل، 2012

الوضع الراهن


بما أننا الشعب الوحيد الذى يؤمن بالمثل القائل أن جالك الطوفان حط أبنك تحت رجليك اذن ما العجب في تخاذل الاحزاب أصحاب المرجعيات ووضعهم لأبنا لهم تحت أرجلهم لينجوا هم

وأيضا نحن الشعب الاكثر أيمانا بالمثل القائل
" كل يبكى على ليلاه "  ومن ليس له ليلا يقعد يتفرج على الباكيين
يحضرنى الأن مثل أخر أتلم تنتون على تنتن ... وأحد نتن والتانى أنتن ولا بلاش ده لأننا بدوره هيجرجرنا على أمثله تانيه وأنا مش عايز أغلط على الرغم من أن الغلط على طرطوفه لسانى
يعنى بلاش نقول جحا وما أدراك ما جحا
خلونا نقول المثل الاخر الذى توارثناه فى دمائنا " بكرة نقعد جنب الحيط ونسمع الزييييط" وهذا المثل لا يقوله سوى القاعدون جنب الحيط ويتوعدون انهم بكرة برضوا يقعدوا جنب الحيط وهيسمعوا ويتفرجوا ..طب أيه الجديد ؟؟!!
ولا زالت الثورة حرام شرعا حقنا للدماء ولا زال كل واحد فى مكانه ولازال الحرامى حرامى والنصاب نصاب فعندما أنتشر الناصريون والشيعيون فى عصر السادات عقد صفقه مع الاسلاميين وأخرجهم من جحورهم وسجونهم وعندما أنتشر الاسلاميون وزاع صوتهم أعادهم الى السجون فى النهايه قتل السادات بأيدهم
وهنا أنطبق المثل القائل : اللى تغلب به ألعب به .... وعلمته الرمايه فلم أشتد ساعده ...رمانى
وليس بيننا وبين أنتخابات الرئاسه سوى شهر وبيننا وبين برائه مبارك شهر ويومين
وصدق سيد مكاوى حين قال ساكن فى سجن طرة والمشير ساكن ف الحسين وعشان أنول كل الرضا يوماتى أروح له مرتين م سجن طرة لسيدنا الحسين
لكن السر يكمن فى المشير فقديما كنا نختار شخص لنقول له أسرارنا وبعد البوح بالاسرار نقول له ده سر وأنا أئتمنتك عليه يرد قائلا " سرك ف بيييير "  وتانى يوم نلاقي السر على أولى صفحات اليوم السابع  من مصدر موثوقفأن كان المشير هو المدبر والمخطط والاخوان عقدت الصفقة واليوم السابع لم تعثر على المصدر الموثوق  كاتم السر ولم تنشر التفاصيل
أذن لازال هناك " سر " ونريد أن نجد له بييرا أو مصدر موثوف لكى نتعرف عليه واليوم السابع تنشر تفاصيله

لقد قمنا  بالثورة نعم لقد قمنا بالثورة ورسم خريطه طريق الثورة من قمنا عليهم بثورة ثم بدأنا تنفيذ خطة الطريق تحت أشراف ورعاية من قمنا عليهم بالثورة عملا بالمثل القائل " أتعلم الأدب من قليل الادب "


العلماء ومجالسهم يتبعون مع ابو أسماعيل المثل القائل " أختلاف العلماء رحمة "

وجعوا دمغنا فى الاعلانات " مرسى .. عايز كرسى " .. اه يا كذابييين
الكرسى هو اللى عايز مرسى قال على راى المثل " اللى حبه ربه واختارة جابله الكرسى لحد باب داره"
حاولت أخس كتيير لكن مانفعش وبقيت محتار اشمعنى انا أتخن مع أنى بأكل زى الناس قال رأى المثل
اللى ياكل و يبان عليه - اسم الله عليه-  و اللى ياكل و ما يبانش عليه -  تفوا عليه-
افتكرت موقف حصلى من كام سنه جالى واحد " شحات " يطلب صدقه اخد اللى فيه النصيب بعد شويه دخلت واحدة " شحاته " تطلب صدقه وقعدت تتكلم عن الراجل الشاحات اللى سابقها انه معاه ومعاه ومعاه وبياخد وبيعمل وبيسوى فعلا " عدوك ... صاحب كارك "
أقصد عدوك ... المرشح ضدك للرئاسه "
الاخوة اللى سابوا الميدان وسلموا دقونهم للمشير قال فاكرين يصحوا ويعملوا فيها دكوره أنسوا يا رجاله خلا ص " اللى يبيع الجمل ما يدورش على أيراده "

انا قررت المرة أدى أكتب كلام كتييير كله مرة أكتب جملتين على حدوتين على كلمتين والسلام المرة دى هكتب لحد ما تزهق منى ده أصلا لو كان حد قرأ ووصل للكلمتين دول - أصل فيه مدونات تتقرى ومدونات تتحكى ومدونات تتحرق بجاز

للناس اللى محتاره الموضوع بسييييط
 قال لو طلع العيب من أهل العيب " لجنة الرئاسة " مايبقاش عيب وأن طلع العيب من ولاد أبو أسماعيل " أهل الكمال " يبقى عيب 

فى الامثال حل لكل المشاكل " قال حماتى مناقرة - قالوا طلق بنتها " فالموضوع محسوم من زمان لكن نعمل ايه فى الرجاله البلاستيك
قالولها حطى جوزك عالسطوح .. ولو فيه الخير عمرة ماهيرووح ومارحش قال ايه راحت عليه نومه
الموضوع مابقالوش عنوان واللى بيفهم كان خد بنت الندل .... وخاصمه
لكن الغبي  للاسف طلع  ما بيفهمش خلى الندل راكبه........ وشامطه
الثورة قامت عشان خاطر موظفين الحكومة بتوع الحزب الوطنى ... وموظفين القطاع الخاص والاعمال الحرة دول ولاد البطه بنت ال ....
يعنى المثل قال الدنيا كدة ساعة غالب وساعة مغلوب وأنت يا بتاع القطاع الخاص هتفضل طول عمرك مغلول
بوسترات الشاطر حطوا جنب  صورة الشاطر صورة مرسى ووفروا
يا خراب بيتك يا أبو اسماعيل يا فرحه بتوع الطعميه ببوستراتك
أنا كنت حاطت بوستر ع العربيه أبويا شاله وقالى دا أمه طلعت أمريكيه
سكت وقلت ف بالى .. سكينة الاهل ما تدبحش


خلاص كدة انا قرفان وعايز أنزل بكرة الميدان بس مش معايا فلوس المواصلات ولا فلوس اليافتات وان كان على الاكل خير ربنا كتيير والميدان يسعانى ويسعى الغير المهم يكون معايا شريك ولو حتى كان مناكف ما المثل قال " الشريك المناكف .. ولا الوحدةومحدش يزعل مننا ومن عمايلنا أصل صاحب الحق ..نطاح وعجبي عليك يازمن

الثلاثاء، 3 أبريل، 2012

منكم لله



انتهت قصه مين شارك ومن لم يشارك فى الثورة وقلنا أنها ثورتنا جميعا
ولكن ظهر من المليونيات اللى بعد كدة ان الاسلاميين هم الاكثر عددا فى الحشد والمليونيات ووجودهم فى أمر يرجح الكفه

ولكن للاسف الاخطاء لم تنقطع
أولها
دعى الاخرون الى الاستمرار فى الاعتصام وعدم ترك الميدان بعد تنحى مبارك ولكنكم كنتم أول المغادرين لجمع الغنائم وعد العده حتى ركب المجلس العسكرى على الثورة وقاد الدفه حيثما شاء

طلب منكم الاخرون بصفتكم الاكبر عددا والاوفى حظا والاكثر تنظيما طلبوا منكم عمل مجلس لقيادة الثورة ولكنكم رفضتم لأجنداتكم الخاصه وأقنعتم الشارع برأيكم فكنتم السبب فى ركوب المشير وانجعاصه على حلم الشعب
فمسحت ادله ادانه مبارك و أختفت الاموال والاوراق واتفرمت أوراق أمن الدوله و..و..و..

الخطأ الثانى :
قال الاخرون : بعد الثورة يعطل الدستور ويكتب دستور جديد لمصر الجديدة هيا ايها الكبار تحملوا المسؤليه
ولكنكم وحسب أجنداتكم الخاصه وافقتم العسكرى على عمل تعديلات للدستور
بل ونشرت فى كل انحاء البلاد ...ألحقوا المادة الثانيه للدستور ..وهويه مصر الاسلاميه ستضيع ..وهيتخرب بيتنا
وأنتشرتم فى المساجد فمن قال " نعم  " فهو مع أهل اليمين ومن قال " لا" فهو مع أهل الشيطان
وقلنا نعم ..... وبعد شويه لقينا انكوا ضحكتوا علينا واشتغلتونا بالحوار بتاع الهويه ده
وأهى الهويه زى ماهيه ..... ايه اللى حصل بقى ؟؟؟!!


الخطأ الثالث :
بالاتفاق مع الاحزاب والعسكرى ظبطوها فى المجلس وأخترعتوا القوائم عشان يكون لكم وللاحزاب الحظ الاوفر ف المجلس ونستوا ان الثورة قامت لهدم الاحزاب وللسماع للصوت المصرى الحر المستقل

رابعا :
يا اخونا الجيش بيعدمنا العافيه فى التحرير تعالوا كملوا ثورة الشعب وخلونا ايد واحدة
خذلتمونا واخترعتم عجله الانتاج ونسيتم الكرامه التى قامت لأجلها الثورة حينما هتكت بعد احداث 19 نوفمبر

خامسا :
سيطرتم على مجلسى الشعب والشورى
نادى عليكم الاخرون نرجوكم تسلموا السلطه من هذا الذى لا يؤتمن الذى قتل شبابنا تمنعتم ولم تلقوا لهم بالا


سادسا :
يتحد الصف الليبرالى ويتفق وأنتم الذين يدعون الناس الى الاعتصام بحبل الله جميعا تشرزمتم ورشحتم 3 اشخاص ينافسون بعضهم تحت لواء نفس الرايه

سابعا :
أقمتم حروبا على أشخاص محترمين وأتهمتموهم بالعماله وأصحاب الجنسيات لانهم ضد منهجكم وفكركم وتظهر الاسرار ونجد أن الجميع  مجنس من أصل مجنس

ولازالت الاخطاء تتوالى وسيذكر التاريخ أن الفرصة جائتكم وأنتم بأيدكم أفسدتموها ولطختم أيدكم الطاهرة

سيذكر التاريخ أننا طلبنا العيش كراما وأحرارا .... وأنتم بأيديكم ستجعلونا عليكم ثوارا