الأربعاء، 30 مايو، 2012

قرار ادارى

قررنا
عمل اشراف على التعليقات عشان اللى عايز يقولى كلمه فى السر بقول براحته
شكرا لاستخدامك ألو

الخميس، 17 مايو، 2012

كوكتيل من مهاترات مفقوع

يا قاعدين يكفيكو شر الجايين




سنه ونص مستنين رئيس و البلد اللى من غير رئيس زى المعزة من غير تييس
كله بيتحرش بيها
**************************


قالوا تحيا الثورة ويحيا الشهداء هنجيب الحق لأم الشهداء .. وهم يسعون فقط عشان ام الكرسى
قديما كانوا ينادون بتغيير الكرسى بأخر تيفال حتى لا يلتصق فيه رئيس


واضح انهم جابو كرسى مغناطيسي ينجذب اليه المرشحين
****************************


أيام العزوبيه تعلمت الطبخ حتى لا أغسل الصحون فقانون بيت العزوبيه أن الطباخ لا يغسل الصحون
وقانون العزل أن الفلول لا يحكمون
وسبحان الله طبقنا القانون بدون الحاجة الى مجلس شعب منتخب ولا محكمه دستوريه


*****************************
مجلس الشعب والمجلس العسكرى بيفكرونى بحنفى .وأم حميدة
حنفى هو ." مجلس الشعب " وام حميده " المجلس العسكرى "


حنفى : انا اللى الشعب أنتخبنى وانا اللى بحط القوانين فى البلد دى وكلمتى ماتنزلش الارض أأأأبدااااااا


أم حميدة شاخطه فى حنفى : حنفييييييييييييييي


حنفى مكسكسا للوراء : خلااااص تنزل المرادى
******************************


مرشحى الرئاسة بيطلعوا ف التليفزيون الايام دى أكتر من " مهند بتاع المسلسلات التركى"


بيطلع المرشح على القناه ويجيى حواليه " حريم السلطان " يسلوه ف كل حاجة من أول " فاطة" لحد " العشق الممنوع"
وأخر الليل  " مطلوب رجال " يحللوا تعليقات المرشح


*****************************
أيها المواطن الكادح اللى ماطلعش ولا مرة فى برنامج توك شو واللى عمرك ما خبط على بابك مرشح للرئاسه وقالك شبيك لبيك رئيسك وملك أيديك تطلب ايه


نصيحتى لك أن تكتب ورقه بها كل طلباتك الشخصيه والخاصه جدا وترفقها بأستمارة انتخاب الرئيس وتضعها ف الصندوق لعل وعسى حد يفتكرك
**************************


الحب هو ذلك الاحساس الذى يجعلك تقترب ممن تحب ممسكا له بيدك اليسرى سكينا وبيدك اليمنى وردة وتقترب  ..تقترب  اكثر ثم تقول له بلهفه .... ادى أم الوردة اللى كان نفسك فيها استريحتى ....أبقى خدى بالك م العيال يا باتعه ... وتتوكل على الله






يا كاتما بين أضلوعى محبته ... نطق قلبى بما عجز عنه لسانى


فافتح أبوابك لتيار الهوى ........ وأغمض عينيك حتى ترانى


أنا من عاش عمره يخفى. سره .... وبعيدا عن الناس كان مكانى


لا أبوح ولا احرك ساكنا ..... وفى ليلى ووحدى كنت أعانى


تركت زحام أماكن العشاق..... ولذت بأماكن الأموات عسانى


لا يسمعنى أحد ف يحسدنى....... ولا يرى دموع عينى أنسانى


ملكت العقل والقلب والعمر والروح.... وبسحرك ملكت كل كيانى


ايه ياد الحلاوة دى دانت بتشعر اهوه يا معلم
***************************
علمونا فى الابتدائى أن سنة 2000 دى هنشوف فيها العجب - فاكرين العربيات اللى هتمشى بعصير القصب والكلام ده -
طبعا انا دلوقتى نفسى أشوف اللى كان كاتب الموضوع ده عشان أ***** عليه


من كام يوم " على " كان ماسك سكينه فحد حب يخوفه انه يمسك سكينه عشان ماتيعورش فقاله : اوعى تمسك سكينه تانى السكينة دى  بتاع الشيطان !!!
ومرة تانية كنت بحط بنزين وحد حب يعلم الولد ليه احنا بنحط بنزين فى العربيات وقاله ان البنزين دة هو الاكل بتاع العربيه لازم نأكلها عشان تمشى
فى كلا الحالتين كان موقفى واحد - مش لازم نعلم الولاد خرافات عشان لما يكبروا ما يلعنوناش زى مانا بلعن بتاع عصير القصب
نعلمهم الحقائق - مش هيفهموها النهاردة بس بكرة هيفهموها


**************************
كل يوم يسألنى حد : هتنتخب مين ؟
ساعتها يعجز لسانى عن الاختيار وعقلى عن التفكير
بعد ما كان صوتنا ما بيأثرش ...... كدة كدة الريس كان بينجح بنسبه 99.9 %
أتى اليوم الذى أصبح لأصواتنا تأثير ......... ولا نجد من يستحقه

الثلاثاء، 15 مايو، 2012

أسرار أخر لحظات ل ساركوزى فى فصر الاليزيه





اليوم عزل ساركوزى من قصر الاليزيه بعد أن انتهى عقد ايجارة للقصر وتسلم القصر الساكن الجديد هولاند
ويظهر على ساركوزى وزوجته الارهاق الشديد لما بذلوه من جهد خلال اليومين السابقين من اللف على السوبر ماركيتات لجمع أكبر قدر من الكراتين وخاصه الكراتين كبيرة الحجم زى بتاع أريال الاوتوماتيك او البامبرز لانها بتاخد اكبر كميه من العزال
وأشتروا شلة خيط دوباره لزوم ربط الكراتين
وخلال اليومين السابقين أتهد حيل الحجة مرات ساركوزى فى تعبئه العزال فى الكراتين

ورصه بطريقه منظمه عشان ما يتبهدلش وخاصه الاطقم الميلامين والزجاج والاركوبال وطقم الخوشاف  وطبعا لم ينسوا كتابه الجمله التحذيرية المعهودة " زجاج قابل للكسر " على الكراتين التى تحوى الاطقم الزجاجية.
أما عن الهدوم فمافيش مشكله تتكوم فوق بعضها ف الكراتين ولما يروحوا بيتهم الجديد يبقوا يودوها للمكوجى غسيل ومكوه وخلاص
وأكيد أستعانوا  بالنجار اللى عاملهم أوضه النوم ليقوم بفك السرير والدولاب والنيش وترقيم أجزاء الدولاب عشان مايتلخبطش لما يرجع يركبه تانى

الليله الماضيه  وصلت العربيتين الجامبو اللى متفقين عليهم وبدأت عمليه رص العزال فى العربيات
ومعروف ان رص عربيات العزال يحتاج الى مهارة وخبرة فأنا أعرف بعض الاشخاص الماهرين فى تلك الصنعه يستطيع أن يرص عزال شقتين فى عربيه واحدة .


والازمة الكبرى التى قابلت ساركوزى ليلة أمس كالعادة كانت الثلاجة وأقترح عليه بعض الاخوة اللى كانوا جايين يساعدوا أنه يجيب ملايه ويلفها على التلاجه وقام ساركوزى لانه كان خايف على التلاجه جدا ..دى مكتوبه ف القايمة يا جدعان راح لافحها على ضهره ونازل بيها السلالم
وأثناء نقل الكراتين المكتوب عليها " زجاج قابل للكسر " بقى كل واحد يسلم الكرتونه للى بعده يردد هذة العبارة " حاسب دى فيها جزاز " بالفرنساوى طبعا


أنتهى رص العزال على الفجر وباتوا ليلتهم على فرشه على الارض طبعا السراير وكلها اتحملت ف العربيه الجامبو
الى أن أتى المستأجر الجديد مسيو هولاند فى الصباح هو وزوجته لمعاينه قصر الاليزيه والتأكد ان كل حاجة سليمه وأن ساركوزى ما فكش اللمبات الموفره أو خلاطات المياه وأستهبل وأخدهم ف وسط العزال
**************************************************
وفى هذة الصورة واضح أن ساركوزى بيقوله :
أستلمت يابرنس ؟.. فيه أى حاجة ناقصه ؟؟.. أنا سايبلك جزازة شاور من ماى واى و علبه بيروسول
يرد عليه هولاند :
بس يا ريس باب الحمام بيزيق وهو بيقفل والترباس مش شغال كويس و الحنفيه بتاع المطبخ بتنقط ... عموما مش مشكله أنا هجيب حد يظبطها وأخصم الفلوس دى من الايجار
ساركوزى :
أمانه عليك تاخد بالك من شويه البصل اللى انا زارعهم فى الجنينة اللى ورا وماتنسانيش ياعم ف ربطتين لما يكبر هههه
يرد هولاند ضاحكا:
هههه طبعا طبعا يابرنس

الاثنين، 7 مايو، 2012

الحلزونه يا أمه الحلزونة

الحلزونة يامه الحلزونة
الحلزونة صحيت م النوم
لقت جنبها حلزون
قالتله يا بروطه ما تقوم
قوم جيب لينا لنا فطار و ولحوم
قبل ما يجى الواد برهوم

فتح عنيه حلزون وبص لها
وبصوت عالى وزعق لها
يا وليه سيبينى انام واتهنه
كنت شايفنى نايم ف الجنه
قومتينى على عيشه تغم
غورى يا شيخه فى جاتك الهم

وبعد الجو ما راق واحلو
قالت أروح بقى وأغازل الجو
وبأيد الهون والقروانه
كسرت لجوزها السمانه

يا لطيف يا لطيف
ده هزارها مخيف

دخل عليهم الليل
ويا سلام على الليل وكلام الليل

فكر حلزون ففكره مريبه
انه يجيب لمراته مصيبه

راح المطبخ يتسحب
وعمل كوبايتين سحلب
ورجع لمراته يتدحلب
وف عبها راح دالىء السحلب

ودى حكايه يوم من أجمل ايام الحلزونة
بالحب والديموقراطيه
هتيحيا الامه العربيه


الأحد، 6 مايو، 2012

فليصمت أصحاب الكراسى



قاتلون
سارقون
للزور شاهدون
وقال عايزين تخرجوا أمنون
أتحلمون ؟؟

أيها الكرسى الملعوووووون
لاجلك لم يثر الثائرووون
بل ثاروا طلبا للمعوووون
الحريه والقانووووون
بعدها أنقلب على الثائرووون
الاحزاب الغافلوووون
والاخوان المسلموون
وبدأوا يتصارعوون

على الكرسى الملعووون
يامن للكرسى طامحوووون
وعلى جثثنا صاعدوون
وللشهداء بائعووون
أين انتم ونحن طعووون
مقتلوون ومسحولووون

هل أنتم نائموون ؟
أم أنكم تستعبطووون
هذى الدماء جلعتكم مرموقووون
أين كنتم وهم يقتلوون

أين كنت وهم يزوروون ؟

أين الرجال الحاملووون
لهم الشعب المطحووون
ابقوا على ما انتم عليه ثابتون
لا تتزعزعون ولا تتراجعوون
 

فليسقط الان الحزبيييون
فليسقط الان العسكريون
فليسقط الان الصحفييون
فليسقط الان الاعلاميييون
فليسقط الان السياسيون

عاش الشعب وهلك الطامعووون
عاش الشعب وهلك الطامعوون

يا دمااااااء الشهدااااااء
سيبقى الحلم لن يذهب هباااء
فحريتنا لن تأتى مع الهواااء
حريتنا ستأتى بالدمااااء

فيصمت أصحاب الكراسى