الجمعة، 29 مارس، 2013

أنا الشعب

يجول بخاطرى الأن يوم جمعه النصر ....والاحتفال برحيل  مبارك
ويوم الأحد الموافق .......خسارة شفيق ونجاح مرسي
فى اليومين تشابهت الأجواء .. الكل أيد واحده ..سعاده غامره ... أمل وتفاؤل ... أحلام وورود
فلاااااااااش فوروارد ..نيجى بقى للعصر اللى أحنا فيه
حالنا مش محتاج وصف ... طوب وقتل .. سب وشتم ... تشاؤم ..وتثبيط .. عدم استقرار ..
الضعاف مثلى لا يتحملون تلك المشاهد الداميه
الضعاف مثلى لا يتحملون عدم الاستقرار الأمنى والسياسي فقلنا نعم نعمين تلاته لكل الاستفتائات
الضعاف مثلى لا يقوون على مبارزات السب والقذف لأننا تعلمنا الأدب فى الحوار مهما أختلفنا أو اتفقنا فكلنا بشر يخطىء ويصيب
الضعاف مثلى كانوا يظنون أن النخبه المثقفه تفضل مصلحة الوطن على مصالحها الشخصيه
الضعاف مثلى أختاروا الديموقراطيه كما وصفتوموها لنا ..انتهاء الاحتكار ....نمو اقتصادى.. ..محاسبه المسؤل .. تطهير الفساد

هل وجب علينا نحن التنحى ..
أنا من يلعب الدور الرئيسي ف الحياة السياسيه ... أنا الأصل وأنتم الفرع
أنا الشعب ..



الأربعاء، 20 مارس، 2013

عيل رخم ..ف صلاة الجمعه




طول عمرنا لما نروح نصلى الجمعه نضرب الدوش التمام ونلبس الجلابيه البيضه المكويه والطاقيه.. على بختين عطر من العطور الغربيه ..
وشويه كريم شعر ونخرج على سنجة عشره ونحاول نعمل بوصية النبى صلى الله عليه وسلم 
أدنوا من الامام ..أستمع ..لا تلتفت ... ولا تتكلم حتى لو بأقل كلمه ك " صه " أو هوس " أو أسكت " ده اللى احنا أتعودنا عليه ..لكن سبحان من له الدوام ودوام الحال من المحال

يوم لما أبنك يكبر ما شاء الله ويبقى عنده أربع أو خمس سنين والمفروض تصطحبه معاك ف صلاة الجمعه ساعتها أبقى أفتكر أيام زمااااااااااان وأترحم عليها
مبدئيا كده أعمل حسابك ان نص خطبة الجمعه هيعدى وانت مش مركز مع الامام والنص التانى مش هتسمعه اساسا

خد معاك حاجة تتاكل فى جيبك لأن الولد هيجوع فى نص الخطبه أو هيزهق وهيقولك
بابا ...يا بابا 
نعم يا حبيبى .....ايه ده انت هترد على أبنك ؟؟؟ من قال لأخيه " صه" فقد لغى ومن لغى فلا جمعة له
أعمل ايه طيب
أيوة يا أبنى عايز ايه ؟
عايز أكل يا بابا 
هو ابنى اساسا فى الطبيعى انه من أعداء الاكل لكنها طلبت معاه أكل وأحنا فى صلاة الجمعه

تانى مره أنا عملت حسابى وأخدت معايا لبانه واديتهاله يمضغ فيها علشان ما يزهقش وما يحسش بالجوع  ..لكن الرخم حبكت معاه انه زهق من اللبانه فى نص الخطبه وعايز يرميها !!

ويا سلام بقى وانت فى نص الخطبة كده وقاعد ف الصف الاول وتلاقى اللى جاى يهمس ف ودنك
بابا ....أنا عايز أعمل بى بيه
" بي بيه بالعربيه يعنى عايز يعمل زى الناس ..او عايز يروح بيت الراحه "


هتقوم من الصف الاول ...وهتتخطى رقاب المصليين .. وهتاخد المحروس للحمام
وطبعا ضاع عليك الصف الاول لأنك مش هترجع تتخطى الرقاب تانى .. وضاع عليك ثواب الجمعه بعد كل اللغو اللى حصل ده

مش مشكله نقعد ف الصف الاخير المره الجايه ...الصف اللى جنب الحمامات على طول
لكن برضو مش هتخلص من الزن
بابا ...صباع رجلى الصغير بياكلنى
عايزأعض حد يا بابا
لسانى بيوجعنى
الواد برعى اللى معايا ف الحضانه أكل الشيبسى بتاعى
ويا سلام على حنفيه الاسئله اللى ما بيفتكرهاش غير فى نص خطبة الجمعه

بابا ... هو مصطفى بن عمى بيصلى الجمعه ؟؟
بابا ...هو انت بتحبنى .............. بحبك يا سيدى
بابا ... لما هروح البيت هقعد على الكومبيوتر 

وياسلام بقى لو ركز ف خطبه الجمعه وسمع اى كلمة من الامام بيقولها
 وهنا تبدأ أسئله " يعنى ايه ؟"
بابا ..هو يعنى ايه " الكهف "
بابا ..هو يعنى ايه مش عارف ايه
بابا ...هو عمو ده أسمه إيه ؟؟....مش عارف يا سيدى
بابا .. هو عمو " مش عارف يا سيدى " ده هيخلص أمتى ؟
 


الفقره الاخيره بقى هى فقرة التقلبات والشقلبظانات
تحس أن سجاد المسجد فيه شوك للعيال الصغيرين
يقعد حبه مربع شويه ينام على جنبه ويضرب رجله فى وش اللى وراه
شويه ينط يقعد فوق رجليك
شويه ينام على الارض ويحط رجله فوق دماغك
شويه ينط يركب على رقبتك

فى النهايه عزيزى الأب تقبل الله منا ومنكم
 

الأربعاء، 6 مارس، 2013

ممبار محشي



فى يوم من ايام طفولتى نسيت أمى صينيه " محشي البتنجان الاسود " فى الفرن الى أن تحمصت وقتم لون البنتجان
لدرجه انى اتخدعت وسألت ايه ده ؟؟؟؟
فقالت امى ساخره منى " ده ممبار "
وانا زى الغبيط صدقت وعجبنى جدااا
----
بعد فتره وانا باكل ممبار أصلى لم يعجبنى طعمه بالمقارنه بطعم البنتجان المقرمش " اللى انضحك عليه وقالولى انه ممبار "
سألت أمى
هو مش ده ممبار ...قالت لى ايوه
قلتلها بس ده مش زى الممبار اللى أكلته قبل كده
قالتلى التانى كان بتنجان يا أهبل وانا نسيت الصينيه ف الفرن لحد ما أتحمص
قلتلها ماليش دعوه انا عايز ممبار.. بنتجان ...مش مهم الاسم بس انا عايز الطعم المقرمش اللى انا حبيته

المستفاد من القصه
- ان انا طول عمرى عبيط وبينضحك عليا
- لما بدوق حاجة حلوه وأحبها ..مافيش حاجة تقدر تعوضنى عنها حتى لو جابولى حاجة أحلى من  الأولى
- أن الدنيا دى زى الممبار ..ساعات بتكون بنتجان محمص بس بنكون فرجانين بيه ...وساعات بتكون ممبار متكلف ..لكن مش حبينه
- أخر استفاده بقى انا مش هفتح المدونه تانى وانا متنح لانى أكيد هكتب بوستات ممبار زى ده بالظبط

الأربعاء، 27 فبراير، 2013

عين.......حسد .....عفاريت ......اى كلام




من عادتنا البشريه اننا لازم نبرر لأخطائنا وأهمالنا بأى مبررات او ندور على اى حد نشيله المصيبه
يعنى تبقى شايل حاجة فى كيس ضعيف وفجأة الكيس يتقطع علشان حضرتك كسلت تجيب كيس اقوى
أول رد هيكون
" عين  حد خرمت الكيس "
أنت هتستعبط !!!

الولد خرج الصبح أنطس ف البرد جاله نزله برد
أصل ام فلان شافته أمبارح
يا سلام يا أختى

ولما العربيه تتخدش أو تتخبط علشان أحنا ركناها فى مكان خطر
لازم ندور على حد شفنا نلبسه المصيبه دى

حصلنا كام مشكله ورا بعضها الاسبوع اللى فات
فصاحبي بيقولى أصل أحنا فى شهر " فقر أير " فبراير بس بينطقه كده على اساس انه شهر فقر وشؤم
يعنى لما ما لقيناش عين حد  أو حد بيحسد دورنا على شهور ربنا ونتهمها ونشيلها المصيبه

اه زى سواق الميكروباص بيسوق وكأنها راكب موتوسيكل ولما يخبط حد يكون اول رد فعل ليه
" أصله يوم باين من أوله "

نفس الكلام لما حد يتعب وياخد فتره على ما العلاج يجيب معاه
تلاقى الدكتور بيتشتم وبنتهمه انه هو سبب تأخر الشفاء وانه مابيفهمش

لما خلاص الدنا تقفل ف وشنا ومافيش عين ولا حسد ولا شهر فقرى او يوم أسود
يبقى العفاريت
أه
وتلاقى فجاة اللى بيقنعك أن الجن ده حاجة بجد وحقيقى وبيثبتلك من القرأن والسنه

يعم وربنا عارفين ان العين حق  والحسد مستعاذ منه فى القرأن وعارفين كمان أنه فيه عفاريت وجن وبعابيع وعووو

لكن اننا نسيب البلد كلها وننسى أخطائنا وننسى قدر ربنا وننسي الابتلاء ووندور على اى حد نشيلها المصيبه
يبقى أحنا بنستهبل

الأحد، 17 فبراير، 2013

الفالنتين أصلا ......



عزيزى المتزوج   عزيزتى المتزوجه
عزيزى السنجل ...عزيزتى السنجله
عزيزى المحافظ... عزيزتى المحافظه
((((أياكم والخروج يوم الفالنتين  )))

دى نصيحه بقدمها للجميع بعد اللى وصل اليه المجتمع من مآسي - "مش هنتكلم ف الحلال والحرام"  -
وبما أنى عايش فى ملكوت لوحدى فلما بشوف حاجة غلط او غريبه
لازم أندهش
-----
من خمس سنين خرجت انا وأصحابي " الرجاله"  رحنا الاسماعيليه
أول ما دخلنا النادى كانت الساعه 9 صباحا فوجئنا انه فيه 3 كوبلز مشرفين ف النادى من صباحيه ربنا
وكل واحد واخد الحته اللى معاه ف ركن فى منظر مثيل للشكوك والظنون السيئه
أخر النهار النادى كله اتقلب دويتوهات
وهو فيه ايه يا أخوانا
قالوا : النهادرة يوم الفالنتين
لوووووووولى
واتقلب النادى الى أستغفر الله العظيم استغفر الله العظيم
عادى كده ف الشارع

أنا أندهشت بصراحه - ماهو كان لازم أندهش - هو فيه كده يا جدعان
ف الشارع عينى عينك كده

يانهار أحمر يانهار أحمر
من ساعتها قررت ألا أخرج يوم الفالنتين بره بيتى  أبدا
------
للأسف نسيت وخرجت السنه دى بس بعد الفالنيتن بكام يوم ولكن أثار الفالنتين لازالت موجوده فى النوادى والحدائق العامه

قصه الفالنتين زى ما اتحكت ليا
انه فيه قس اسمه فالنتين وكان بيحب واحدة ومسكوه بالزنا وتقريبا قتلوه .وأهل القريه أحتفلوا فى اليوم ده بالفضيحه دى
لذلك هو يوم فضيحه فالنتين .ويجب أن نعمل فيه فضيحه علشان تكتمل طقوسه

لذلك أذكر نفسي وأياكم أيها المتزوجون و السناجل و المحافظين
أياكم والخروج يوم الفالنين لو حد حابب يخرج ماينساش ياخد معاه الأريال

الثلاثاء، 12 فبراير، 2013

من يخطب القمر ؟؟!!




خرجت فى ظلمة ليل أهيم على وجهى أكتم بداخلى أحزانى ومشاكلى
فرأيت القمر ..ترك مداره ووقف يتبسم لي ..
مابالك أيها القمر؟
 دعنى بما أنا فيه فقلبي أهلكته الجراح ,, وعندى همومى ....أليك عنى
لم يتأفف من قولى وقالى لى برفق تعالى ...تعالى لا تخف فأنا القمر
وأخذ يربط على كتفى حتى ذهب خوفى وجلست أشكو وأحكى
وجدت القمر يصغى الي بلهف واهتمام... فاستطردت فى حديثى وأخرجت شكواى وألمى وأملى ..
يوما بعد يوم... كان يسمعنى ...وعندما أطلب منه نصحا ينصحنى ويرشدتى
أستشرته فى كل نوازلى ,, فى كل أفراحى,, وأحزانى ,,وأشغالى
أحببت التسامر معه... فتحت له كل أبوابى
 كان قمرى الذى يستريح على سطحة العاشقين,, ويشكو اليه المعذبين,, ويطمن برؤيته الخائفين,, ويهتدى بنوره التائهين
كنت أذهب فى أول الليل أنتظره حتى يخرج , كنت أبحث عنه أن غاب
كنت كطفل يبحث عن أم تداعبه اذا يأس , يبكى فى حجرها اذا ضاقت به دنياه
كان صديقى الوفى , كاتم سرى , مستشارى ,
يوما ما نظرت أليه نظره العاشقين فوجدته قابعا فى قلبي من سنين وانا لاأدرى
وجدته أميرا فى قلبي أمرا ناهيا

فجأة عقلى تكلم : أيها القلب  هل أنت مجنون ؟؟؟ 
قال القلب : هو دوائى وكسائى , هو صفاء وضياء, هو القمر, وبين يداه أسكن من سنين
العقل : مابالك أيها العاشق المجنون ....أنه القمر.....وهل يخطب القمر أحد؟؟
القلب : متجاهلا ...متغافلا ....
...............نعم سأخطب القمر .........
العقل : وهل يخطب القمر أحد ؟؟!!
القلب ملحا : نعم ...أنا من يخطب القمر
العقل مكررا : وهل يخطب القمر أحد ؟؟!!
القلب : أنا من يخطب القمر
********



العقل : غور ف داهيه يابن الغبيه

أنتهى


الاثنين، 4 فبراير، 2013

لو لم اكن مصريا ...وربنا ماكنت عتبتها

وانا عمرى 27 سنه بحثت عن معنى كلمه " وطن " كان مات عندى أحساس انى " مواطن مصرى "

النهاردة وبكل فخر أنا عايز أقول كما قال  مصطفى كامل
لو لم اكن مصريا ..." فقر من يومى هعمل ايه أبويا طلع مصرى"
وربنا ما كنت عتبتها

الله يخرب بيوتكو يا بعده
حسبى الله ونعم الوكيل
حسبى الله ونعم الوكيل
حسبى الله ونعم الوكيل