السبت، 6 ديسمبر، 2014

مقتطفات شعريه "ارشيف"




يا كاتما بين أضلوعى محبته ... نطق قلبى بما عجز عنه لسانى

فافتح أبوابك لتيار الهوى ........ وأغمض عينيك حتى ترانى

أنا من عاش عمره يخفى. سره .... وبعيدا عن الناس كان مكانى

لا أبوح ولا احرك ساكنا ..... وفى ليلى ووحدى كنت أعانى

تركت زحام أماكن العشاق..... ولذت بأماكن الأموات عسانى

لا يسمعنى أحد ف يحسدنى....... ولا يرى دموع عينى أنسانى

ملكت العقل والقلب والعمر والروح.... وبسحرك ملكت كل كيانى

------------
أنا عايز أكتب وأقول كلام .محشور من زمااان أوى 
حاسس بخقنه وضييق ......يا وااااااد .......خلييك قوى 
عايز أصرخ بعلو صوتى ............وأقول يااااااا قوى 
أو أجرى فى الشارع وأعرق يمكن تنزل كل الهموم ف العرق 
أو أرسم فى لوحه بيضه ........شجرة التوت والغصن والورق 
وسما صافياااااه .. .وشمس ... ونوم من غير قلق 
 وأرسم كمان .. النخلة . وشط الترعه.. وطيارة ورق 


أنا عايز أغنى وأقوول يااا رب
يا طيبنة بلادنا وترابها ..اللى عشمنا فيه ما خااب
وأقول موال لفلاح ف الارض ...م الشقى  دااااب
عايز أغنى وأغازل كل صبيه........ ..شعرها شاااب 
وأغنى لأخويا اللى ربانى .......وامى ......وأبويا 
وأغنى لليل والقمر.. ونسمه هوا...... وسحااب  

انا عايز أعوووم فى البحر 
وأخد معايا السنارة وأصطاد سمك 

عايز أعتكف المسجد اللى فيه أتولدت 
وأصلى فيه ركعات من غير ما ألتفت 
وأعمل مقرأة قرأن ..ونبطل كلام ولت 

أنا ......
انا عايز أروح لحد 
وألبس لباس أبيض وأغرقه عطر
وأنام ليلة من أسعد ليالى العمر 
وينادونى يا جميل .. ده أجمل قبر 
م الجنة جبنالك ريح وريحان 
وأنسى ما قد كان ...
ده الرب غفر 
ساعتها هصرخ وأقول يااااااااااااا بشر 
ياليت قومى يعلمون بما ربى لى أمر 
---------------------------


انا اللى بألون كل الكون 
وكل حاجه عندى ليها ميت لون 
بألون الهوا وردى
واخلى لون السما بمبى 
وبفرش الارض بالأحمر 
القمر عندى.. لونه اخضر
وهمسح كل.. لون اسمر 

بمزاجى بقى 
ماانا اللى بألون
الكون
---------------------------

بحلم أطير فوق.. السحاب 
أركب على جناح.... اليمام 
أطلع لفوق...... فوق القمر 
ماسمعش غير .صوت السمر 
صوت الهوا ويا......... النجووم 
وأسيب هناك كل..... الهموم 
وأنزل....... هنا.. من تااانييى 
وأنا نازل 
هرسم على ......جناج اليمامه 
وهسيب ف كل نجم ........علامه 

وهحفر أسمى ع القمر بخط كبيير 
وأقعد ع السحاب وكأنى....... أمير 

دق الجرس فجأة خلانى ...صحيت 
لقتنى ماسك اللحاف ..أنا أتشليت 

بس خلاص......... الحلم طار 
هو فيه فوق القمر ....هات الفطار 
ولا فيه مدير شايفنى...... "حمار" 
وكمان مافيش زحمه ولا ...انتظاار 
أعمل ايه أنا ...............أيه القرار

أيه القرار ؟؟
------------

الثلاثاء، 28 أكتوبر، 2014

ديوان #وطن_فى_كفن


----------------------------------------------------
2013


((((حد لسه ما اتقتلش ؟؟ ))))
#بلطجى ...#سلفى ...#ثورى.. #يسارى ...#يمينى ..#أخوانى .. ابن بلد ..بنت بلد ...ام ولد ... شيخ عجوز ... أو زهره لسه مافتحتش .... " #أنس_محى " 

نقول كمان 
الشيخ عماد ... ومينا ....ومحمد .. "وأنس محى" 

((((ايها الساده العظماء الاسود ))))
أحزاب... نخبه... وزراء ...معارضين ... مسؤلين...سياسيين

خدوا الكراسي ...خدوا المناصب ... خدوا المجالس ...خدوا الشهايد .... أدوشونا فى البرامج ... وسيبونا يطلع عنين اللى خلفونا 

تمردوا ......تجردوا ...بس أرحمونا ....سيبوا فى البلد.... كام ولد.... مش مقتولين 

سيبوا فى البلد ...كام ولد ...مش مقتولين
------------------------------------------------
----------------------------------------------

رجعتى ليه لابسه.. السواد !!
لسه ايام فرحك........ ُبعاد ؟؟
يابلد كل ماتخلع يوم ...سواد 
تلبس سواد أسود م.. السواد 

----------------------------------------------

حسيت بصداع ......وزغلله ..
.رحت مستشفى ..مدهوله 
قالولى عندك....#أختطاف_ذهنى 
.انا قلت يا لهوى 
هموت يعنى !! 
طب أعمل ايه؟؟ 
حد يقولى ؟؟!!

لازم تتبع التعليمات 
يوماتى تشوف توفيق وحياة 
أياك والفيس 
وتابع لميس 
وأسمع كلام الداخليه والجيش 

أخوان أرهاب.... أخوان وحشين 
قفشوا ارهابي ....عمره سنتين 
لابس حفاضه ومعاه بزازه ودبابتين 

تحت المنصه كره أرضيه 
وسلاح وذخيره و بندقيه 
ومدافع هاون و قنبله ذريه 
قتلوا أخواتهم ف الفجريه 
وطلعوا وقالوا دى الداخليه 

فى اللحظة دى انا أتشليت 
---------------------------------------
2014

#قال_ايه_أنتخابات 

قال ايه انتخابات 
يا بلديات 
انتهى خلاص عصر الثورات 
لا تقولى مرسي ولا فتكات 

تنزل تصوت ترقص تظيط 
ديموقراطيه بلح امهات 

من غير قلق من غير لجنات
من غير فرز ولا حورات 
هو الرئيس من غير أصوات 

و نص الشعب ادله تفويض 
والنص التانى لبس ف الحيط 

تنزل تصوت ترقص تظيط 
ديموقراطيه بلح امهات

#قال_ايه_أنتخابات 

ف رابعه مات 
صمت وسكات 
باقى الرفات 
وعضمتين 
وابنه الصغير
راح يبنى جيل ..متيتمين 

قالوا انتخاب 
حق الشباب 
قتلوا الرجال 
صموا الااذان 
صوت الاخيار
اصبح سراب
جيل الحريه...جيل الايتام 

يا معرضين 
يا راقصين 
ليه فرحانين ..الدمع سال 

ربي شهيد 
حق الشهيد 
قتلوا القتيل ..وقالوا انتخاب 

ستظل دماء الشهداء تطاردكم 
ستشهد عليكم أطراف أناملكم

---------------------------
2014

تمردت يا فالح .. وصوتك عٌلا
راح فين صوتك لما النور أنطفا ؟ ! 

تمرد يا فالح وهد الهرم 
ولا خلاص الكوز اتخرم

سنشهد عليكم يا شعب تمرد 
فانتم من ذبحتم حلم اتولد 
وبأيديكم نصف جيل انقرض
---------------------------

محبوبتى
لو خطاويكى راحت لمصر ابقى أسألى 
عن حلم كان لسه ......هيبتدى 
عن عيون قتلها غدر.... العسكرى 
وابقى أسأل....
مين اللى فوض قاتلى ؟؟

----------------------

اجمل ما فيكى لون ...كفنك 

وحبيب من عشقك ....هجرك

يا ماسخه وكلك كره ...كلك 

ما تحسي بقى على ....دمك 

دا النيل بيجرى مهوش.. طايقك 

حاطه على خدك من دم شعبك روج 

عايقه و ووسطك بالكفن مسروج 

رسمالى ع صدرك بومه وتقولى نسر 

يا اخوانا دى مش امى ..أنا أمى مصر

---------------------------------------

مكتوب علينا الشقي 
ف بلادنا العتيقه
مكتوب علينا نعيش 
الغربه ف اراضينا
نموت ما نلاقى دوا 
ولا كفن يغطينا
**
يا بلد الجمال والسحر 
يابلد الجبال والبحر
حكموكى ف كل دهر 
و ما دفعوا يوم المهر 
نشروا الفساد والقهر
وصدرولنا العهر
***
تكيه ورثوها . وورثوها 
وبددوها وقسموها 
وحزموها ورقصوها 
*****
يا بلادنا العتيقه اصحى بقى وفوقى 
تمن الوطن دم هاهديكى انا عروقي
دفعت حق الوطن طب فين انا حقوقى

--------------------------------------

انا اللى اتقتلت بأيدى وسلاحى
وكتمت بكفى وهدومى جراحى 
انا اللى بنيتلى فى الوهم صرح 
وصحيت على ألف جرح وجرح 
يا قلب ما له فى الغرام فرح 
اعتدت صوت الفراق 
وعشقت طعم الجرح
-------------------------

اسألوا النيل
اسألوا نسمات الليل 
وصوت الرصاص والخيل
وأسألوا الزنازين 
وتراب الميادين
وأسألوا القاضى والحاكم 
وأسألوا قاتل الساجدين
واطنى راح فين ؟؟!!!
انا وطنى مش دبابه 
راكبها عسكر
ولا ساحه او غابه 
مين يقتل أكتر 
..
انا وطنى صوت اتولد
وطنى ضهر وسند 
يا بلد... وطنى اتفقد 
..
يا بلد
كل اللى بنيته اتهدم 
ولا انا عشقت العدم
‫-------------------------------------

ِيا عم يا خال.. 
شلال الدم طال 
الدم اللى كان حرام 
فى كل شارع سال

أبن و ضحية عمه 
وجاره مات ف الحال 
وعسكرى ف شارعنا 
رجع قتيل ف شوال

يا ظالمين أسمعوا 
العزه مش بالمال 
والكرسي مهما علي 
الظلم عمره ما طال

يا ساكتين أنطقوا
العدل بيكم مال 
واللى عمل فرعون 
كان شغلته طبال
------------------------------
------------------------------

راح البياض م العلم 
مش باقى غير السوااااد و .الدم
ودموع كاسرها الهم 

يااااا بلد أرخص ما فيها الدم 
شهيد وشهيد ووطن ب يأن 
ومين هيشفى جرح الأم


صرخوا وقالوا راح الشب 
من امتى ضحى غير الشب ؟؟ 
مات الشباب ... والله وهب 
شهداء ....وريح الجنه هب 

راح البياض م العلم 
وخلاص عملنا حداااااد 
ما كل يوم حدااد 
فى كل شارع ..حداد 
ف كل بيت حداد 
أمتى هنشيل السوااااد ؟
يا بلد ملاها الغم 

حتى العلم 
راح البياض م العلم 
مش باقى غير السواد والدم

----------------------

الثلاثاء، 30 سبتمبر، 2014

أرحموا اللى خلفونى



أرحم اللى خلفونى وأقرأوا الاربع رسايل دول

تعالى ف الهايفه واتصدر 

بيفكرونى بسنه أولى ابتدائى
يا ميس الواد بيشدنى من البنطلون
يا ميس الواد خطف ساندوتشي

الحقوا السيسي ما سلمش على البنت المنتقبه .. لا يعم دى البنت المنتقبه هى اللى ما مدتش ايديها لا لا لا
وغيرها بقى من الهيافات

حبيبك يبلع لك التعريضمما لا شك فيه ان التيار الاسلامى وخاصه الاخوان المسلمون أعطوا شركاء الثورة دروس متتاليه فى النداله وقله الاصل والتعريض
عادى حنكه سياسيه , مش عايزين صدام , أختلاف توجهات وافكار  هكذا كنت ابرر لهم وفى نفس الوقت كنت ابرر للمنادين باستكمال الثورة والتنضيف ووضع قواعد ثابته للعبه السياسيه وأقول اختلاف أفكار والجميع يبغى الخير

لما واحد زى .... من غير ذكر اسماء , اقصد التيار الرافض للأنقلاب بشكل او بأخر من ابناء 30 يونيو من امثال بلال فضل او باسم يوسف او او او
لما حد من الناس دى عمل نفس اللى عمله الاخوان واخطأ ورجع عن خطأة بقى كوخه وليس هناك تصالح مع المحرضين على الدم والخ الخ
أنسيتم محمد محمود و مجلس الوزراء والعباسيه 1 والعباسيه 2 وموقف الاخوان والتعريض للمجلس العسكرى والتغاضى عن الدماء التى أسيلت


مرسي المعصوم من الخطأيتحمل الرئيس مرسي وقادات الاخوان ما نحن فيه الان ولو بنسبه نختلف او نتفق على النسبه هناك من يرى انهم السبب الرئيسي للنكسه وأخرون يرون ان الانقلاب كان سيحدث سيحدث  ولكن  تأخر الاخوان فى أخذ قرارات حاسمه وايقاف الانقلاب قبل حدوثه ادى الى ضياع ثورة يناير
مع الاتفاق انه لم ياتى الوقت لمحاسبه مرسي ومحاسبه قاده الاخوان على ما وصلت اليه الامور يبقى هناك فريق الذى لا يرى للرئيس مرسي خطأ وانه المبرء من فوق سبع سنوات وانه القائد المحنك
وأخرون يرون انه مطبق الشريعه فى الشرق الاوسط ... مع انى مش فاكر قانون او حته قرار تم اتخاذه لالغاء احد القوانين الغير متوافقه مع الشريعه , انا مش فاكر غير مقوله الاستاد " انا مستحيل هأكل الشعب من الربا " وسعى بعدها لأخذ القرض الربوى عادى خالص

أنصر أخاك الظالممن الابتداعات الجديده المناداه بعدم نقد أخوانك من نفس التيار والتشكيك فى النقاد مش عارف مين اخترع الكلام ده . نسيتم " انصر أخاك ظالما او مظلوما "
ولا هو النقد من المقربين بيوجع أكتر ؟
لن ينصلح حالنا الا اذا أمرنا بالمعروف ونهونا عن المنكر وتناصحنا بالخيرات

الثلاثاء، 23 سبتمبر، 2014

فتاوى لذيذه جدااا

الراجل ده بيقول كلام سليم جدااا 




وقياسا عليه فأن يحرم على الزوجه قرائه رسائل الفيس بوك وواتس أب وغيرها من برامج التواصل - يسلم فومك يا حجه 



واجب شرعى ان كل مرأة تعمل أدد لأخوها وفولو لزوجها او  spy
وبلوك لصاحبتها الرخمه 




وبالقياس  فأن الحشيش حلال للأغنياء والبانجو للفقراء وكل على قدر استطاعته 



هو ده الاسلام الوسطى يا جدعان




الحمد لله انهم نزلوا ايفون 6 - عايزين فتوى جديده شراء الايفون 6 يخرب البيوت - 11 الف جنيه يا ظلمه - ده بتمن عربيتى ال 128 






وبالقياس فأن تأخير صلاة العشاء علشان المسلسل التركى واااااجب 



أعتقد ان الفتوى دى الهدف منها عزوف الشباب عن الزواج من أصله - هنتجوز ليه طيب :(



الفتوى دى المفروض تتطبق على الدورى المصرى وبخاصه جماهير الزمالك - لان الفرقه بتكفرهم كل ماتش 



تنبيه :
ماتشغلش بالك بمين صاحب الفتوى - وماتشغلش بالك بتفاصيل الفتوى والاصل الذى بنيت عليه - وما تشغلش بالك من تعليقى السطحى على الفتوى 

الاثنين، 22 سبتمبر، 2014

لحد ما يجيبوا مدرس تاريخ






بعيدا عن الفن المبتذل ونجوم الملايين

الراجل اللى كان بيضحكنى من قلبي.....مااات
أول مره أعرف ان اسمه يوسف عيد


نشهد له عند الله على عمله الصالح #سرور_أدخله_على_قلب_مسلم

الأحد، 21 سبتمبر، 2014

حقن الدماء ...يبدأ من داخلك



دوما النهايه الحتميه للثأر كما قص لنا الروائيون :  بان ياتى الرجل الذى أصاب اخر دم او " اللى عليه الحق "  الى ولى الدم " الراجل اللى المفروض ليه حق "
يعنى القاتل ياتى لأهل المقتول حاملا بين يديه كفنه ومعه الدبائح أو الديه ثم فى مشهد دراماتيكى يعفوا ولى الدم عن القاتل ويدبحوا الدبائح ويقيموا الافراح ابتهاجا ببدء مرحله سلم عام جديده وحقن دماء العائلتين

تعالوا نتخيل السيسي ومحمد ابراهيم لابسين الجلالييب الصعيدى وحولهم قتله اهل رابعه حاملون بين أيديهم الأكفان البيضاء ويسوقون الابل والماعز الى مكتب الارشاد بقياده مرشد الاخوان وخيرت الشاطر والرئيس مرسي

فى تلك اللحظه الدراماتيكيه يجهش مرسي بالبكاء وياخد السيسي فى حضنه ويمتلأ المكان نحنحه و يضج بالبكاء

ويبكى المرشد ويبكى الشاطر وعصام العريان حتى تتبلل لحاهم من البكاء
السيسي ينزل ويقبل يد الرئيس مرسي وهو ميت من العياط , اما محمد ابراهيم بيحاول يبكى او يتظاهر بالبكاء لكنه مش عارف
المرشد موشوشا الرئيس مرسي بصوت خافت " اوعى تقول القصاص"

وهنا يصرخ أحد الحاضرين : ما كفايه بقى ما تبوظوش اللحظات السعيده دى

ثم تبدأ وصلات الرقص ويعلوا صوت الغناء من الدى جى مكس الذى خلط بين الاغانى

مصر اسلاميه و تسلم الايادى
يا مرسي اتوكل على مولاك  . ونادى ع الصعيدى وابن اخوك البرسعيدى
ثورة دى ولا انقلاب ..انقلاب انقلاب

وأرواح شهداء الجيش والشرطه تحوم حول المكان مع ارواح شهداء رابعه والحرس ورمسيس
هااااااااااااااااااااااااااااااااااااااااااااح
____________________________________________________________________________

ممكن تتخيل تلك اللحظه وتقولنا هيبقى شعورك ايه
عبر براحتك محدش هيعارضك



السبت، 20 سبتمبر، 2014

ع فكره .....مافيش فايده




من العجائب أن ما حدث فى مصر والعالم خلال الكام سنه اللى عشتهم ما هو الا حلقه من حلقات التاريخ اللى اتهرست قبل كده تولتويت مره , الاختلافات بين حلقات التاريخ محدوده جدا , الأسماء ..الازياء , التطور الصناعى والتكنولوجى
لكن السيناريوهات واحده , ولن تختلف القصه بأختلاف المخرج سواء كان انجليزى أو فرنسي أو تركى أو عربي أو حتى مصرى

أبحر فى خطوط التاريخ العريضه , الامر لا يحتاج الى مكبرات او عدسات فقط الخطوط العريضه تفضح كل شىء
ستجد نفس الشخصيات بنفس التركيبه
المعارض : ماهو الا خائن و عميل وأبن كلب عايز يزعزع استكرار البلاد وممول من الخارج من اعداء الوطن لتنفيذ مخطط " صهيونى - امريكى - بريطانى - تركى - بنجلاديشي ..
الشعب : أغلبية الشعب تسجد للأستكرار للحاكم الحالى مش عايزين تغيير خليها ماشيه عيشنى النهارده وموتنى بعد بكره مش مشكله نجوع يوم ونعطش يوم , وهو فيه حد عارف مصلحتنا أحسن من الحاكم
الاعلام : على طول الخط تخدم الميديا الحاكم الحالى تطبيل تبرير تهييص تهجيص ...... ماعادا حاكم واحد او اتنين على مر التاريخ
الحاكم الناجح : هو اللى بيعرف يشكم الاعلام ويتخلص من المعارضه الحقيقيه ويبنى لنفسه معارضه مزيفه
المثقفون أو النخبه : الناس اللى بتاكل عيش من  الحياة السياسيه فى البلد . طول ما فيه حراك سياسي فيه سبوبه
الناس الهبل : دول الناس اللى ف زماننا كفروا بالاحزاب وكفروا بالتغيير وف التاريخ همه اللى كانوا بيقولوا مافيش فايده

وبالمثل السياسات الخارجيه هى هى وتبريرات الغزو هى هى
نشر العدل والسلام والخير والمحبه وتطبيق الديموقراطيه ورفع الظلم وتحرير الشعوب
دى الحاجات المعلنه اما فى الخفاء فهتكون الحروب بأسم الصليب أو بأسم الجهاد أو بأسم أى دين سماوى او غير سماوى

النهايات واحده فى كل الحواديت التاريخيه فمات ناس فى عصور الظلام ومات ناس لما النور دخل البيوت ومات ناس لما النور اتقطع ومات ناس ف عصر الاى باد ومات ناس فى عصر التلغراف ومات ناس ايام الحمام الزاجل

وكل الاجيال اللى قرأت تواريخ السابقين كررته بحذافيره ولم يتعلم أحد

مافيش فايده 

الخميس، 18 سبتمبر، 2014

عندما تشرق الشمس ..يختفى القمر



 المنطق يقول ان العلاقه بين طرفين ما هى الا أهتمام متصل متبادل من الطرفين ,
 فأهتمام الكون بالقمر بالليل سرعان ما سيتلاشى بالنهار
 اى ان العلاقه بين الكون و القمر علاقه وقتيه حب نص اليوم فقط
 , وليست علاقه عشقيه روحية أبديه.
 وبالمثل فأن العلاقه بالشمس تندرج تحت نفس المنطق علاقه وقتيه نصف اليوم وفقط .
وحيث أننا نهرًب من الشمس أغلبيه وقت ظهورها خوفا من أن تحرقنا بلهيبها
 لذا تبقى الميزه الاكبر للقمر أنه لا يحرق أبدا 

الشمس لا تغيب , فدوما فى علاقتك بالشمس ستجد النور بدرجات متفاوته
 أحيانا ستجده حارق وأحيانا ستجده حنون دافىء وأحيانا ستجده منكسر خافت
 وأحيانا ممل
أما القمر سنتظره كل شهر أن يركع بين يديك ثلاث ليالى ... فقط
وسيعطيك نصفه وثلثه وربعه وأحيانا سيظهر وشاحه فقط ليقول لك أنه لازال هناك يلاحظك....... وفجأة سيختفى
سيختفى لتقف مع نفسك قليلا وتتسائل لماذا أختفى القمر ؟
 هل غضب منى ؟ هل ضايقته ؟
هل أختفى ليعرف هل حقا أشتاق اليه فى غيابه ؟
 هل وجد كونا أخر يهتم به عنى ؟
ثم يعود فى الظهور مرة أخرى شيئا فشيئا حتى يشعرك أنك أمتلكته وأنه لا يعشق سواك.... ثم يختفى
لذلك تبقى الميزة الأكبر للشمس أنها لا تهرب أبدا

ويبقى الصراع بين من يحرق ومن يحنو , من يبقى ومن يهرب





الأربعاء، 17 سبتمبر، 2014

على فراش الموت


بسم الله الرحمن الرحيم

عندما تكون على فراش الموت وانتهى بك مطافك من الدنيا
ساعتها وفقط تستطيع أن تخرج عصارة خبرتك فى الدنيا

أنا بقى هديلك العصارة دى دلوقتى ...وأنا مش عارف هعيش بعدها قد ايه - عموما ماتقلقش هبقى اسجل هنا أنا عشت بعدها قد ايه


عصارة خبرتى ومفاتيح الحياة السعيده 

>>> المفتاح السحرى للسعاده هو :
 أن يكون عندك مصالحه مع ذاتك فكل تحركاتك وافعالك يجب ان تكون متوافقك مع ما حفر فى ضميرك


>>> لا تجادل الجاهل أو المتعصب أو الرخم اللى مالوش فيها بس بيجادلك علشان يرخم عليك ويحرق دمك
فالجاهل معذور فهو لم يعرف ما تعرفه
والمتعصب مجبر على معاندتك ختى لا يخسر فكرته المتعصب لها
الرخم ده بينكشك وخلاص فمهما افحمته بحجج هيدور على اى حاجه تانيه يرخم عليك بيها


>> التجاهل يمثل 39 % من أسباب السعاده
سيبك من رقم ال 39 % لانى ضارب اى رقم والسلام - وخد بالك انك لو ركزت مع كل كلمه تقال عنك او ركزت مع كل شخص بيحاول يقل من شأنك او بيحاول يعاديك فلن تنجو


>>> اذا خلدت الى النوم أغسل كل الأحقاد من قلبك وسامح كل من أساء اليك  ولا تحمل فى صدرك مكروها لأحد وأحتسب عند الله الأجر


سعاده الصغير أن يكبر
وسعاده الطالب ان يتخرج
وسعاده الخريج ان يجد فرصه عمل
وسعاده الاعزب أن يتزوج
وسعاده المتزوج أن ينجب أطفال
وساعده من عند البنت ان يرزق بولد
وسعاده من عنده أولاد ان يرزق ببنت
وسعاده راكب المواصلات ان يمتلك سياره
وسعاده من متلك سياره ان يجد بنزين
وسعاده من عنده شقه ان يمتلك بيت
وسعاده العامل ان يكون صاحب عمل
وسعاده المريض أن يشفى
وسعاده المغترب أن يعود

ما ترحموا سعاده أهلى وأرضوا بما قسم الله لكم

>>>  السعاده أن ترضى بما قسم الله لك <<<

عبرة من نمله

أنظر الى تلك النمله,  فى كل مره تخرج حبه رمل ثم نعود لتخرج أخرى
وهكذا,, ان أردت أن تبنى مجدا فلا تتوقف
وأن أردت أن تصل الى هدف فأستمر فى المشي تجاهه حتى ولو بخطوات صغيره
فالهزيمه هى أن تتوقف

يقول النبي صلى الله عليه وسلم : « أحب الأعمال إلى الله أدومها وإن قلّ » 

11 سبتمبر ...عيد العاشقين



برج وبرج
ألتقيا
تعارفا
تدفق بينها الحب
ثم العشق
ظنا انهما لن يفترقا
تخيلا سويا حياتهم السرمديه
رسموا احلامهم الورديه

ولكن تأتى الطائرات بما لا تشتهى الأبراج
يقف أحداها ينظر الى رفيقه يتلاشى
حلمه الذى بناه يقتل
تمنى الموت للحظه
وتحققت أمنيته فى اللحظه التى بعدها
هلك البرجان ..... وضاع الحلم
وبقيت الأشلاء
وسجل التاريخ 


الثلاثاء، 16 سبتمبر، 2014

خليك سلبي

بعد غياب أكتر من سنه فى التدوين فى مهاترات عاقل قررت اكون ايجابي وأفتح المدونه وأدون

التدوينه الاولى

بينما أطالع الصحف اليوميه وأخذ فواصل برشفات من فنجان القهوه القابع على يمينى اذ بى أرى عامود النور اللى جنب بيتى منور ولازلنا فى الساعات الاخيره من النهار ولم يحل الليل بعد ,
قررت أن اكون ايجابيا ولو للحظه
فى اللحظة الللى بعدها على طول قررت أن اكون سلبيا
 ما ينور ولا يولع بجاز انا هعمل ايه ؟
 هو انا هعدل الكون المايل و..و....
 وظللت أطرح التبريرات بتاعت السلبيين اللى شايفين ان  وجودهم فى الكون تفضلا منهم على هذا الكون اللى عايز يتحرق بجاز

هيجرى ايه يعنى لو انا رحت أدور على مفتاح العمود وأطفيه وأوفر على الدوله كام كيلوا وات هيضيعوا على الفاضى
يعم ما يضيعوا على الفاضى ما تفوقنيش بقى وخلينى مأنتخ - نفسي الكسوله تتكلم -

طب انا هعاندك بقى ومش هنكمل كتابه التوينه دى تكاسلا - او رخامه -او سلبيه
هو الكون هيتعدل لو انا دونت
هى كتاباتى أصلا ليه اى لازمه

الله يخرب بيت ده أحباط