الأربعاء، 29 أبريل، 2015

صنم

وأن التقيتك ... تجمل الكون
وحين ترحل...  :(
أبق... وأمنحنى الحياة
وان ترحل .. فالموت نجاه
..
يغيب المحب...ويبقى القمر
نحبه ويكرهنا
نعشقه ويملنا
 ثم يرحل
ونبقى كالعدم

صنم


السبت، 4 أبريل، 2015

عرفنا انك صيدلى


من يوم ما اتولدت لحد النهارده  و أغلب  اصحاب الصيدليات بسيمو الصيدليه بأسمائهم ,او أسم العائله  ده لو أبو الصيدلى هو اللى شاريله الصيدليه 

زى الصيدليات  اللى جنبي 
صيدليه  " أبو العنين " ادارة الدكتور اسلام أبو العنين 
صيدليه الدكتوره "فاطمه زكى "
يعم عارفين انك دكتور ودارس خمس سنين صيدله , ويعم الحج ربنا يباركلك فى ابنك وبرافو عليك انك صرفت عليه لحد ما بقى صيدلي قد الدنيا

مش معقوله هنفضل بنفس التفكير ده لعقود وأجيال بتسلم أجيال بنفس الفكر , مش عارف ليه ما بيعملوش زى الحلاقين مثلا

مال الحلاق برضو ليه اسمه اللى بيفتخر بيه بس تلاقيه كاتب يافطه على دكان الحلاقه بتاعه بأسم معبر زى 
صالون المقص الذهبي ... او بالانجليزى  magic touch
او صالون الزهور .... مش عارف ايه علاقه الزهور بالحلاقه
 بس المهم ان الراجل ما تبتش فى اسمه لانه كده كده بيكتبه تحتب " اداره الفنان على هنداوى " 


خد بالك ان اسم الصالون وشكل اليافطه بتدى أحساس للزبون بالطمأنينه وهو داخل يحلق 

لذلك
أقترح على الساده الدكاتره  انهم يفكروا بنفس تفكير الحلاقين مش عيب يعنى 
تخيل حضرتك مريض كاشف ودافع دم قلبه عند الدكاتره وجاى معاه روشته خايف تخرب بيته وداخل الصيديله بيرتعش بيقدم خطوه وبيرجع خطوتين 
لقى حضرتك كاتب على الصيدليه يافطه " صيدليه : خليى عنك " أو "صيدليه : بنص التمن "
مش مشكله بعد كده تحاسبوا الراجل بكام بس المهم الراجل دخل مطمن
طب ليه ما  نستخدمش جمل تهون على المريض مرضه 
يعنى مثلا " صيدليه : سلامتك ربنا يشفيك " , "صيدليه : لكل داء دواء " 

- وبعدين فيه دخله حلوه برضو بتاعت الدكتور عبد العاطى كفته 
يعنى مريض فيرس  سى ولا الايدز اللى فاقد الأمل فى الشفا لما ييلاقى الدكتور عبد العاطى بيتكلم عن الفيرس وازاى هيحوله لصباع كفته .. انا اظن ان فيه ناس خفت بنسبه 100% بسبب التشبيه ده بس
فممكن نسمى الصيدليه مثلا " صيدليه : هنفش* المرض اللى عندك "
وفيه اسامى تنفع أكتر مع المرضي بتوع الادويه الزرقا 
دول تمشي معاهم الدخله بتاعت " صيدليه : خلى السلاح صاحى "  , " صيدليه : أرفع راسك "

وبعدين كل الناس بتعمل اوكازيونات .... الا الصيدليات 
فيه ايه يا جدعان ما تواكبوا العصر ولا علشان احنا بنجيلكم واحنا بنموت وهنشترى الدوا غصب عن اللى خلفونا ..مش كده !
ممكن فى موسم زى اللى احنا فيه تغيير الفصول ونزلات البرد تعملوا تخفيض على مجموعات الانفلونزا 
او اوكازيون ... عند شرائك مضاد حيوى هتاخد مسكن وخافض للحرارة هديه 
يعم بلاش 
وزعوا اقراص زرقاء او حمرا على كل روشته بأكتر من 50 جنيه 


الخلاصه : يا سيادة الصيادله فككوا شويه من الدخلات التقليديه فى اسامى الصيدليات وفى ادارة الصيدليات كل حاجه بتتغير ..