الأحد، 27 سبتمبر، 2015

تسريبات



نسمات فجر
وريح عطر 
وذكريات متناثره 
متواريه 
وأبيات شعر 
نظمتها فلم تنتظم
فكلمات مبعثره 
وحروف متنافره 
ونقاط شاغره 

صفحة طويتها 
فلم تنطوى وحلم... حلقاته
 لم تنتهى









الاثنين، 7 سبتمبر، 2015

زهايمر " ذكريات هكتبها قبل ما انساها "

حيث أنى بدأ يبقى عندى زهايمر خلانى انسي الكثير من ذكريات الطفوله والشباب لذلك انا هكتب كل فتره بوست اسجل فيه شويه ذكريات من اللى انا لسه فاكرهم علشان لما اكبر الاقى كام ذكرى ارجع بيها لايام صبايا " صبايا الخير "


- أول مره كتبت فيها ..كتبت عن مشاعرى بعد حادثه محمد الدره والانتفاضه الفلسطينيه فاكر مما كتبت
قومى يا أمى اتوضى وصلى
 وادع ربى يرجع لى حقى
 القدس حقى والارض أرضى

وبعدها كتبت فى نفس الاجنده حاجات كتيره ... مش فاكرها والاجنده ضاعت
..
احيانا كنت بأطلع فى الاذاعه المدرسيه اقول الكلمه ...فاكر انا كلمه مشهوره كانت عن تاريخ قريه نادر " بلدى "
قريه نادر كانت تسي قديما جزيره " فادر" وعدد سكانها مش فاكر كام .... قريه نادر خرج منها الكثير من ابنائها لمسانده احمد عرابي فى الثورة العرابيه ..مش فاكر اكتر من كده

...
فى خامسه ابتدائى عملنا مجله بورق القص واللزق انا واصحابي كمال ومحمود تقليدا لمجله سمير , بس للأسف مالقيناش حد يشجعنا ويطبع وينشر المجله ,, مش فاكر اختارنالها اسم ايه
..
أول ماتش كوره مدرسي لعبناه ضد مدرسه جزيره الحجر الابتدائيه وخسرنا 8-3 وأخر ماتش مدرسي لعبناه  كسبنا 5-1 
ضد  مش فاكر اسم المدرسه 
...
زورنا رفح فى ايام الجامعه سنه 2002 وشفنا علم اسرائيل لأول مره ,المنظر ده أثر فيا وكتبت بوست عن الاحساس ده فى الاجنده اللى ضاعت ....مش فاكر انا كتبت ايه بالظبط بس تقريبا احساس قهر وحسره اكيد مش هيجى حاجه جنب القهر اللى حصل لنا الايام دى
...
فى 25 يناير كنت مع ان الخروج على الحاكم حرام وفى 28 يناير عرفت ان السكوت حرام وبعدها
 نزلت مظاهرات مع 6 ابريل ضد المجلس العسكرى وحكومه شرف
ومع السلفيين فى جمعه قندهار ضد المبادىء فوق الدستوريه
 ومع الليبراليين ايام محمد محمود ضد الداخليه
ومع ثوار يناير ضد تزوير نتيجه انتخابات الرئاسه لصالح الفلول
ومع الاخوان ضد الانقلاب
والحمد لله تبت الى الله وعرفت ان الثورة مستمره ومستمره ماتت
واللى عايز يموت يثور وهيبقى اسمه شهيد,
 بس ليسته الشهداء قفلوها مع محطه المترو قبل ما يغيروا اسمها لمحطه مبارك اللى بطل يموت على نفسه وعرفت ان اللى بنى مصر كان ظابط  وحبل المشنقه بيوجع 
...

رحت احضر خطبه جمعه للشيخ ابو اسحق الحوينى . الناس كانت بتتهافت عليه علشان تسلم عليه او تساله فى مسأله او تطلب منه دعوه , 
وانا خارج من الوضؤ طالع السلم مش مركز لقيت اللى فى وشى انا وهو بس على السلم , هو انتظرنى للحظه علشان اسلم عليه الا انى ماكنتش مركز اساسا فراح مكمل طريقه الى المنبر 
#مزبهل_ أفندى






الجمعة، 4 سبتمبر، 2015

فيها حاجه حلوه



من الهبات العظيمه   ان يرزقك الله بموهبه رؤيه مواطن الجمال بالكون واضحه ويخفى عن نظرك المساؤ ، لذلك انا اعطف على  هؤلاء الذين لا يرون الا المساؤ واعينهم لا ترى سوى القبح ،
ان لا ترى فى الابتلاء الا الخير ،
 وان ترى فى المحن المنح ،
وفى الظلام الهدؤ والسكينه
وفى المطر الخير والبركه
 وفى الحر الاحساس بالنعمه
وفى اليأس .. نور الأمل ،
وفى المرض تكفير الذنوب ،
وفى العقم مضاعفه الاجر ،
وفى الوحده  الراحه ،
 وفى السجن الخلوة ،
 وفى الحوادث والموت الحكمة
وحين تجدك تحب كل من حولك . لا ترى لاصدقائك عيب . ان تحب فيهم شخصهم على ماهم عليه ،فهناك من يفتش عن مساؤ اصحابه حتى يكرههم ، فيكره فى هذا تكبره ، ويكره فى الاخر عناده ، ويكره الاخر موقف جرى بينهم من اعوام ، ابحث انت عن مواطن الجمال فيهم , فستجد هذا شهما .. والاخر يسمعك شكواك , والاخر لا يبخل عليك بمال ,, وأخر يعطيك النصيحه بلا مقابل . وأخر يسعدك بحلو كلامه ,, وأخر يشعجك ويحفزك على الخير

أخيرا ... مصر
على الرغم من ما فيها من ظلم وفساد , على الرغم من ما فيها من كراهيه بين الشعب وبعضه , على الرغم من العفن الذى استشرى وبغى الفئه الحاكمه  لكن لازال  فيها مواطن جمال كثيره جدااا ...... بس اللى يعرف يشوفها يببقى يرنلى الله يكرمكم 


كن جميلا ....ترى الوجود جميلا
النار تأكل بعضها أن لم تجد ما تأكله 
#العوده

الثلاثاء، 1 سبتمبر، 2015

احلام زمان


في البوست ده هتكلم عن حاجات كنت بحلم بيها فى فترات مختلفه من عمرى

حلمت اكون ظابط جيش . كان نفسي جسمى يفضل رياضى طول العمر بالاضافه بقى لظابط بقى فلوس ومنصب وهيبه

وصحيت لقيتنى بكرش وبهتف يسقط النسر اللى ع العرش


قالوا  ماتت من رسمت معك حلمك . ..قلت عاشت من وضعت لبنة حلمى


بما انى كنت من عشاق الرياضيات والفيزياء .. حلمت انى اطلع مدرس .. بس شويه شويه عرفت ان المدرس دى شغلانه العاجزين .. يعنى ييقى المدرس حافظ كتاب علم النفس ...ومعقد .. والتانى دكتور فيزيا وما طلعش بره السبوره اخره ف العملى "الميزان الزونبوركى "

مدرس اللغه يفضل يدح لغه وهو عايش ف قريه لو خرج من باب المدرسه قال هاللو لجاره ممكن يعمله قعده عرب ويمضيه ع وصل امانه كرد شرف

حلمت زمان انى اتجوز اربعه ..لكن للاسف لا طلعت قادر ولا طلعت فاجر


حلمت اكون مهندس ميكانيكا او معمارى

 لكن للاسف مجموعى كان ناقص واحد من عشره فى الميه و التنسيق حفظه الله دخلنى علوم . ..فى علوم كان نفسي ادخل قسم حاسب ألى  .لكن تنسيق الكليه رفض علشان نص درجه ..وصحيت لقيتنى فى قسم الجيولوجيا

حلمت يوما بلقائك ..

نهر بين يدينا يجرى ..وورود ونسمات تتغنى من حولنا . و عينان يتعانقان . و قلب شعر بان دقاته تعكر صفو اللقاء ...فتوقف

حلمت زمان ان صوتى بقى عااالى ..  الناس تقدر تسمعه . الناس تقدر تتحرك علشانه . صوت بيوصل للسما . صوت بيغير الكون ... وصحيت لقيتنى اخرص


حلمت زمان...

بعيناكى . ببحر بلا مرسي .. بشمس لا تحرق وقمر لا يغيب .
حلمت بروحك وريحانك .ومأوى بين اغصانك .

دلوقتى بحلم ادوس على زرار الاستوب وانزل هنا


واختم بقول الشاعر

ببص لروحى فجأه .. لقيتنى كبرت فجأة
تعبت من المفاجئه.... ونزلت دمعتى


#العوده